سۋ تاپشىلىعى استانا جۇرتىن ءبىرازدان الاڭداتىپ كەلەدى. بۇل ماسەلە ەلوردامىزدا عانا ەمەس وزگە ايماقتاردا دا بار. جالپى بۇل – ءححى عاسىردىڭ ەڭ وزەكتى ماسەلەلەرىنىڭ ءبىرى. پرەزيدەنت تۇرعىندارعا كۇندەلىكتى قولدانىستا سۋدى ۇنەمدەۋ كەرەك دەگەن بولاتىن. عالىمدار دا اۋىل شارۋاشىلىعى سالاسى تامشىلاتىپ سۋارۋ جۇيەسىنە تولىق كوشۋ كەرەك دەپ دابىل قاعىپ جاتىر.
سۋ تاپشىلىعى ماسەلەسى جىل وتكەن سايىن كۇردەلەنە تۇسپەسە, شەشىلە قويۋى ەكىتالاي. ويتكەنى قالا دامىپ, ادام كوبەيگەن سايىن قاجەتتىلىك تە ارتا بەرەدى. ازىرگە امالداي تۇراتىن جالعىز جول – سۋدى ۇنەمدەۋ. «سۋدىڭ دا سۇراۋى بار» دەگەندى ابدەن تۇسىنەتىن كەز جەتكەن سياقتى. پرەزيدەنت قاسىم-جومارت توقاەۆ تا «2030 جىلعا قاراي سۋ تاپشىلىعىنىڭ كولەمى 40 پايىزعا جەتۋى مۇمكىن. سوندىقتان ءبىز جاڭا تەحنولوگيالار مەن تسيفرلاندىرۋ ارقىلى سۋدى ۇنەمدەۋگە كوشۋىمىز كەرەك. سۋ تاپشىلىعىن جويۋدىڭ باسقا جولى جوق. بۇل – اسا ماڭىزدى مىندەت. ۇكىمەت سۋ پايدالانۋدى رەتتەۋ جانە ونى ۇنەمدەۋ تەحنولوگياسىن ەنگىزۋ جۇمىسىن ىنتالاندىرۋ ءۇشىن ناقتى شەشىمدەر ازىرلەۋگە ءتيىس», دەپ تاپسىرما بەرگەن. ال بۇۇ مالىمەتىنشە, ەلىمىز 2040 جىلعا قاراي اۋىز سۋ تاپشىلىعى قاۋپى وتە جوعارى 44 ەلدىڭ قاتارىنا كىرەدى. دەمەك قاي سالادا بولسىن سۋدى ۇنەمدەۋدى قازىردەن باستاۋ كەرەك. اسىرەسە ەلىمىز ءۇشىن اسا ماڭىزدى اۋىل شارۋاشىلىعى سالاسىندا عالىمدارىمىز ۇسىنىپ وتىرعان تامشىلاتىپ سۋارۋ ادىسىنە كوشۋدى كەش قالماي قولعا العان ءجون.
اۋىل شارۋاشىلىعى عىلىمدارىنىڭ دوكتورى, پروفەسسور جۇماعالي وسپانباەۆتىڭ ايتۋىنشا, سۋ تاپشى بولسا, ەگىنشىلەردىڭ ەككەن ەگىنى شىعىنعا ۇشىرايدى. سوندىقتان اۋىل شارۋاشىلىعى سالاسىندا سۋدى كول-كوسىر قولدانۋدى قويىپ, مەملەكەت باسشىسى ايتقانداي, عىلىمي جەتىستىكتەردى پايدالانىپ, جاڭا تەحنولوگيالار مەن تسيفرلاندىرۋ ارقىلى ۇنەمدەۋدى قولعا الۋ قاجەت.
ۇلتتىق ستاتيستيكا بيۋروسىنىڭ دەرەگى بويىنشا, اۋىل شارۋاشىلىعى داقىلدارى 23 162,1 گەكتار ەگىستىككە ەگىلەدى. ال ەگىلگەن ەگىننىڭ ءبارى بىتىك شىعۋى ءۇشىن سۋ قاجەت. قازىرگى كەزدە شارۋالاردىڭ قاۋىپ ەتەرى دە – قۋاڭشىلىق.
– قازاق ەگىنشىلىك جانە وسىمدىك شارۋاشىلىعى عىلىمي-زەرتتەۋ ينستيتۋتىنىڭ عىلىمي توبى وسى ماسەلەنىڭ شەشىمى رەتىندە ەلىمىزدىڭ وڭتۇستىك-شىعىسىنداعى نەگىزگى سۋارمالى داقىلداردى – كۇزدىك بيداي, قانت قىزىلشاسى, سويا جانە جۇگەرىنى ءوسىرۋ تەحنولوگيالارىن ازىرلەۋ جونىندەگى جوبانى ىسكە اسىردى. جوبا تامشىلاتىپ سۋارۋ نەگىزىندە سۋارمالى ەگىنشىلىكتىڭ ونىمدىلىگىن ارتتىرۋعا باعىتتالعان. ناتيجەسىندە, سۋارمالى ەگىستىكتەگى ءونىم شىعىمى ەداۋىر ارتادى. الىنعان ناتيجەلەر توپىراقتىڭ قۇنارلىلىعىن ساقتاۋ مەن مولىقتىرۋدى قامتاماسىز ەتەدى. سونداي-اق سۋارمالى ەگىنشىلىكتىڭ جاڭا جۇيەسىن ازىرلەۋ ءۇشىن نەگىز بولا الادى, – دەيدى جوبا جەتەكشىسى ج.وسپانباەۆ.