جاقىندا رەسپۋبليكا كۇنىنە وراي مادەنيەت جانە اقپارات مينيسترلىگىنىڭ قولداۋىمەن جامبىل اتىنداعى قازاق مەملەكەتتىك فيلارمونياسىندا رەسپۋبليكالىق «ونەرىمىز ساعان – قازاقستان!» اتتى فەستيۆال ءوتتى.
فەستيۆال ماقساتى – قازاق حالقىنىڭ ونەرى مەن مادەنيەتىن ەلىمىزدە تۇراتىن ەتنوستىق توپتار اراسىندا جان-جاقتى ناسيحاتتاۋ, ونەر يەلەرىنىڭ كاسىبي شەبەرلىگىن ارتتىرىپ قويماي, قازاقستان حالقىنىڭ بىرلىگىن, ۇلتتار دوستىعىن ساقتاۋ. جامبىل اتىنداعى قازاق مەملەكەتتىك فيلارمونياسىنىڭ وزدەرى ۇيىمداستىرعان ءار بايقاۋ, ءار فەستيۆالدان كەيىن حالىققا ەسەپ بەرەتىن وزگەشە ءداستۇرى بار. سول ءداستۇر بويىنشا, فەستيۆالدان كەيىن ونەرسۇيەر كوپشىلىك ءۇشىن ارنايى گالا-كونتسەرت ۇيىمداستىرىلدى. ءبىز دە عاجايىپ كەشتىڭ كۋاسى بولىپ قايتتىق. كونتسەرتتىڭ باستالۋىنا ساناۋلى ۋاقىت قالعاندا, فيلارمونيا باسشىسى اقان ابدۋاليەۆتى سوزگە تارتىپ, كەش تۋرالى اقپارات تا الىپ ۇلگەرگەن ەدىك.
– ەسترادالىق زاماناۋي اندەر, ءداستۇرلى حالىق مۋزىكاسى, ۇلتتىق ءبيىمىز بەن كۇي ونەرى, جالپىلاي العاندا, تۇتاستاي قازاق ونەرىن ەلىمىزدە تۇرىپ جاتقان وزگە ۇلت وكىلدەرىنە ناسيحاتتاپ, ساناسىنا ءسىڭىرۋ – باستى ماقساتىمىز. قازاق ءتىلىن, ءداستۇر-سالتىن ۇيرەن دەپ كۇنىنە مىڭ رەت ايتقانشا, تىم بولماسا جىلىنا ءبىر رەت قولمەن ىستەپ, كوزگە كورسەتكەننىڭ ناتيجەسى ايتارلىقتاي بولار ەدى. سول سەبەپتى دە فەستيۆال اياسىندا قاتىپ قالعان قاعيدامىز جوق. باستىسى, قاتىسۋشىلاردىڭ ءبارى تەك قازاق تىلىندە ونەر كورسەتۋگە ءتيىس. ءبىر قىزىعى, قاتىسۋشىلار قازاق تىلىندە ونەر كورسەتىپ قويماي, قازاق تىلىندە وتە ساۋاتتى سويلەيدى, – دەيدى ونەر ورداسىنىڭ ديرەكتورى.
بيىل اتالعان ءىس-شارا الماتىنىڭ تورىندە ەكىنشى رەت ۇيىمداستىرىلىپ وتىر. مادەنيەت جانە اقپارات مينيسترلىگى الماتىدا كوپتەگەن ۇلت وكىلى تۇراتىندىقتان ءارى ادەبيەت پەن مادەنيەتتىڭ رۋحاني ورداسى سانالاتىندىقتان, فەستيۆالدى الماتىدا ۇيىمداستىرۋ تۋرالى شەشىم قابىلداعان ەكەن.
ءىس-شاراعا ەلىمىزدەگى بارلىق ەتنو-مادەني بىرلەستىكتەر جانە قازاق ۇلتتىق ونەرىن جەتىك مەڭگەرگەن ەتنوستىق توپ وكىلدەرىنىڭ جەكە جانە توپتىق ورىنداۋشىلارى قاتىستى. سونداي-اق كاسىبي مۋزىكانتتارمەن قاتار قازاق ونەرىنىڭ دامۋىنا ۇلەس قوسىپ جۇرگەن ونەرپازدار دا قاتىسىپ وتىر. ونەرپازداردىڭ ءبارى دە تەك تابيعي داۋىستا ونەر كورسەتتى.
كىل مىقتىلاردى انىقتاۋ دا وڭايعا تۇسكەن جوق. گالا-كونتسەرتتە ونەر كورسەتكەن قاتىسۋشىلار – ەكى بىردەي كەزەڭنەن سۇرىنبەي ءوتىپ, وق بويى وزا شاپقاندار. العاشقى كەزەڭ ونلاين ىرىكتەۋ ارقىلى ءوتتى. ءار وبلىستاعى ەتنومادەني ورتالىقتاردان ىرىكتەلگەن مۋزىكانتتار فيلارمونيانىڭ ارنايى سىنىنان وتكەن بولاتىن.
راسىمەن دە, كەشتە ونەر كورسەتكەندەر ءبىر-بىرىنەن اسىپ ءتۇستى, ءتىپتى ولاردىڭ ونەرىن ەشكىممەن سالىستىرىپ, ءبولىپ-جارۋدىڭ قاجەتى جوق. وعان دالەل رەتىندە ازەربايجان ەتنومادەني بىرلەستىگىنىڭ وكىلى نارگيزا كاسۋموۆانىڭ «وتىرار سازى» وركەسترىنىڭ دومبىراشىلارىمەن جاساعان كۇي تارتىسىنان اڭعاردىق. جاس دومبىراشى اباي قويشىباەۆ پەن سىرىم شونباەۆتان قالىس قالماي, كورەرمەندى ونەرىمەن ءتانتتى قىلدى.
كەشتە حالىقتىڭ ىقىلاسىنا بولەنىپ جۇرگەن, تانىمال انشىلەر دە ونەرىن ورتاعا پاش ەتتى. كارينا ابدۋللينا ەلدىڭ كوڭىلىنەن ورىن العان «ارمان جولدار» ءانى مەن حالىق ءانى ء«اي-ءاي, بوپەمدى» جاڭاشا ستيلدە شىرقادى. كەشتە شىرقالعان ءار ءاننىڭ حالىق ءۇشىن ورنى بولەك. ءار كونتسەرتتىك ءنومىر جوعارى تالعاممەن, تەرەڭ ىزدەنىسپەن تاڭدالعانى كورىنىپ-اق تۇر. «الاتاۋ», «ناز قوڭىر», «القوڭىر», «قۇسني-قورلان», ت.ب. حالىق اندەرىمەن قاتار, ءشامشىنىڭ «قايىقتا», ن.تىلەنديەۆتىڭ «قۇستار قايتىپ بارادى» سىندى شوقتىعى بيىك تۋىندىلاردىڭ ورىندالعانىنا قاراپ, «ساعىندىرعان اندەر-اي» كەشىنە كەلىپ قالعانداي كۇي كەشتىك. جينالعان قاۋىم دا ءار انگە ەلىگىپ, قوسىلىپ وتىردى. كەش جاستاردىڭ دا كوڭىلىنەن شىققانعا ۇقسايدى. وعان سەبەپ – زاماناۋي ەسترادالىق اندەردىڭ دە نازارعا الىنعانى. «الماتىنىڭ تۇندەرى-اي», «جانىم سول», «نازىك گ ۇلىم» سەكىلدى جاستاردىڭ سۇيىكتى اندەرىن تىڭداپ, مۇلدەم باسقا كەڭىستىككە ءتۇسىپ كەتتىك. جاڭا مەن ەسكىنىڭ بىتە قايناسىپ, ۇيلەسىم تاپقانىنا ىشتەي قۋانىپ, فەستيۆالدىڭ كەلەر جىلى دا جالعاسىن تابۋىنا تىلەكتەس بولىپ قايتتىق...
ايسۇلۋ سەزحان,
«Egemen Qazaqstan» گازەتىنىڭ
شتاتتان تىس ءتىلشىسى
الماتى