قوستانايداعى تاتار-باشقۇرت ەتنومادەني بىرلەستىگىنىڭ وكىلدەرى ءداستۇرلى سابانتوي مەرەكەسىن اتاپ ءوتتى. ەجەلدەن جەر ىرىزدىعىن ەمگەن ديقاندار ناۋقان قارساڭىندا ەگىن بىتىك, ءونىم بەرەكەلى بولسىن دەگەن نيەتپەن تويلاپ كەلگەن ەڭبەك مەرەكەسى كەيىنگى جىلدارى مازمۇنىن كەڭەيتىپ, وسى وڭىردە تۇرىپ جاتقان سان الۋان ۇلتتىڭ ىرىس-ىنتىماعىن دارىپتەيتىن شىن مانىندەگى دوستىق مەرەكەسىنە اينالدى.
تويعا جينالعاندار توبىل جاعالاۋىنا تىگىلگەن اقشاڭقان كيىز ۇيلەر مەن بورەنەدەن ورىلگەن تاتاردىڭ اعاش ۇيىنەن ءدام تاتىپ, جەرگىلىكتى ونەرپازدار مەن اقتوبە وبلىسىنان, تاتارستاننان ارنايى كەلگەن ءانشى-بيشىلەردىڭ ونەرىن تاماشالادى.
– سابانتوي قوستاناي وڭىرىندە بۇرىننان تويلانىپ كەلەدى. سوندىقتان مۇنى تەك تاتاردىڭ نەمەسە باشقۇرتتىڭ عانا مەرەكەسى دەپ ايتا المايمىن. بۇل ءبىزدىڭ ءوڭىردىڭ تويى. مەرەكەگە قانشاما حالىق كەلىپ, كونتسەرت كورىپ, دەمالىپ, سپورت جارىستارىن تاماشالاپ جاتىر. تاتار مەن باشقۇرتتىڭ ۇلتتىق اسحاناسى اسا باي. تويعا جينالعان كوپشىلىك تاتاردىڭ قۋىرداق, چاك-چاك, وراماسىنان اۋىز ءتيىپ, قازاقتىڭ بال قىمىزىمەن ءشول باسىپ جاتىر. بۇل جاراسىمدى ەمەس پە, – دەيدى وبلىستىق تاتار-باشقۇرت ۇلتتىق مادەني ورتالىعىنىڭ توراعاسى رينات بەكتەمىروۆ.
مەرەكەدە اقتوبەدەن كەلگەن ء«ومىرزايا» حالىق ءانسامبلى, رۋدنىيداعى «بايرام» تاتار-باشقۇرت ءانسامبلى, تاتارستاننىڭ حالىق ءارتىسى, ءانشى-كومپوزيتور ليلليا مۋللاعاليەۆا ونەر كورسەتتى.
– جول شالعاي بولعان سوڭ, شارشاڭقىراپ جەتتىك. بىراق قوستاناي حالقىنىڭ ىستىق ىقىلاسى بويىمىزعا كۇش بەرىپ, شارشاعانىمىزدى ۇمىتىپ كەتتىك. رەپەرتۋارىمىزدا وتىزدان استام ءان بار, بۇگىن سونىڭ ەڭ تاڭداۋلىلارىن عانا ورىندايمىز. سابانتوي ءبىزدىڭ وڭىردە دە ءوتىپ تۇرادى. ءبىز دە كورشى ەلدىڭ شەكارالاس ايماقتارىنا بارىپ, كونتسەرت قويىپ, ونداعى از ساندى ۇلتتاردىڭ مادەنيەتىمەن تانىسىپ, تاجىريبە الماسىپ تۇرامىز, – دەيدى انسامبل مۇشەسى ءاسيا فايزوۆا.
مەرەكە الاڭىندا بالالارعا ارنالعان الۋان ءتۇرلى ويىندار مەن بايقاۋلار ۇيىمداستىرىلدى. ال قاريالار كيىز ءۇيدىڭ الدىنداعى تاپشانعا جايعاسىپ, تويدىڭ قىزىعىن شاي ءىشىپ وتىرىپ تاماشالادى.
قوستاناي وبلىسى