12 جاستاعى جانەل ءالي يسپانيادا ءوتىپ جاتقان «La Voz Kids» (بالا داۋسى) بايقاۋىنىڭ فينالىنا ءوتتى. «La Voz Kids» – جەرگىلىكتى يسپان تەلەارناسىندا كورسەتىلەتىن بالالار بايقاۋى.
ۇلت مادەنيەتى – ادەبيەت پەن ونەرى ارقىلى تانىلادى. ماسەلەن, ديماش ارقىلى قازاقتى الەم تانىعانى داۋسىز. شەتەل ساحناسىندا ءان شىرقاپ قازاقستاننىڭ اتىن تانىتىپ جۇرگەن كىشكەنتاي تالانتتار دا بار. سونىڭ ءبىرى – يسپانيادا «La Voz Kids» بايقاۋىندا فينالعا شىققان جانەل ءالي.
قازاقستان اتىنان قاتىسقان ءانشى اۋەلى «كورمەي تىڭداۋ» كەزەڭىندە تورەشىلەردى تاڭعالدىرىپ, اتاقتى روساريو فلورەستىڭ (Rosario Flores) توبىنا قابىلداندى. ءبىرىنشى كەزەڭدە كريستينا اگيلەرانىڭ «Hurt» كومپوزيتسياسىن شىرقاعان جانەلدىڭ ورىنداۋ شەبەرلىگىنە جوعارى باعا بەرىلدى. ودان كەيىنگى «جەكپە-جەك» كەزەڭىندە ءۇش ءانشى بىرگە ءان شىرقاپ, كەلەسى اينالىمعا ءوتۋ ءۇشىن باق سىناسقان بولاتىن. ولار ۋيتني حيۋستوننىڭ «I have nothing» ءانىن ايتتى. جولداما جانەلگە بۇيىردى.
جارتىلاي فينالدا دا ءانشى ءساتتى ونەر كورسەتتى. جوبانىڭ شارتى بويىنشا اقتىق سىنعا تەك ەكى قاتىسۋشى وتە الادى. ءبىرىن جەتەكشى تاڭداسا, ءبىرىن زالدا وتىرعان كورەرمەن تاڭدايدى. تاعى دا كريستينا اگيلەرانىڭ ءانىن ورىنداعان جانەل كوپشىلىكتىڭ كوڭىلىنەن شىعىپ, كورەرمەن داۋسى بويىنشا فينالعا ءوتتى.
«ساحناعا شىققانشا قاتتى قوبالجىدىق. بىراق, كورەرمەن قىزىمدى وتە جىلى قابىلدادى. قولداپ جاتقانداردىڭ بارىنە العىس بىلدىرەمىن. ەندى جانەلدىڭ الدىندا اقتىق كەزەڭ تۇر. اپتا ىشىندە جاڭا ءاندى جاتتاپ, ناقىشىنا كەلتىرىپ ايتۋ ءۇشىن ابدەن دايىندالۋى كەرەك. ال جوبانىڭ جەڭىمپازى كەلەر اپتادا بەلگىلى بولادى. بىراق, ءبىز ءۇشىن كوپ قاتىسۋشىنىڭ ىشىنەن فينالعا دەيىن جەتۋدىڭ ءوزى – ۇلكەن جەڭىس», دەيدى اناسى گۇلشاحار باتىرشا.