بولگاريانىڭ باس شاھارى – سوفيادا وتكەن دەۆيس كۋبوگىنىڭ پلەي-وفف سايىسىندا قازاقستاننىڭ تەننيسشىلەرى بولگاريا قۇراماسىن 3:1 ەسەبىمەن ۇتىپ, 2024 جىلدىڭ اقپان ايىندا وتەتىن ىرىكتەۋ ءتۋرنيرىنىڭ فينالىندا كۇش سىناسۋ قۇرمەتىنە يە بولدى.
بيىلعى دەۆيس كۋبوگىنە بولگاريانىڭ باستى جۇلدىزى, ءار جىلدارى ۋيمبلدون جانە اقش پەن اۋستراليانىڭ اشىق بىرىنشىلىكتەرىندە جارتىلاي فينالعا دەيىن جەتىپ, اتر تۋرنيرلەرىندە سەگىز رەت دارا شىققان گريگور ديميتروۆ قاتىسقان جوق. بۇل جاعداي ءبىز ءۇشىن قولايلى بولدى. اتالعان مەملەكەتتىڭ وزگە ويىنشىلارى اسا مىقتى ەمەس ەدى. تۇساۋكەسەر باسەكەدە تيموفەي سكاتوۆ (الەمنىڭ 121 راكەتكاسى) ديميتار كۋزمانوۆپەن (№178) ءبىراز تىرەستى. العاشقى سەتتە بولگاريالىقتىڭ مىسى باسىم بولسا, قالعان ەكەۋىندە جەرلەسىمىزدىڭ اسىعى الىشىسىنان ءتۇستى. 2 ساعات 46 مينۋتقا سوزىلعان تارتىس 3:6, 6:4, 6:3 ەسەبىمەن سكاتوۆتىڭ پايداسىنا شەشىلدى.
كوپ كەشىكپەي الەكساندر بۋبليك (№29) پەن ياناكي ميلەۆ (№567) كورتقا شىقتى. ەلىمىزدىڭ ءبىرىنشى راكەتكاسى الەمدىك رەيتينگتە وزىنەن الدەقايدا تومەن تۇرعان قارسىلاسىن ەش قينالماي ۇتتى. ەسەپ – 6:4, 6:1. بۇل باسەكە 1 ساعات 7 مينۋتتا ءتامامدالدى.
كەلەسى كۇنى جۇپتىق باسەكەدە الەكساندر بۋبليك پەن الەكساندر نەدوۆەسوۆ الەكساندر دونسكوي مەن الەكساندر لازاروۆپەن كۇش سىناستى. بۇل ويىندا بولگاريالىقتاردىڭ باعى جاندى – 6:3, 6:3. ءتوتىنشى كەزدەسۋدە بۋبليك كۋزمانوۆتى 6:4, 7:6 ەسەبىمەن قاپى قالدىرىپ, قازاقستان قۇراماسىنا جەڭىس سىيلادى. قورىتىندى ەسەپ – 3:1.
سونداي-اق وتاندىق تەننيسشىلەرىمىزگە قاتىستى تاعى ەكى جاعىمدى جاڭالىعىمىز بار. ارۋجان ساعىندىقوۆا ءتۋنيستىڭ موناستير قالاسىندا وتكەن تۋرنيردە باس جۇلدەنى ولجالادى. العاشقى اينالىمداردا 18 جاستاعى ارۋجان ۇندىستاندىق سمريتي ءبحاسيندى, دانيالىق ەلينا ءيامشيديدى سلوۆاكيالىق لاۋرا تسيلەكوۆانى ۇتسا, جارتىلاي فينالدا ليتۆالىق اندرە لۋكوشيۋتەنى ءسۇرىندىردى. شەشۋشى تۇستا اۋرجان ءۇندىستاننىڭ تاعى ءبىر وكىلى ۆايشناۆي ادكاردان ايلاسىن اسىردى.
ال رەسەيلىك اننا كالينينامەن جۇپ قۇرعان قازاقستاننىڭ ەكىنشى راكەتكاسى يۋليا پۋتينتسەۆا جاپونيانىڭ وساكا قالاسىندا شىمىلدىعى تۇرىلگەن حالىقارالىق ءتۋرنيردىڭ فينالىنا دەيىن جەتتى. بىراق ولارعا باس جۇلدەنى ولجالاۋ باقىتى بۇيىرمادى. شەشۋشى تۇستا اتالعان تەننيسشىلەر اننا-لەنا فريدزام (گەرمانيا) مەن نادەجدا كيچەنوككە (ۋكراينا) 6:7, 3:6 ەسەبىمەن ەسە جىبەردى. سونداي-اق پۋتينتسەۆا جەكەلەگەن سايىستا دا ونەر كورسەتىپ, شيرەك فينالدا قىتايلىق ۆان سينيۋيگە جول بەردى – 6:7, 7:6, 3:6.