الەمدە ۋرانعا دەگەن سۇرانىس جوعارى. ۋراننىڭ قورى بويىنشا قازاقستان الدىڭعى قاتاردا ورنالاسقان. جىل سايىن ەلىمىزدە 20 مىڭ توننادان استام ۋران وندىرىلەدى. ياعني الەمدىك ءوندىرىستىڭ 40 پايىزعا جۋىعى ءبىزدىڭ ەلگە تيەسىلى. سوندىقتان بۇل باعىتتى بارىنشا دامىتۋ ماڭىزدى.
وسى ورايدا Satbayev University عالىمدارى ۇڭعىمالىق دەرەكتەر بويىنشا قاباتتىڭ ۇڭعىماارالىق ليتولوگياسىن جانە ونىڭ ءسۇزۋ قاسيەتتەرىن قالپىنا كەلتىرۋگە, قاباتتاعى گيدروديناميكانى انىقتاۋعا جانە قاباتتاعى حيميالىق جانە ماسسا الماسۋ ۇدەرىستەرىن ەسەپتەۋگە مۇمكىندىك بەرەتىن 3D كومپيۋتەرلىك باعدارلامالارىن ازىرلەدى. بۇل باعدارلامالار زاماناۋي ادىستەرمەن وندىرىسكە جۇتاڭ كەندەردى تارتۋ ارقىلى رەسۋرستىق بازانى كەڭەيتۋ جانە حالىقارالىق نارىقتا ءونىمنىڭ باسەكەگە قابىلەتتىلىگىن قامتاماسىز ەتۋ تۇرعىسىنان ماڭىزدى.
مامانداردىڭ ۋراندى ۇڭعىمالىق جەراستى حيميالىق شايۋ ادىسىمەن ءوندىرۋدىڭ گەولوگيالىق, گيدروديناميكالىق جانە ماسسا الماسۋ كەزەڭدەرىنىڭ ماتەماتيكالىق مودەلدەرىن ازىرلەۋدەگى جانە جاساۋداعى تاجىريبەسى زور. دەرەكتەرگە سۇيەنسەك, جەراستى ۇڭعىمالىق شايۋ ادىسىمەن يگەرۋگە جارامدى الەمدىك بارلانعان ۋران قورىنىڭ 65 پايىزدان استامى قازاقستان اۋماعىندا ورنالاسقان.
ۋران ءوندىرۋ تەحنولوگياسىنىڭ وتاندىق عالىمدار ۇسىنعان يميتاتسيالىق مودەلى «قازاتومونەركاسىپ» ۇلتتىق اتوم كومپانياسىنىڭ بولىمشەلەرىندە تولىق كولەمدە قولدانىلىپ كەلەدى. الەمدىك نارىقتا مۇنداي باعدارلامالىق قامتاماسىز ەتۋ ازىرگە جوق. ونىڭ ۇستىنە باكتەريالىق سىلتىسىزدەندىرۋ ادىسىمەن التىن, مىس جانە تاعى دا باسقا مەتالداردى وندىرەتىن كاسىپورىنداردا دا يميتاتسيالىق مودەلدى پايدالانۋعا مۇمكىندىك بار.
جۇرگىزىلگەن عىلىمي زەرتتەۋ بارىسىندا كەن ورنىن يگەرۋدى جوسپارلاۋعا جانە ءوندىرۋدى بولجاۋعا, ءوندىرۋ ۇدەرىسىن باسقارۋعا جانە وڭتايلاندىرۋعا, باكتەريالاردى پايدالانباي ءداستۇرلى سىلتىسىزدەندىرۋ ارقىلى وندىرۋگە ءتيىمسىز كەندەردى وندىرىسكە تارتۋ جولدارىن ايقىنداۋعا مۇمكىندىك بەرەتىن ماتەماتيكالىق نەگىزدەر سالىنىپ, باكتەريالىق سىلتىسىزدەندىرۋ ادىسىمەن ۋران ءوندىرۋ ۇدەرىسىنىڭ يميتاتسيالىق مودەلى ازىرلەندى. جوبانىڭ جاڭاشىلدىعىنا كەلەر بولساق, 3D تالداۋ ارقىلى ۇدەرىستىڭ دامۋىن بولجاۋعا جانە ءوندىرۋدىڭ بارلىق ساتىسىن باقىلاۋعا مۇمكىندىك بەرەتىن ۋراندى جەراستى باكتەريالىق شايۋ ادىسىمەن ءوندىرۋ تەحنولوگياسىنىڭ ماتەماتيكالىق جانە يميتاتسيالىق (تسيفرلىق) مودەلدەرىن ازىرلەۋ كومەگىمەن باكتەريالىق شايمالاۋ تەحنولوگياسىن قولدانۋعا ارنالعان عىلىمي نەگىز قۇرىلعان.
عىلىمي زەرتتەۋ جۇمىستارىنا كوماندامەن جۇمىس ىستەۋدى, قۇجاتتامانى دايىنداپ, پايدالانۋ جولدارىن ۇيرەتۋ ماقساتىندا ماگيستراتۋرا مەن دوكتورانتۋرا ستۋدەنتتەرى دە تارتىلعانىن ەسكە سالا كەتەيىك.