الماتى قالاسىن دامىتۋدىڭ 2025 جىلعا دەيىنگى باعدارلاماسىن ىسكە اسىرۋ جونىندەگى جول كارتاسى جانە 2030 جىلعا دەيىنگى ورتا مەرزىمدى پەرسپەكتيۆالاردى ورىنداۋ شەڭبەرىندە ءبىلىم باسقارماسىنىڭ قالالىق ءبىلىم بەرۋدەگى جاڭا تەحنولوگيالاردىڭ عىلىمي-ادىستەمەلىك ورتالىعى جانىنان مەكتەپكە دەيىنگى رەسۋرستىق ورتالىق قۇرىلعان بولاتىن. ورتالىق ماماندارى بالاباقشا تاربيەشىلەرىن ادىستەمەلىك تۇرعىدان سۇيەمەلدەي وتىرىپ, بۇگىنگى تاڭدا بالا تاربيەسىنە قاتىستى تۋىنداعان كوكەيكەستى ماسەلەلەرگە وراي كەڭەس بەرەتىن بولادى.
بۇگىندە قالاداعى 919 مەكتەپكە دەيىنگى تاربيە ۇيىمدارىندا 79 600 بالا ءبىلىم الىپ جاتىر. ولاردىڭ 194-ءى مەملەكەتتىك بولسا, 725-ءى جەكەمەنشىك بالاباقشالار ساناتىندا.
الماتى قالالىق ءبىلىم باسقارماسىنىڭ دەرەگىنە سۇيەنسەك, شاھاردا بالاباقشا كەزەگىندەگى 3 جاستان 6 جاسقا دەيىنگى بالالار سانى 18 118-گە تەڭ. وسى ماسەلەنى شەشۋ ءۇشىن جەرگىلىكتى بيۋدجەتتەن قارجى قاراستىرىلىپ, 6 255 ورىندىق 80-گە جۋىق بالاباقشا اشۋ جوسپارلانىپ وتىر. ونىڭ 75-ءى جەكەمەنشىك بالاباقشا بولسا, قابىلداناتىن بالالار سانى 5 395-ءتى قۇرايدى. ال 4 مەملەكەتتىك بالاباقشاعا 860 بالانى ورنالاستىرۋ كوزدەلگەن. بۇگىندە قالا بويىنشا 2 630 ورىنعا ارنالعان 47 بالاباقشا اشىلعان, ونىڭ 1-ءى 300 ورىنعا ارنالعان مەملەكەتتىك, ال 46-سى جەكەمەنشىك بالاباقشا تىزىمىنە كىرەدى.
سونىمەن قاتار بيىل جەكەمەنشىك بالاباقشالارعا جەرگىلىكتى بيۋدجەت ەسەبىنەن مەملەكەتتىك تاپسىرىس بويىنشا 5 مىڭ ورىنعا قارجى بولىنگەن. جەكەمەنشىك بالاباقشالاردا مەملەكەتتىك تاپسىرىس بويىنشا 3 801 بالا قامتىلسا, مەملەكەتتىك ءبىلىم بەرۋ تاپسىرىسىنا سايكەس 635 جەكەمەنشىك مەكتەپكە دەيىنگى ۇيىمدا 40 995 بالانى قامتىپ وتىر.
وسى شارالاردىڭ ناتيجەسىندە 3 جاستان 6 جاسقا دەيىنگى بالالاردى مەكتەپكە دەيىنگى تاربيە جانە بىلىممەن قامتۋ 93,5 پايىزدى قۇراپ, جىلدىڭ سوڭىنا دەيىن بۇل كورسەتكىشتى 95 پايىزعا جەتكىزۋ كوزدەلگەن. جاڭا وقۋ جىلىنان باستاپ مەملەكەتتىك مەكتەپكە دەيىنگى ۇيىمداردا حالىقتىڭ الەۋمەتتىك وسال توپتارىنىڭ وتباسىلارىنان شىققان 5 مىڭنان استام بالا تەگىن تاماقپەن قامتاماسىز ەتىلەتىن بولادى. قالاداعى ورىن تاپشىلىعىن شەشۋ ءۇشىن اكىمدىك ءىرى قۇرىلىس كومپانيالارىمەن الەۋمەتتىك ارىپتەستىكتى دامىتىپ, كەلەر جىلعا قاراي 2100 بالاعا ارنالعان 11 بالاباقشا اشۋ جوسپارلانعان.
الماتى