«Amanat» پارتياسى فراكتسياسىنىڭ مۇشەسى نارتاي سارسەنعاليەۆ وڭتۇستىك كورەياداعى وتاندىق ەڭبەك ميگرانتتارى تۋرالى پرەمەر–مينيسترگە دەپۋتاتتىق ساۋال جولدادى, دەپ حابارلايدى Egemen.kz.
دەپۋتاتتىڭ ايتۋىنشا بۇل ساۋال وزگە ەلدە زاڭسىز ميگرانت اتانىپ, قۇقىعى قورعالماستان قاۋىپ قايدان كەلەدى دەپ جاۋتەڭدەپ وتىرعان 20 مىڭنان استام قازاق بالاسىنىڭ ارىزى ىسپەتتى. ارقا جايلى بولسا ارقار اۋىپ نەسى بار, دەلىنگەن ماقالداعىداي جالاقىعا جارىماي, تاباقتاي ديپلومىنا لايىقتى جۇمىس تاپپاعان قازاق جاستارى قازىر الەمنىڭ ءار تۇكپىرىندە قارا جۇمىس ىستەپ جۇرگەنى ءمالىم.
رەسمي دەرەك بويىنشا 2022 جىلى ەلىمىزدىڭ 9 600 ازاماتى وڭتۇستىك كورەيادا ەڭبەك ميگرانتى بولىپ جۇمىس ىستەگەن. ال وتانداستىرىمىزدىڭ باسىن بىرىكتىرەتىن ورتالىقتاردىڭ دەرەگىنشە قازىر وڭتۇستىك كورەيادا 20 مىڭنان استام وتانداسىمىز ءجۇر.
«زاڭسىز جۇرگەن ەڭبەك ميگرانتىنىڭ جاعدايى تۇسىنىكتى. مىسالى, 57 جاستاعى وتانداسىمىز وڭتۇستىك كورەياعا ەڭبەك ميگرانتى بولىپ بارىپ, كوز جۇمعان كەزدە, ونىڭ دەنەسىن اكەلۋ ءۇشىن بالا–شاعاسى جۇرتتان جىلۋ جيناپ كەتكەنى ەسىمىزدە. ودان بولەك سول ەلدەگى ءوندىرىس ورىندارىندا قولىنان ايىرىلعان, باسقا دا جاراقاتتار العان وتانداستارىمىزدىڭ ارىزدارى ايتىلىپ جاتىر. سەبەبى ولارعا ەشكىم ەشقانداي وتەماقى تولەمەيدى, قاجەت دەسە, جۇمىس بەرۋشى ولاردى زاڭسىز ەڭبەك ميگرانتى رەتىندە قۇزىرلى ورىندارعا ۇستاتىپ جىبەرە الادى», دەدى نارتاي سارسەنعاليەۆ.
دەپۋتاتتىڭ پايىمىنشا, وتانداستارىمىزدىڭ قۇقىعىنىڭ قورعالماۋ سەبەبى ەكىجاقتى كەلىسىمشارت نەگىزىندە بەرىلەتىن «ە 9» ۋاقىتشا ەڭبەك ۆيزاسىنىڭ بولماۋى. مەملەكەت باسشىسى 2020 جىلى قازان ايىندا بىرقاتار ەلدە وتانداستارىمىز جاسىرىنىپ زاڭسىز جۇمىس ىستەپ جاتقاندىعىن, «مۇنداي جاعدايدا وزگە ەلدە تىركەلۋ قيىندىقتارى مەن ءتۇرلى تۇرمىستىق قيىندىقتارعا تاپ بولادى», دەپ ۇكىمەتكە ماسەلەنى شەشۋدى شەگەلەپ تاپسىرعان بولاتىن. بىراق ءالى كۇنگە دەيىن بۇل تۇيتكىلدىڭ ءتۇيىنى تارقاعان جوق.
كورەيامەن 16 ەل ەڭبەك رۇقساتتارى جۇيەسى اتتى شەتەلدىكتەردى جۇمىسقا ورنالاستىرۋ جۇيەسىنە قوسىلعان, اتالعان جۇيەگە قازاقستان ءالى قوسىلا الماي كەلەدى.
نارتاي ارالباي ۇلىنىڭ سوزىنشە وڭتۇستىك كورەيا ۇكىمەتى قازاقستاننىڭ كوپتەگەن سۇراۋلارىن ەسكەرە وتىرىپ, ەڭبەككە رۇرسات بەرۋ جۇيەسىنە قازاقستان رەسپۋبليكاسىن ەنگىزۋ ماسەلەسىن قايتادان قاراستىرىپ, ءتيىستى كەلىسسوزدەردى جۇرگىزۋگە دايىن ەكەندىكتەرىن جەتكىزگەن. قاجەت بولعان جاعدايدا ءتيىستى ماماندارىن جىبەرىپ, ادىستەمەلىك كومەك كورسەتۋگە دە دايىن. كورەيا تاراپىنان كەلىپ تۇسكەن حاتتا قازاقستاندى ەڭبەككە رۇقسات بەرۋ جۇيەسىنە ەنگىزۋگە قاتىستى قويىلاتىن ناقتى شارتتار دا كورسەتىلگەن.
«بىراق ەلىمىزدە جاۋاپتى ورىنداردىڭ ماسەلەنى شەشۋگە قۇلقى كورىنبەيدى. اتالعان ماسەلەنى رەتتەيدى دەگەن ۇمىتپەن ارنايى كوشى–قون كوميتەتى دە قۇرىلىپ ەدى. بىراق ولاردىڭ وسى باعىتتاعى ناتيجەلى جۇمىسىن كورمەدىك. بۇگىنگە دەيىن ەكى ەل اراسىندا جەتى كەلىسسوز جۇرگىزىلگەن. ءالى ناتيجە جوق. ال, وڭتۇستىك كورەيادا كوزى جاۋدىرەپ مىڭداعان قازاق بالاسى وتىر», دەدى دەپۋتات.
دەپۋتات ساۋالى ناقتى ەكى سۇراقپەن جانە ەكى ۇسىنىسپەن تۇيىندەلگەن.
«سۇراقتار: قازاقستان قاشان ەڭبەككە رۇقسات بەرۋ جۇيەسىنە ەنەدى؟ وتانداستارىمىز وڭتۇستىك كورەيادا قاشان زاڭدى تۇردە ەڭبەك ەتە الادى؟ ۇسىنىستار: 1) قازاقستاندى ەڭبەككە رۇرسات بەرۋ جۇيەسىنە قوسۋ ءۇشىن ءتيىستى ءىس–شارالار جوسپارىن جەدەل پىسىقتاۋدى تاپسىرامىز. 2) ەكى ەل اراسىندا ورتاق كەلىسىم جاسالعانشا وڭتۇستىك كورەياعا زاڭسىز ەڭبەك ميگرانتى بولىپ جۇرگەن 20 مىڭعا جۋىق وتانداستىرىمىزدىڭ قۇقىعىن قورعايتىن زاڭدى تەتىكتى نەعۇرلىم تەز تابۋ قاجەت. اتالعان دەپۋتاتتىق ساۋالعا زاڭنامادا بەلگىلەنگەن مەرزىم ىشىندە جازباشا جاۋاپ كۇتەمىز», دەدى «Amanat» پارتياسى فراكتسياسىنىڭ مۇشەسى نارتاي سارسەنعاليەۆ.