ادامزات رەۆوليۋتسياسىن بەلگىلەگەن ۇيالى تەلەفون قوڭىراۋى

Motorola DynaTAC 8000X - الەمدەگى العاشقى كوممەرتسيالىق ۇيالى تەلەفون. ونىڭ سالماعى ءبىر كيلوگرامعا جۋىق بولدى. 30 مينۋت سويلەسۋ ءۇشىن 10 ساعات قۋاتتاۋدى قاجەت ەتكەن دەسەدى. ونەرتاپقىش مارتين كۋپەر 1973 جىلدىڭ 3 ساۋىرىندە باسەكەلەس زەرتتەۋشى دجوەل ەنگەلگە ادامزات تاريحىنداعى العاشقى تەلەفون قوڭىراۋىن جاساعان.

كۋپەر: «دجوەل, مەن ساعان ۇيالى تەلەفوننان قوڭىراۋ شالىپ جاتىرمىن. ءدال قازىر» دەدى. بىراق دجوەلدىڭ جاۋابى تەك ۇنسىزدىك بولدى.

كۋپەر ءوزىنىڭ ءبىر سۇحباتىندا ۇيالى تەلەفوندا ساندىق كامەرا نەمەسە ينتەرنەت سىندى مۇمكىندىكتەر بولاتىنىن بولجاماعان ەدى. دەسە دە, ونەرتاپقىش بولاشاقتا اركىمنىڭ ءوز ۇيالى تەلەفونى بولادى دەپ سەنگەن.

50 جىلدىڭ ىشىندە ۇيالى تەلەفون كوپ وزگەرىسكە ۇشىرادى. باستاپقىدا قالتاعا سالىپ جۇرۋگە ىڭعايلى تەلەفوندار پايدا بولدى. ولاردىڭ قۋاتتالۋ جولى دا الدەقايدا قاراپايىم بولعان. ۋاقىت وتە كەلە جينالمالى, جينالمايتىن, كامەراسى بار تەلەفوندار قولدانىسقا شىعا باستادى. ۇيالى تەلەفوننىڭ ۇلكەن, شاعىن, پەرنەتاقتاسى بار, جيەكسىز سان الۋان ءتۇرى بار, ونىڭ 92 پايىزىندا ينتەرنەت قولجەتىمدى.

بۇگىندە ۇيالى تەلەفوندى قولدانبايتىن ادامدارىڭ جوقتىڭ قاسى. ۆigital Global كومپانياسىنىڭ 2023 جىلعى قورىتىندى ەسەبىنە سايكەس, تەلەفون كۇنىنە بەس ساعات, ورتا ەسەپپەن پايدالانۋشىنىڭ 30% ۋاقىتىن الادى ەكەن. زاماناۋي گادجەتتى پايدالانۋ كولەمى جىلدان جىلعا ءوسىپ كەلەدى. ماسەلەن, 2023 جىلعى جاھاندىق تسيفرلىق جيىنتىق ەسەپكە سايكەس, تۇتاس الەمدە 5,44 ميلليارد ادام ءۇشىن تەلەفون قولجەتىمدى. وتكەن جىلى ءموبيلدى پايدالانۋشىلار سانى تاعى 3%-عا ارتتى, ال سوڭعى 12 ايدا 168 ميلليون جاڭا جەلى پايدالانۋشىسى تىركەلگەن.

بۇل ونەرتابىس ادامزاتتىڭ قارىم-قاتىناس ورناتۋ جولىندا جانە اقپاراتقا قول جەتكىزۋ ماقساتىندا جاساعان ۇلكەن قادامى دەسەك قاتەلەسپەيمىز. ۇيالى تەلەفوندى پايدالانۋ ارقىلى ءموبيلدى قوسىمشالار, ويىندار, ونلاين جارناما سىندى جاڭا سالالارعا جول اشىلدى. تەحنولوگيا دامىعان سايىن كۇندەلىكتى ومىردەگى ماسەلەلەردىڭ شەشىمى دە وڭتايلى تابىلىپ كەلەدى.  

كاريما جۇماعالي,

قورقىت اتا اتىنداعى قىزىلوردا ۋنيۆەرسيتەتىنىڭ ستۋدەنتى