قازاق ۇلتتىق اگرارلىق زەرتتەۋ ۋنيۆەرسيتەتىندە اعاش, پلاستيك ماتەريالدارىنان وقۋ ورنىنا قاجەتتى بۇيىمدار جاسايتىن شەبەرحانا, ءىس تىگەتىن ماشينالارمەن جابدىقتالعان تىگىن تسەحى جانە كىر جۋاتىن بولمە ىسكە قوسىلدى. سونىمەن قاتار ارزان باعامەن ازىق-ت ۇلىك ساتاتىن الەۋمەتتىك دۇكەن مەن ءدارىحانا پايدالانۋعا بەرىلەدى.
ۋنيۆەرسيتەت بازاسىندا ىشكى قاجەتتىلىكتەردى وتەۋ ماقساتىندا بۇگىندە الەمنىڭ كوپتەگەن ۋنيۆەرسيتەتىندە ىسكە اسىپ كەلە جاتقان ستۋدەنتتەرگە قىزمەت كورسەتەتىن ورىنداردىڭ اشىلۋى باعا جاعىنان دا, ۋاقىت ۇنەمدەۋ تۇرعىسىنان دا ءتيىمدى بولماق.
ۋنيۆەرسيتەت اۋماعىندا 1978 جىلى جابىق سپورتزال رەتىندە تۇرعىزىلعان ەكى قاباتتى عيمارات ۇزاق جىل بويى جەكەمەنشىككە جالعا بەرىلىپ, كەيىننەن قويما رەتىندە پايدالانىلىپ كەلگەن-ءدى. ءبىلىم ورداسىنىڭ ينفراقۇرىلىمدى دامىتۋ جانە الەۋمەتتىك ماسەلەلەر جونىندەگى ورىنباسارى قۋات سۇلتانعازيەۆتىڭ ايتۋىنشا, توزىعى جەتىپ توبەسىنەن سۋ اققان, ەسىك-تەرەزەلەرى ب ۇلىنگەن, جىلۋ جۇيەسى ىستەن شىققان بۇل عيمارات جاڭا باسشىلىقتىڭ تاپسىرماسىمەن بيىل تولىق جوندەۋدەن ءوتتى. سونىمەن قاتار تسەح ىشىنە ءارتۇرلى ۇلگى مەن ماتەريالدى دايىنداۋ, وڭدەۋ, فورمالاۋ جانە قۇراستىرۋ ۇدەرىستەرىن ۇزدىكسىز جۇرگىزەتىن شەتەلدىك ارنايى ستانوكتار ورناتىلدى.
– ەندى ۋنيۆەرسيتەتتىڭ وقۋ كورپۋستارى مەن جاتاقحانالارىنا ارنالعان وفيستىك جيھازدار, ەسىك-تەرەزەلەر مەن پارتالار, اۋديتوريالارداعى ديزايندىك پلاستيك ورنەكتەر, گۇلزار باقتارداعى ورىندىقتار, اسحانالارداعى ۇستەلدەر, باسقا دا كۇندەلىكتى تۇتىناتىن ماتەريالدار وزىمىزدە جاسالادى. ءبىز وسى سالادا ۇلكەن تاجىريبەسى بار شەبەر ماماندارمەن بىرلەسىپ, سەرىكتەستىك نەگىزدە جۇمىس ىستەيمىز. بۇعان قوسا تىگىن تسەحى كۇردەلى جوندەۋدەن ءوتىپ, جاقىندا ىسكە قوسىلدى. ناتيجەسىندە, بارلىق جاتاقحاناداعى توسەكتىك ورىن جابدىقتارى, ماتراستار مەن جامىلعىلار, تەرەزە پەردەلەرى تولىقتاي جاڭارتىلدى. مۇنىڭ بارلىعى ۋنيۆەرسيتەتىمىزدىڭ قازىرگى جانە بولاشاقتاعى ينفراقۇرىلىمدىق دامۋىنا ىقپال ەتەدى. ونىڭ ءبارى ستۋدەنتتەردىڭ يگىلىگىنە ارنالعان, – دەيدى ق.سۇلتانعازيەۆ.
قازىرگى كەزدە وقۋ-زەرتحانالىق كورپۋستار مەن جاتاقحانالاردىڭ اينالاسى اباتتاندىرىلىپ, «التىن ءدان» ستۋدەنتتەر اسحاناسى قايتا جاڭعىرتىلدى. سونىمەن قاتار بيىل 8 وقۋ كورپۋسىنا جانە 7 ستۋدەنتتىك جاتاقحاناعا اعىمدىق جانە ەكى جاتاقحانانىڭ شاتىرىنا كۇردەلى جوندەۋ جاسالدى. ورتالىق ستاديون مەن ۆەتەرينارلىق كلينيكاعا قاتىستى قۇرىلىس جۇمىستارى اياقتالۋعا جاقىن. كەيىنگى ون جىلدا العاش رەت قولعا الىنعان مۇنداي اۋقىمدى جۇمىستار ستۋدەنتتەردىڭ ساپالى ءبىلىم الۋىنا, سپورتپەن اينالىسۋىنا, بوس ۋاقىتتارىن ءتيىمدى وتكىزۋىمەن قاتار قوسىمشا جۇمىس ورىندارىنىڭ اشىلۋىنا ىقپال ەتەدى.
الماتى