قاراعاندىداعى نازارباەۆ زياتكەرلىك مەكتەبىنىڭ تۇلەگى اننا لازارەۆا Shanghai Jiao Tong University-گە (SJTU) ينجەنەرلىك كلاستەر باعدارلاماسى بويىنشا وقۋعا ءتۇستى. SJTU – قىتايداعى ەڭ كونە ءارى بەدەلدى جوعارى وقۋ ورىندارىنىڭ ءبىرى, سونداي-اق ەلدەگى ۇزدىك بەس جانە الەمدەگى توپ-100 ۋنيۆەرسيتەتتىڭ قاتارىندا.
– ماعان وقۋ مەن ساقتاندىرۋدى تولىق جانە تۇرعىن ءۇي اقىسىن ءىشىنارا وتەپ بەرەتىن ستيپەنديا ۇسىنىلدى. ساباقتار اعىلشىن تىلىندە وتەدى. الايدا قىتاي ءتىلىن مەڭگەرۋ – بارلىق ستۋدەنت ءۇشىن مىندەتتى. مەنىڭشە, تاعى ءبىر شەت ءتىلىن ءبىلۋ پايدا اكەلمەسە, زيان كەلتىرمەيدى, – دەيدى ول.
اننا SJTU-دە مەحانيكالىق ينجەنەريا سالاسىنا وقۋدى جوسپارلاپ وتىر. ۋنيۆەرسيتەتتىڭ باستى ارتىقشىلىعى – ستۋدەنتتەر ماماندىقتى ءبىرىنشى نەمەسە ەكىنشى كۋرستان كەيىن تاڭداۋ مۇمكىندىگىنە يە.
– زياتكەرلىك مەكتەپتە ءبىلىم الۋ ۇزدىك ۋنيۆەرسيتەتكە تۇسۋگە جول اشتى. 11-سىنىپتا FLEX باعدارلاماسى بويىنشا وقىپ, ءبىراز تاجىريبە جينادىم. سونداي-اق اتا-اناما دا ەرەكشە العىسىمدى بىلدىرەمىن. انام ماعان اعىلشىن ءتىلىن ۇيرەتسە, اكەم قيىندىققا مويىماي, ماقساتتارعا جەتۋگە تالپىنىس بەردى, – دەيدى قاراعاندىلىق زياتكەر.
شانحاي كولىك كوممۋنيكاتسيالار ۋنيۆەرسيتەتى (تسزياوتۋن) جوعارى ساپالى مامانداندىرىلعان ءبىلىمى بار بىلىكتى وقىتۋشىلىق قۇرامعا يە. جۇزدەن اسا تانىمال عىلىم قايراتكەرى, سونىڭ ىشىندە نوبەل سىيلىعىنىڭ ءۇش لاۋرەاتى ۋنيۆەرسيتەتتىڭ عىلىمي كەڭەسشىلەرى قىزمەتىن اتقارادى. بۇگىندە جوعارى وقۋ ورنىن اياقتاعان تۇلەكتەر سانى 100 مىڭنان استى, ولاردىڭ قاتارىندا قىتاي حالىق رەسپۋبليكاسىنىڭ بۇرىنعى توراعاسى تسزيان تسزەمين بار.
اننانىڭ وقۋعا ءتۇسۋى «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنىڭ وسى ۋنيۆەرسيتەتپەن SJTU Global Elite Program اياسىنداعى ىنتىماقتاستىقتىڭ ناتيجەسىندە جۇزەگە استى. باعدارلاما بويىنشا 20-دان استام تالاپكەر ءوتىنىش بىلدىرسە, اننا ءبىرىنشى دارەجەلى گرانت يەگەرى اتاندى.