«SpaceX» كومپانياسى بىرنەشە جىل بۇرىن «Starlink» عالامدىق سپۋتنيكتىك جۇيەسىن دامىتا باستاعانى بەلگىلى. بۇل جەلىسى ناشار, قىمبات نەمەسە مۇلدەم قولجەتىمسىز جەرلەردە سپۋتنيكتىڭ كومەگىمەن جوعارى جىلدامدىقتى كەڭ جولاقتى ينتەرنەتكە قولجەتىمدىلىكتى قامتاماسىز ەتۋگە ارنالعان. «Starlink» العاشقى ليتسەنزياسىن العاننان كەيىن بەس جىلدان كەيىن بەس مىڭنان استام جەرسەرىك ۇشىرىلدى.
2022 جىلعى دەرەككە سۇيەنسەك, ادامزاتتىڭ ۇشتەن ءبىرى ءالى دە بولسا ينتەرنەتكە قوسىلماعان, ازاماتتاردىڭ كوبىندە تەك نەگىزگى ينتەرنەت بايلانىسى عانا بار. «Starlink» وسى دۇنيەلەردى جاقسارتۋعا مۇمكىندىك بەرەدى. جالپى, بايلانىس دەگەنىمىز – وتە كۇردەلى ماسەلە. بۇعان قوسىلۋ مۇمكىندىگى نەمەسە ينفراقۇرىلىمنىڭ بولۋى ازدىق ەتەدى. بۇل جەردە تەحنولوگيالاردىڭ قارجىلىق قولجەتىمدىلىگى, تەحنولوگيالاردى پايدالانۋ مۇمكىندىگى دە ماڭىزدى. اسىرەسە سوڭعىسىنا باسىمدىق بەرگەن ابزال.
ءبىز ۇسىنىپ وتىرعان «Starlink»-ءتى ورناتۋ وڭاي. ونى قوراپتان شىعارىپ, كوككە باعىتتاپ, ينتەرنەتكە قوسىلاسىز. بولدى. قۇرىلعىلاردىڭ ءبارى ءبىر قوراپپەن كەلەدى. قۇرىلعى دەپ وتىرعانىم – قاراپايىم «Starlink» جيىنتىعى. وعان Wi-Fi مودەمى جانە روزەتكا سىمى كىرەدى. نەگىزى مۇنداي كىدىرىسى از كەڭ جولاقتى قولجەتىمدىلىكتى الۋ ءۇشىن ۇلكەن جابدىق, ونى ورنالاستىرۋ ءۇشىن ۇزاق ۋاقىت قاجەت. ال «Starlink»-ءتى ريۋكزاكقا سالىپ, كولىكپەن الىپ جۇرۋگە بولادى. قىسقاسى, وتە ءتيىمدى.
ايتپاعىم, «Starlink» قازاقستاننىڭ ەلدى مەكەندەرىن ينتەرنەتپەن قامتاماسىز ەتۋدە ءتيىمدى قادام بولا الادى. بۇل شالعايداعى اۋىلدار بەتپە-بەت كەلىپ وتىرعان بايلانىس ماسەلەسىن ويداعىداي شەشۋگە جول اشار ەدى. ءبىز تەلەكوممۋنيكاتسيا جانە IT-ينفراقۇرىلىم سالاسىنداعى باسقا دا باعالى باستامالاردى بايىتا تۇسەر ەدىك.
«Starlink»-ءتىڭ كوممەرتسيالىق ساتىلىمى اقش-تا شامامەن ءۇش جىل بۇرىن باستالدى. قازىر بارلىق جەتى قۇرلىقتاعى 60 ەلدە 2 ميلليوننان استام كليەنت بار. ال ناقتى پايدالانۋشىلار سانى 10 ميلليوننان استى. بۇل قاتاردا قازاقستان تۇرعىندارى دا بولسا تاماشا ەمەس پە؟
لورەن درەيەر,
«SpaceX» كومپانياسىنىڭ «Starlink» ماسەلەلەرى جونىندەگى ۆيتسە-پرەزيدەنتى