ۇلىبريتانيانىڭ تانىمال كاسىپقوي بوكسشىسى كريس يۋبەنك ەلىمىزدىڭ ماقتانىشى گەننادي گولوۆكيندى جەكپە-جەككە شاقىردى. الەۋمەتتىك جەلى ارقىلى ول GGG-گە «مەن گەنامەن بۇرىننان بەرى جۇدىرىقتاسقىم كەلىپ جۇرگەن. بىراق رەتى ءبىر كەلمەدى. ەندى ءبىزدىڭ بەتپە-بەت كەلۋىمىزگە ەش كەدەرگى جوق دەپ ويلايمىن. ەگەر گولوۆكين قارجىلىق جاعدايىن جاقسارتقىسى كەلسە, مەنىمەن كۇش سىناسسىن. سوندا ول ماتەريالدىق تۇرعىدان ۇلدە مەن بۇلدەگە ورانادى» دەگەن جازبا قالدىردى.
كريس يۋبەنك كۇنى كەشە 34 جاسقا تولدى. ونىڭ شىققان تەگى – يامايكالىق. ۇلىبريتانيانىڭ شىعىس سۋسسەكس وڭىرىندە دۇنيەگە كەلگەن كريستىڭ وزىمەن اتتاس اكەسى دە كەزىندە وسى سپورت ءتۇرىن سەرىك ەتىپ, 1990-1995 جىلدار ارالىعىندا ورتا سالماق پەن ەكىنشى ورتا سالماقتا الەم چەمپيونى اتاندى. ۇلكەن سپورتتان قول ۇزگەننەن كەيىن ول ۇلىن بوكسقا ماشىقتاندىرىپ, ونىڭ بيىك بەلەستەردەن كورىنۋىنە سۇبەلى ۇلەس قوستى.
كريس يۋبەنك ءوزىنىڭ تۇساۋكەسەر كەزدەسۋىن 2011 جىلدىڭ قوڭىر كۇزىندە وتكىزدى. سول كەزدەن بەرى 36 مارتە شارشى الاڭعا شىعىپ, 33 رەت جەڭىسكە جەتتى. 24 باسەكەدە ايقىن باسىمدىق تانىتتى. كەزىندە WBA (2015-16) نۇسقاسى بويىنشا ۋاقىتشا الەم چەمپيونى اتانىپ, IBO-نىڭ (2017-2018, 2019-2020) چەمپيوندىق بەلبەۋىن يەلەندى. جەكپە-جەكتەرىنىڭ دەنىن ۇلىبريتانيادا وتكىزگەن كريس دانيا, گەرمانيا, ساۋد ارابياسى جانە اقش-قا ءبىر-ءبىر رەتتەن ساپار شەكتى. ءار جىلدارى ول دميتري چۋدينوۆ, گەري و’سالليۆان, توم ديۋران, ارتۋر ابراحام, دجەيمس ديگەيل, ماتۆەي كوروبوۆ, ۆانيك اۆديان سىندى ساڭلاقتاردى سابادى.
يۋبەنك ءوزىنىڭ 19-كەزدەسۋىندە العاش رەت جەڭىلىستىڭ كەرمەك ءدامىن تاتتى. 2014 جىلدىڭ 29 قاراشاسىندا لوندوندا ول بيللي دجو سوندەرسكە ەسە جىبەردى. 2018 جىلدىڭ 17 اقپانىندا مانچەستەر قالاسىندا دجوردج گروۋۆزدان ۇتىلدى. ەكى رەتىندە دە شەشىمدى تورەشىلەر شىعاردى. بىلتىر 31 قاڭتاردا «مانچەستەر ارەنادا» ليام سميتتەن ءتورتىنشى راۋندتا تەحنيكالىق نوكاۋتپەن جەڭىلدى. بۇل بوكسشىلاردىڭ بارلىعى دا ۇلىبريتانيادان. ارادا جەتى ايدان اسا ۋاقىت وتكەن سوڭ قوس ساڭلاق ءدال سول ارەنادا قايتا قولعاپ ءتۇيىستىردى. بۇل جولى يۋبەنك ءسميتتى 10-راۋندتا سۇلاتىپ سالدى.
ال گەننادي گولوۆكيننىڭ ءجۇرىپ وتكەن جولى جانكۇيەرلەردىڭ كوز الدىندا. كاسىپقوي بوكستى سەرىك ەتكەن 17 جىل ۋاقىت ارالىعىندا ول كوپتەگەن بيىك بەلەستەردى باعىندىرىپ, چەمپيوندىق ءتاجدىڭ تالايىن يەلەندى. 45 جەكپە-جەكتىڭ 42-سىندە جەڭىس تويىن تويلادى. 37 قارسىلاسىن نوكاۋتپەن ۇتتى. GGG تەك مەكسيكانىڭ مارقاسقاسى ساۋل الۆارەستەن ەكى رەت ۇتىلىپ, ءبىر مارتە تەڭ ءتۇستى. گەنانىڭ سوڭعى رەت رينگكە شىققانىنا تۋرا ءبىر جىل بولدى. سوعان قاراعاندا داڭقتى وتانداسىمىز بىلعارى قولعابىن شەگەگە ىلۋگە قامدانىپ جۇرگەن سەكىلدى.
كوبىنە-كوپ گەرمانيا مەن اقش-تا جۇدىرىقتاسقان GGG قازاقستاندا ءبىر رەت قانا ونەر كورسەتتى. سوناۋ 2010 جىلدىڭ 16 جەلتوقسانىندا ول استاناداعى «داۋلەت» سپورت كەشەنىندە كولۋمبيالىق نيلسون حۋليو تاپيانى ءۇشىنشى راۋندتا ۇرىپ جىعىپ, جەرگىلىكتى جانكۇيەرلەردى ءبىر قۋانتقان ەدى. ەندى ءوزىنىڭ سوڭعى جەكپە-جەگىن گەننادي گولوۆكين قايتادان ءوز ەلىمىزدە وتكىزسە دەگەن تىلەگىمىز بار.