ۇلتتىق جانە ات سپورتى تۇرلەرى ورتالىعى ديرەكتورى باقداۋلەت ءسابيتوۆ اتالعان فەستيۆال ناتيجەسىندە ۇزدىك ءۇش ءوڭىر انىقتالاتىنىن حابارلادى, دەپ جازادى Egemen.kz ورتالىق كوممۋنيكاتسيالار قىزمەتى سايتىنا سىلتەمە جاساپ.
فەستيۆال 4-10 قىركۇيەك ارالىعىندا وتەدى. بۇگىن دودانىڭ العاشقى جارىسى – كوكپار ويىندارى باستالىپ تا كەتتى.
قر ۇلتتىق سپورت تۇرلەرىنىڭ فەستيۆالى بيىل التىنشى رەت ءوتىپ جاتىر. اتالعان ءىس-شارانى ءبىر جاعىنان 2024 جىلى استانادا وتەتىن V دۇنيەجۇزىلىك كوشپەندىلەر ويىنىنىڭ الدىنداعى دايىندىق دەسە دە بولادى.
اسىق اتۋ, اۋدارىسپاق, بايگە, ءداستۇرلى ساداق اتۋ, جامبى اتۋ, جەكپە-جەك, كوكپار, قازاق كۇرەسى, قۇسبەگىلىك, تەڭگە ءىلۋ, توعىزقۇمالاق سياقتى 11 ۇلتتىق سپورت تۇرىنەن 17 وبلىستان, 7 قالادان باس-اياعى 1362 سپورتشى تىركەلگەن. ودان بولەك, 500-گە تارتا سالا ماماندارى بار.
«بۇل سىن سپورتشىلاردىڭ عانا ەمەس, ەلىمىزدىڭ بارلىق وڭىرلەرى ءوزارا باق سىناساتىن الاڭ. ياعني, فەستيۆال ناتيجەسىندە ەلىمىزدەگى ۇلتتىق سپورتتى جوعارى دەڭگەيدە دامىتىپ وتىرعان ۇزدىك ءۇش ءوڭىردى انىقتايتىن بولامىز», دەپ ناقتىلادى سپيكەر.
ونىڭ ايتۋىنشا, فەستيۆال باعدارلاماسىنداعى بارلىق ورىندار باللدىق جۇيەمەن ەسەپتەلىپ, ءبىرىنشى ورىننان جيىرماسىنشى ورىنعا دەيىن بارلىق ايماقتاردىڭ دەڭگەيى انىقتالماق.
«كەزىندە فەستيۆال باعدارلاماسىندا قىز قۋ دەگەن ونەرىمىز دە بولعان. وكىنىشكە قاراي, سوڭعى كەزدەرى ءبىز ونى سپورت تۇرىنەن الىپ, ويىن تۇرىنە قوسىپ وتىرمىز», دەدى ب. ءسابيتوۆ.
ال وتكەن جىلى ۇلتتىق سپورت تۇرىنە ءداستۇرلى ساداق اتۋ ەنگىزىلگەن.
سونداي-اق ۇلتتىق جانە ات سپورتى تۇرلەرى ورتالىعىنىڭ باسشىسى فەستيۆالگە وبلىستاردىڭ قاتىسۋ دەڭگەيىنە توقتالىپ ءوتتى. جاڭادان قۇرىلعان ۇلىتاۋ جانە اباي وبلىستارىنان قاتىسۋشىلار ءتورت سپورت تۇرىنەن عانا كەلسە, الماتى قالاسى مەن اقتوبە وبلىسىنان 6 سپورت تۇرىنەن عانا كەلىپ وتىر. دەگەنمەن, ب.ءسابيتوۆ ۇلتتىق سپورت تۇرلەرىنىڭ دامۋى قازىرگى كەزدە بىركەلكى سيپات الىپ كەلە جاتقانىن ايتتى. ياعني, ەلىمىزدىڭ تەك قانا وڭتۇستىگى ەمەس, سولتۇستىگى, شىعىسى مەن باتىسىنىڭ بارىندە ءبىر دەڭگەيدە مۇمكىندىك بار.
ب.ءسابيتوۆ جانكۇيەر بولۋ ارقىلى ادامدار ۇلتتىق سپورتتىڭ دامۋىنا ۇلەس قوسا الاتىنىن اتاپ ءوتتى.
«ۇلتتىق سپورت جانكۇيەرلەرىن بۇگىننەن باستاپ 10 قىركۇيەككە دەيىن قازانات يپپودرومىندا, جاقسىلىق ۇشكەمپىروۆ اتىنداعى جەكپە-جەك سارايىندا, «قازاقستان» جەڭىل اتلەتيكا مانەجىندە, سونداي-اق «اسپان» سپورت كەشەنىندە كۇتەمىز», دەپ تۇيىندەدى ول.