«جايلى مەكتەپ» جوباسى جۇزەگە اسىرىلىپ جاتقانى كوپكە ءمالىم. بۇعان قاتىستى تۇيتكىلدى ماسەلەلەر دە بولدى. «مەكتەپتەر ۋاقتىلى سالىنىپ بىتە مە, شىنىمەن جايلى مەكتەپ بولا ما» دەپ وتىرعان اتا-انا كوپ. جوباعا جاۋاپتى «Samruk-Kazyna Construction» كومپانياسىنىڭ باسشىسى ماۋلەن ايمانبەتوۆ الاڭداۋشىلاردىڭ ەسكەرتۋلەرى مەن ۇسىنىستارىن ەسكەرەمىز دەپ وتىر.
تامىز كەڭەسىندە بايانداما جاساعان م.ايمانبەتوۆ «جايلى مەكتەپكە» قاتىستى بارلىق سىن-پىكىرگە, ۇسىنىستارعا اشىقپىن دەگەن بولاتىن. «Samruk-Kazyna Construction» كوپ ۇزاماي جايلى مەكتەپتەردىڭ ساۋلەت جانە ديزاينەرلىك شەشىمدەرىنىڭ جالپىحالىقتىق تالقىلاۋىن جاريالادى. ء«بىزدىڭ ماقساتىمىز – ۇلتتىق جوبانى جۇزەگە اسىرۋ بارىسىن بارىنشا اشىق ەتۋ. سوندىقتان مەكتەپتەردىڭ جوباسىن بۇكىل حالىق بولىپ تالقىلاۋدى ءجون كوردىك. العاشقىلاردىڭ ءبىرى بولىپ مۇنداي باستامانى ىسكە اسىرىپ جاتىرمىز. وقۋ وشاقتارى ساپالى ءبىلىم بەرىپ قانا قويماي, وقۋشىلاردىڭ قارىم-قابىلەتتەرىن دامىتىپ, بەلسەندىلىگىن ارتتىرىپ, بولاشاق ماماندىعىن تاڭداۋعا جول اشادى. ەڭ باستىسى, جايلى مەكتەپتەر بالالاردى, جاستار مەن ەرەسەكتەردى وزىنە تارتاتىن ورتالىققا اينالۋعا ءتيىس», دەگەن ماۋلەن ايمانبەتوۆ جاناشىر ازاماتتاردى ساۋالداماعا بەلسەنە قاتىسۋعا شاقىردى.
«Samruk-Kazyna Construction» كومپانياسىنىڭ مالىمەتىنشە, 17 قىركۇيەككە دەيىن جالعاسقان ساۋالداماعا 6 132 ادام قاتىسقان. سونىڭ ىشىندە 24 پەن 34 (30 پايىز), 35-44 (50 پايىز) جاس ارالىعىنداعى ازاماتتار بەلسەندىلىك تانىتقان. ال قاتىسۋشىلاردىڭ 88 پايىزى جايلى مەكتەپتىڭ ساۋلەت قۇرىلىسىنا, ىشكى كورنەكىلىگىنە كوڭىلى تولاتىنىن جازعان. سونداي-اق ۇسىنىستارىن دا جولداعان.
– ۇلتتىق جوبانى ىسكە اسىرۋدا ءاربىر ازاماتتىڭ وي-پىكىرى وتە ماڭىزدى. ەلىمىزدەگى وقۋشى ورىندارىنىڭ تاپشىلىعى ماسەلەسىن شەشۋگە باعىتتالعان ورتاق جۇمىسىمىزعا تۇرعىندار تاراپىنان مىقتى قولداۋ كورسەتىلىپ وتىر. وعان قوسا ورىندى ۇسىنىس-تىلەكتەر دە كەلىپ ءتۇستى, ءبارىن مۇقيات زەردەلەپ, جوباعا تولىقتىرۋ ەنگىزۋگە كىرىستىك, – دەدى م.ايمانبەتوۆ.
ساۋالداماعا قاتىسۋشىلار وقۋشىلاردىڭ ساباقتان تىس ۋاقىتىنىڭ جاقسى ءوتۋىن قامتاماسىز ەتەتىن كوۆوركينگتەردىڭ بولۋىنا باسا نازار اۋدارعان. سونداي-اق وقۋشىنىڭ جەكە زاتتارىن قوياتىن ورىنداردىڭ كەڭ بولۋىن اتاپ وتكەن جانە مەكتەپكە كەلگەندە ۇزىن-سونار كەزەك بولماۋى ءۇشىن, بالالاردىڭ ءبىر-بىرىمەن سىعىلىسىپ قالماۋى ءۇشىن باستاۋىش پەن ورتا بۋىن وقۋشىلارىنا جەكە كىرەبەرىس ىستەۋدى سۇراعان. ەكولوگيالىق تالاپتاردىڭ دا ەستە بولۋىن ەسكەرتكەن. سونىمەن قاتار اتا-انالار مەكتەپتە بالالاردىڭ دەنساۋلىعى مەن تاربيەسىنە دە كوڭىل ءبولىنۋى كەرەك دەپ ەسەپتەيدى. سوندىقتان ءارتۇرلى ۇيىرمەگە ارنالعان ورىندار بولۋى كەرەك دەگەن ۇسىنىس ءبىلدىرىپ, جاراتىلىستانۋ باعىتىنداعى پاندەردىڭ زەرتحانالىق سىنىپتارىنىڭ دا جەكە بولۋى كەرەگىن ەسكەرتكەن. ماۋلەن ايمانبەتوۆتىڭ ايتۋىنشا, مۇنداي ەرەكشەلىك جايلى مەكتەپتەردە قاراستىرىلعان. بۇدان بولەك, بالالاردى مەكتەپكە اكەلگەندە, كەپتەلىستىڭ الدىن الۋ ءۇشىن كولىك توقتايتىن ارنايى ورىندار جاسالادى.
ءبىر قۋانتارلىعى, جايلى مەكتەپتەر قالادا دا, اۋىلدا دا تەڭ دارەجەدە سالىنادى. ولاردىڭ ساپاسى مەن ىشكى جابدىقتالۋىندا ەشقانداي ايىرماشىلىق بولمايدى. بۇل – ءبىلىم دەڭگەيىندەگى الشاقتىقتى ازايتۋعا سەپتىگىن تيگىزەتىن بىردەن-ءبىر فاكتور.