قىرۋار قارجى بولىنگەن «جايلى مەكتەپ» ۇلتتىق جوباسى – مەكتەپتەگى كوپ ماسەلەنىڭ ءتيىمدى شەشىمى. الايدا ءبىلىم وردالارى جوسپار بويىنشا سالىنباي, ۋاقىتىندا قولدانىسقا بەرىلمەي قالا ما دەگەن قورقىنىش بار. ويتكەنى كەيبىر مەكتەپ مەردىگەرلەرىنىڭ جۇمىسى كەشەۋىلدەپ جاتىر.
«Samruk-Kazyna Construction» اق باسقارما توراعاسى ماۋلەن ايمانبەتوۆ قاراعاندى وبلىسىنا بارعان ساپارىندا «جايلى مەكتەپ» جوباسىنىڭ جۇزەگە اسىرىلۋ بارىسىن تەكسەردى. قاراعاندى وڭىرىندە جوبا اياسىندا 18 مەكتەپ سالىنادى. 10 جايلى مەكتەپتىڭ قۇرىلىسى بيىل باستالىپ, 2024 جىلى پايدالانۋعا بەرىلۋگە ءتيىس. قالعان 8 مەكتەپ 2025 جىلعا جوسپارلانعان. ۇلتتىق جوبانىڭ ناتيجەسىندە وبلىس بويىنشا 12,5 مىڭ قوسىمشا ورىن اشىلادى.
الايدا «استانا-كوكتەم س» كومپانياسى جاۋاپكەرشىلىك العان بۇقار جىراۋ اۋدانى ۇشتوبە اۋىلىنداعى 300 ورىندىق جانە «AN Groups» كومپانياسى سالۋعا ءتيىس «گولۋبىە پۋدى» شاعىن اۋدانىنداعى 1 200 ورىندىق جايلى مەكتەپتەردىڭ جۇمىستارى وتە اقىرىن ءجۇرىپ جاتىر. اتالعان مەردىگەرلەرگە قاتاڭ ەسكەرتۋ جاسالدى.
– قۇرىلىسقا دايىندىق جۇمىستارى مەن تەحنيكانى جۇمىلدىرۋ قارقىنى ءالسىز. جۇمىستى ەكى اۋىسىمدا ۇيىمداستىرىپ, بارلىق ۇدەرىستى جەدەلدەتىپ, قوسىمشا تەحنيكا جۇمىلدىرىپ, ماماندار مەن جۇمىسشىلاردى كوبىرەك تارتۋ كەرەك. بەكىتىلگەن مەرزىمدەردى قۋىپ جەتپەسەڭىزدەر, كەلىسىمشارتتى بۇزۋعا تۋرا كەلەدى. قۇجاتتاردى ۋاقىتىندا تاپسىرۋى كەرەك. ەگەر جاقىن ارادا جاعداي تۇزەلمەسە, بارلىق اتقارۋشىلىق قۇجاتتامانى رەتكە كەلتىرمەيىنشە جۇمىستاردى توقتاتۋعا ءماجبۇر بولامىز. ەسكى جۇمىس تاسىلدەرىنەن باس تارتىڭىزدار, ءبارى ەرەجەگە سايكەس بولۋعا ءتيىس. سونداي-اق جۇمىس بارىسىن جەدەلدەتىپ, ەكى اۋىسىم ۇيىمداستىرۋ كەرەك, ويتكەنى قىس جاقىنداپ كەلەدى, – دەدى م.ايمانبەتوۆ.
«Samruk-Kazyna Construction» باسشىسى ع.مۇستافين اۋىلىنا قاراستى نۇرا ستانساسىنداعى مەكتەپتىڭ قۇرىلىس جۇمىستارىن توقتاتۋعا بۇيرىق بەردى. سەبەبى وندا گەولوگيالىق زەرتتەۋلەر جۇرگىزۋ كەزىندە كەمشىلىكتەر كەتكەن. سونداي-اق ول «گۇلدەر» شاعىن اۋدانىنداعى «ستينك تفك» كومپانياسى سالىپ جاتقان 1 200 ورىندىق جايلى مەكتەپتىڭ قۇرىلىس الاڭىندا بولىپ, مەكتەپ ۋچاسكەسىنىڭ اۋماعى تار ەكەنىن, ءبىلىم وشاعىنىڭ كىرەبەرىس كەڭ بولۋى كەرەگىن اتاپ ءوتتى. ال «BiGlobal» جشس سالاتىن «كەڭ دالا» شاعىن اۋدانىنداعى 2 000 ورىندىق جايلى مەكتەپتىڭ سپورت الاڭىن تالاپتارعا ساي جاراقتاندىرۋ ءۇشىن اۋماقتىڭ باس جوسپارىن قايتا قاراۋدى تاپسىردى.