اتاجۇرتتىڭ دامۋىنا ۇلەس قوسايىق

­شەتەلدەگى بيزنەسىن قازاق­ستاندا كەڭەيتۋدى كوزدە­گەن نەمەسە قاجەتتى كاسىپ بويىنشا ماماندىعى بار ەتنوستىق قازاقتارعا ارنالعان «اتا جولى» كارتاسىن 10 جىلعا دەيىن بەرۋ جۇمىستارى جاقىندا عانا باستالدى. وسى رەتتە «اتا جولى» كار­تا­سىنىڭ مۇمكىندىكتەرىن كەڭەيتۋ كەرەك دەپ ەسەپ­تەيمىن. شەتەلدىك ينۆەستور رەتىندە ۇسىنىلعان مۇم­­كىن­­دىكتەردەن تىس, قانداستارعا ەرەكشە جەڭىل­دىكتەر قاراستىرۋدى ۇسىنامىن. تاعى دا ءبىر ايتا­تىن ماسەلە, تەك كاسىپ اشساق قانا «اتا جولى» كارتا­سىن بەرەمىز دەمەي, شەتەلدە كاسىبى بار بارلىق قازاق­قا بەرۋ كەرەك. ولار وسى مەزگىل ىشىندە اتاجۇرتقا ەركىن كەلىپ-كەتىپ ءجۇرىپ, كاسىبىن اشادى دەپ سەنەمىن.

بيىل قىركۇيەك ايىنىڭ باسىندا الماتى قالاسىندا قازاقستان مەن قىتاي اراسىنداعى ساۋدا-ەكونوميكالىق ىنتىماقتاستىق فورۋمى ءوتتى. فورۋمدا قازاقستان, ورتالىق ازيا جانە قىتاي حالىق رەسپۋبليكاسى كاسىپكەرلەرىنىڭ باستاماسىمەن «ورتالىق ازيا جانە قىتاي كاسىپكەرلەرىنىڭ قاۋىمداستىعى» قۇرىلدى. مەن سول قاۋىمداستىقتىڭ تۇراقتى حاتشىسى لاۋازىمىنا سايلاندىم. وسى ورايدا ايتا كەتەتىنى, بۇل ماسەلەدەن وزگە قانداستار دا شەت قالماۋ كەرەك. قىتايدا تۇراتىن اعايىندار جانە قازاقستانعا كوشىپ كەلگەن قانداستار, بارلىعى دا اتسالىسۋ كەرەك دەپ ەسەپتەيمىن. سەبەبى بىرىنشىدەن ولار ءتىل بىلەدى. ەكىنشىدەن, وزدەرى تۇرىپ جاتقان ەلدىڭ ەكونوميكاسىنىڭ قاي سالاسى جاقسى دامىپ كەلە جاتىر؟ قانداي جاڭا تەحنولوگيانى قولدانعاندا جوعارى ءونىم الۋعا بولادى؟ سونى جاقسى بىلەدى. ءارى وزدەرى دە پايدا تابادى. وسىدان كەيىن ءتىل ۇيرەنۋ, مادەنيەت, سپورت, تاعى دا باسقا سالالاردا دياسپورانىڭ ىشكى قاجەتتىلىكتەرىن قارجىلاندىرۋعا, باسقا دا دەمەۋشىلىك جۇمىستارىن ۇيىمداستىرۋعا مۇمكىندىكتەرى بولادى. قاي ەلدە ءومىر سۇرسەك تە سول ەلدىڭ قازاقستانمەن ارىپتەستىك قارىم-قاتىناسىن دامىتۋعا, ساۋدا ءىسىن جاقسارتۋعا اتسالىسايىق. ەكى ەلدىڭ اراسىندا التىن كوپىر بولۋعا تىرىسايىق. 

وركەش سلامبول,

«UWEE GROUP» كومپانياسىنىڭ

ورتالىق ازيا بويىنشا باسقارما توراعاسى