تانىمال vRINGe.com سايتى كاسىپقوي بوكسشىلاردىڭ رەيتينگىن جاريالادى. وكىنىشكە قاراي, ۇزدىكتەر تىزىمىندە قازاقستاننىڭ بىردە-ءبىر وكىلى جوق.
وسىعان دەيىن جارتىلاي ورتا سالماقتا (76,2 كيلو) بەسىنشى ورىندا تۇرعان گەننادي گولوۆكين جاڭارتىلعان رەيتينگتە توپ-10 بوكسشىنىڭ قاتارىنان شىعىپ قالدى. وعان سەبەپ – جەرلەسىمىزدىڭ ۇزاق ۋاقىت بويى جۇدىرىقتاسپاۋى. بۇل سالماقتا «كانەلو» جەكە-دارا كوش باستاپ تۇر. 33 جاستاعى گۆادالاحارانىڭ تۋماسى كاسىپقوي بوكستى سەرىك ەتكەن 18 جىل ارالىعىندا 63 كەزدەسۋ وتكىزىپ, 59 مارتە جەڭىسكە جەتتى. 39 قارسىلاسىن نوكاۋتقا جىبەردى. ەكى باسەكەدە ۇتىلىپ, تاعى ەكى رەت تەڭ ەسەپ تىركەلدى. ەكىنشى ورىندا – داۆيد بەناۆيدەس. 26 جاستاعى اقش-تىڭ ازاماتى 27 جەكپە-جەكتىڭ بىردە-بىرەۋىندە ۇتىلعان جوق. ول 23 ايقاستا ايقىن باسىمدىق تانىتتى. ءۇشىنشى ساتىعا تاعى ءبىر مەكسيكالىق بوكسشى حايمە مۋنگيا جايعاستى. 26 جاستاعى تيحۋانىڭ تۋماسى 42 كەزدەسۋدىڭ بارلىعىن ءوز پايداسىنا شەشىپ, 33 باسەكەنى مەرزىمىنەن بۇرىن اياقتادى.
توپ-10 بوكسشىنىڭ قاتارىندا كريستيان مبيللي (فرانتسيا), داۆيد موررەل (كۋبا), كەيلەب پلەنت (اقش), دجون رايدەر ( ۇلىبريتانيا), دەمەتريۋس اندرادە (اقش), لەرروۋن ريچاردس ( ۇلىبريتانيا) جانە كارلوس گونگورا (ەكۆادور) سىندى جۋان جۇدىرىقتى جىگىتتەر بار.