ولاردىڭ جۇمىسى قاۋىپ-قاتەرگە تولى. كۇن سايىن قىزمەت بارىسىندا باسىن بايگەگە تىگەدى. ويتكەنى ادام ءومىرى بارىنەن ماڭىزدى. سول ءۇشىن وزدەرىن قۇربان ەتۋگە بار. اڭگىمە كىمدەر جايىندا ەكەنىن اڭعارعان بولارسىزدار. ارينە, قۇتقارۋشىلار تۋرالى. قۇتقارۋشىلاردىڭ كاسىبي مەرەكەسىنە وراي ولاردىڭ كۇن سايىنعى ەرلىگىن جازعىمىز كەلدى. الايدا اجالمەن بەتپە-بەت جۇمىس ىستەيتىن كاسىپ يەلەرى ءوزىن بەيبىت كۇننىڭ باتىرى دەپ سانامايدى. ولار ءۇشىن ادامدى قۇتقارۋ – ەرلىك ەمەس, مىندەت. سوندىقتان دا توتەنشە جاعداي قىزمەتىندەگى بارشا ماماندارعا العىستان باسقا ايتارىمىز جوق.
مەملەكەتتە ءار كەز بولىپ تۇراتىن وقىس وقيعالار, اپاتتى جاعدايلار توتەنشەلىك دەپارتامەنتىنىڭ كەزەكشى ءپۋلتىن ءبىر ءسات تە تىنىش قويماعان. قۇتقارۋشىلار جىلدىڭ قاي مەزگىلىندە دە ءوز مىندەتىنە قالتقىسىز ادال. قىستىڭ كۇندەرى اياز بەن قاردان جاپا شەككەن تۇرعىندارعا ءبىرىنشى بولىپ كومەككە ۇمتىلادى. قالا بەردى ىستان ۋلانىپ قالماۋدىڭ قام-قارەكەتىمەن دە ۋايىم-قايعى جەيدى. كوكتەمدە جاۋىن-شاشىننان كەيىنگى سەل بولعان اۋماقتاردا رەزىڭكە ەتىكپەن سۋ كەشىپ جۇرەدى. جازدا وزەن-توعانداردى كۇزەتىپ, بالالاردىڭ سۋعا باتىپ كەتپەۋىن قاداعالايدى. ادامداردى ءارتۇرلى تابيعي, تەحنوگەندىك اپاتتاردان دەرەۋ قۇتقارىپ, اجالدان اراشالاپ امان الىپ قالاتىن توتەنشەلىكتەردىڭ كۇندەلىكتى جۇمىسى – مىنە, وسىنداي.
شىمكەنت قالاسى توتەنشە جاعداي دەپارتامەنتىنىڭ «101» ديسپەتچەرلىك پۋلتىنە 10 قازان ساعات 16.02 شاماسىندا اباي اۋدانى تولەمەتوۆ كوشەسىندەگى كوپقاباتتى تۇرعىن ۇيدە ءورت شىققانى تۋرالى حابارلاما كەلىپ تۇسەدى. ءورت بولعان جەرگە تەز ارادا 7 ءورت ءسوندىرۋ تەحنيكاسى, جەكە قۇرامنان 37 ادام جىبەرىلەدى. وقيعا بىلاي بولعان: تۇرعىن ءۇيدىڭ ءبىر پاتەرىنىڭ بالكونىنداعى ءۇي زاتتارى جانىپ كەتكەن. سودان الاپات ءورت ورىن الىپ, ءۇيدىڭ ءىشى قارا تۇتىننەن كورىنبەي قالعان. بىراق ءورت سوندىرۋشىلەر قىزىل جالىننىڭ ودان ءارى تارالۋىنا جول بەرمەي, ساعات 16.20-دا ء«تىلسىز جاۋدى» وقشاۋلاسا, 16.24-تە تولىعىمەن سوندىرگەن. وسى ارادا №5 ءورت ءسوندىرۋ ءبولىمىنىڭ اعا ءورت سوندىرۋشىلەرى مارات الىپباەۆ پەن ارمان ماحمۇت قويۋ تۇتىنگە قويىپ بەرىپ پاتەردىڭ ىشىننەن 4-5 جاسار ەكى بالدىرعاندى ىزدەپ تاۋىپ, تەز ارادا قاۋىپسىز جەرگە شىعارعان. وقيعا ورنىنا تەز جەتكەن جەدەل جاردەم بريگاداسى سول جەردە بالالارعا العاشقى مەديتسينالىق كومەك كورسەتكەن. الدىن الا بولجام بويىنشا بالالار وت جاعىپ ويناپ, اقىرى ءورتتىڭ شىعىپ كەتۋىنە سەبەپشى بولعان.
شىمكەنتتىك ءورت سوندىرۋشىلەر ونىڭ الدىندا دا تاعى ءبىر ادامنىڭ ءومىرىن قۇتقارىپ قالعان ەدى. بۇل وقيعا 2023 جىلعى 28 قىركۇيەكتە ساعات سول 22.30 شاماسىندا بولدى. №2 ءورت ءسوندىرۋ بولىمىنە قىز بالا جۇگىرىپ كەلەدى. ءوڭى قۇپ-قۋ قىز اكەسىنىڭ قاراۋسىز قالعان عيماراتتىڭ 5-قاباتىنان سەكىرگەلى جاتقانىن حابارلاپ, ءورت سوندىرۋشىلەردەن كومەك سۇراعان. قاراۋىل باستىعى مارلەن سەيىلبەك ءورت ءسوندىرۋشى ۋاليحان جۇسىپپەن بىرگە تەز ارادا وقيعا ورنىنا بارىپ, 5-قاباتتان سەكىرىپ, وزىنە قول جۇمساماق بولعان 1980 جىلعى ازاماتتى قۇتقارىپ قالدى. ءبولىم قىزمەتكەرلەرى وزىنە قول جۇمساماق بولعان ازاماتپەن جىلى اڭگىمەلەسىپ, ساباسىنا ءتۇسىرىپ, رايىنان قايتارعان. ءسويتىپ, پسيحولوگيالىق ەركىن سۇحباتتىڭ ارقاسىندا ول ارەكەتىنىڭ قاتە ەكەنىن ءتۇسىنىپ, وتباسىنا امان-ەسەن ورالادى.
قۇتقارۋشىلاردىڭ ەرلىگىن ناسيحاتتاۋ ماقساتىندا ەلىمىزدە كوپتەگەن ءىس-شارا اتقارىلىپ جاتىر. سونىڭ ءبىرى بۇگىندە استانا قالاسىندا ءوتىپ جاتقان Rizamyz Qutqarushi فوتوكورمەسى دەر ەدىك. فوتوكورمە بارىسىندا ەلوردانىڭ «اتىراۋ» جاياۋ جۇرگىنشىلەر كوپىرىنە تجم قىزمەتكەرلەرىنىڭ 112 پورترەتى قويىلدى. ولار بارلىعى وسى سالاداعى ءورت سوندىرۋشىلەر, قۇتقارۋشىلار, سۇڭگۋىرلەر, كينولوگتەر, مەديتسينا قىزمەتكەرلەرى, ۇشقىشتار, پسيحولوگتەر, اسكەري قىزمەتشىلەر. فوتوسۋرەتتەر ىشىندە شىمكەنت قالاسى توتەنشە جاعدايلار دەپارتامەنتىنىڭ 7 قىزمەتكەرى بار. ءاربىر پورترەتتە QR-كود بەينەلەنگەن. ونى سكانەرلەۋ ارقىلى نۇربەك تاۋكەەۆتىڭ, رومان پيسمەنسكيدىڭ, اسحات قالىباەۆتىڭ, شۋحرات حالمەتوۆتىڭ, ادىلەت جورابەكتىڭ, داۋلەت شامەنوۆتىڭ, ۇسەن راحماتۋللاەۆتىڭ ومىرىندەگى جارقىن وقيعالارىن بىلۋگە بولادى. سونىمەن بىرگە rizamyz.com سايتىندا قىزمەتتىك مىندەتتەرىن ورىنداۋ كەزىندە ەرلىكپەن قازا تاپقان 11 قۇتقارۋشىنىڭ ەرلىكتەرى تۋرالى باياندالادى. وسىناۋ باتىرلاردىڭ اراسىندا 2014 جىلى «Plant»» جشس فارماتسەۆتيكالىق زاتتاردى ساقتاۋ قويماسىندا ءورت ءسوندىرۋ كەزىندە قازا تاپقان جۇلدىزبەك ەسەناليەۆتىڭ ەسىمى ەرەكشە قۇرمەتپەن اتالادى.
شىمكەنت