سەزد يدەياسى – ديالوگ پەن ءوزارا كومەك

ەل باسشىلىعىنىڭ باستاماسىمەن ورتاق مۇددەلەر مەن ءوزارا تۇسىنىستىك نەگىزىندە قۇرىلعان الەمدىك جانە ءداس­تۇر­لى دىندەر ليدەرلەرى اراسىنداعى ديالوگ ءوزارا ىنتىماقتاستىق ءۇشىن كەڭ پەرسپەكتيۆالار اشادى. سونداي-اق زا­ما­نىمىزدىڭ زورلىق-زومبىلىق, فاناتيزم, ەكسترەميزم جانە تەرروريزم سياقتى جاعىمسىز كورىنىستەرىن ەڭسەرۋگە ىقپال ەتەدى.

الەمدىك جانە ءداستۇرلى دىندەر كوش­باس­شىلارىنىڭ I سەزىندە فورۋمعا قاتىسۋشىلار سەزدىڭ جۇمىس ورگانى – حاتشىلىقتى قۇرۋ تۋرالى شەشىم قابىلدادى. سەزد حاتشىلىعىنىڭ باسشىسى پارلامەنت سەناتىنىڭ توراعاسى, سەزگە قاتىساتىن الەمدىك دىندەر ليدەر­لەرىنىڭ وكىلدەرى, ونىڭ ىشىندە يسلام, حريستيان, يۋدايزم, بۋدديزم, داوسيزم, سينتويزم, يندۋيزم, حالىقارالىق ۇيىم­دار وكىلدەرى – مۇشەلەرى بولىپ بە­كى­تىلدى.

الداعى 11 قازاندا الەمدىك جانە ءداستۇرلى دىندەر ليدەرلەرىنىڭ ءبىرىنشى سەزىنىڭ شاقىرىلعانىنا 20 جىل تولۋىنا وراي سەزدىڭ XXI حاتشىلىعى وتەدى. وسى جىلدار ىشىندە استانا كون­­فەسسياارالىق فورۋمى دىنارالىق ديالوگتىڭ باستى حالىقارالىق الاڭ­دارىنىڭ ءبىرى ەكەنىن دالەلدەدى. حات­شىلىقتىڭ الداعى وتىرىسىندا سەزدىڭ جۇمىسىن ۇيىمداستىرۋ جانە ونىڭ مازمۇندى بولىمدەرى جونىندەگى ماسە­لەلەرى تالقىلانادى. «2023-2033 جىل­دار­عا ارنالعان الەمدىك جانە ءداس­تۇرلى دىندەر ليدەرلەرى سەزىن دا­مى­تۋ تۇجىرىمداماسى» اتتى ما­ڭىز­­دى قۇ­جات قابىلدانادى. بۇل تۇجىرىمداما 2022 جىلى وتكەن VII سەزد باستامالارىنىڭ ءبىرى بولدى. سەزدەردىڭ ەرەكشە جاۋاپ­كەر­شىلىكپەن ۇسىنىلعان باستامالارى شىن مانىندە جۇزەگە اسىرىلىپ, الەمدە توزىمدىلىك, ديالوگ جانە ءتۇسىنۋ قاعيداتتارىن ىلگەرىلەتۋگە قىزمەت ەتەدى. وتەتىن وتىرىستىڭ كۇن ءتارتىبى بويىنشا جەمىستى پىكىر الماسۋ كۇ­تىلىپ وتىر.

وسى فورۋمنىڭ تاعى ءبىر ماڭىزدى ءساتى – ءىس-شارانىڭ ەرىكتىلەرى رەتىندە جوو ستۋدەنتتەرىنىڭ قاتىسۋى بولماق. بەل­سەندى جاستار فورۋم جۇ­­مى­سى­نا ءاردايىم قى­زىعۋشىلىق تانىتىپ, قا­تىس­قىسى كە­لە­دى, شەتەلدىك دەلە­گا­تسيا­لارعا كومەك­تەسەدى, اۋدارماشى بولادى. شىن مانى­سىن­دە سەزدىڭ يدەياسى – ديالوگ پەن ءوزارا كومەككە باعىتتالعان.

جانار قاسىموۆا,

كونفەسسياارالىق جانە وركەنيەتارالىق ديالوگتى دامىتۋ ورتالىعى جيىنتىق-تالداۋ دەپارتامەنتىنىڭ ديرەكتورى