بيىل «Frankfurt Book Fair 2023» 75-مەرەتويلىق كىتاپ جارمەڭكەسىندە قازاق باسپاگەرلەرى وزدەرىنىڭ وزىق جەتىستىكتەرىن تانىستىردى.
ءداستۇرلى فرانكفۋرت كورمەسى شەتەلدەگى قانداستارىمىز ءتول مادەنيەتى مەن ادەبيەتىمەن قاۋىشاتىن يگى شاراعا اينالعان.
«قازاقستان باسپاگەرلەر, پوليگرافيستەر جانە كىتاپ تاراتۋشىلار» قاۋىمداستىعى مەن «Nomad» مادەنيەت قورىنىڭ حالىقارالىق بايلانىستارىن ۇيلەستىرۋشى بايان قابلاشتىڭ ايتۋىنشا, كورمە ستەندتەرىنىڭ سان الۋاندىعىنا قاراماستان, ەلدەن جەتكەن سالەممەن قاۋىشۋعا اسىققان قانداستارىمىزدىڭ قۋانىشىندا شەك بولمادى. ولاردى قازاق تىلىندە جارىققا شىققان ەلىمىزدىڭ تاريحى, ادەبيەتى, تابيعاتى, بالالار تاقىرىبىنداعى كىتاپتار ەرەكشە قىزىقتىردى.
بۇل جولى فرانكفۋرت قالاسىنداعى قازاقستاننىڭ باس كونسۋلدىعى «قازاق ادەبيەتى مەن مادەنيەتىنىڭ ماڭىزىنا» ارنالعان ادەبي كەش ۇيىمداستىردى.
ءىس-شارا بارىسىندا ەلىمىز ءۇشىن تاريحي ءمانى زور ەگەمەندىكتىڭ تاريحى باياندالدى. وسى جىلدارداعى جەتىستىكتەر, ساياسي رەفورمالار ەل دامۋىنىڭ كەلەشەگىن ايقىنداسا, قازاقستان مەن گەرمانيا اراسىنداعى مادەني ءارى ەكونوميكالىق بايلانىس جىلدان-جىلعا نىعايىپ كەلەدى.
ادەبي كەشتە «باتۋ مەن دوستارىنىڭ التىن توستاعاندى ىزدەگەنى» كىتابى اۆتورلارىنىڭ ءبىرى, مادەنيەتتانۋشى-جازۋشى زيرا ناۋرىزبايمەن كەزدەسۋ ادەبي كەش قاتىسۋشىلارى ءۇشىن توسىنسىي بولدى. بۇگىندە شىتىرمان وقيعالى تۋىندى Amazon-دا بىرنەشە رەيتينگتە كوش باستاپ تۇر. زيرا ناۋرىزباي قانداستارىمىزعا انا ءتىلىمىزدىڭ قازىرگى جاعدايى, ۇلتىمىزدىڭ مادەني مۇراسىن ساقتاي وتىرىپ, جاھاندا ءاردايىم قازاق بولىپ قالۋدىڭ ماڭىزى جايىندا بايانداپ بەردى.
رۋحاني كەشتە «الماتى كىتاپ باسپاسى» «تopIQ.kz» ەلەكتروندىق وقۋلىقتاردىڭ تسيفرلىق پلاتفورماسىمەن, «Steppe&World Publishing», «اتامۇرا», «مازمۇنداما» باسپالارىنىڭ وكىلدەرى قازاق دياسپوراسى جانە شەتەلدە وقىپ جاتقان ستۋدەنتتەردى قازاق ادەبيەتى مەن مادەنيەتىنە قاتىستى تۋىندىلارىمەن تانىستىردى.
الماتى