مەملەكەت باسشىسى قاسىم-جومارت توقاەۆ ەلىمىزدە جالعان اقپارات تاراتاتىن باسىلىمداردىڭ بار ەكەنىن, ونىڭ ارتىندا ىقپالدى ادامداردىڭ تۇرعانىن اتاپ ءوتتى, دەپ حابارلايدى Egemen.kz.
«قازىر باتىس ەلدەرىندە «انتي-ينفليۋەنسەر» دەگەن قوزعالىس بىرتە-بىرتە قالىپتاسىپ جاتىر. بۇل قوزعالىس ينتەرنەت باسىلىمدار ارقىلى ازاماتتارعا, جاستارعا تارايتىن بارلىق اقپاراتقا, دەرەكتەرگە, اسىرەسە, جالعان ماعلۇماتتارعا, ياعني, fake news-قا زور كۇمانمەن قارايدى, ياعني ادامداردىڭ ساناسىن جاۋلاپ جاتقان, ءتىپتى, ولارعا يمانداي سەنۋگە بولاتىن يدەولوگيا سەكىلدى قۇبىلىستاردى جوققا شىعارادى. ءبىزدىڭ ەلىمىزدە دە جالعان اقپارات تاراتاتىن باسىلىم-سىماقتار بار. بۇل – قۇپيا ەمەس. ولاردىڭ ارتىندا ناقتى قالتالى ادامدار, ءتىپتى, ىقپالدى ەلدەر بار», دەدى پرەزيدەنت.
مەملەكەت باسشىسى شەتەلدىك تاجىربيەگە نازار اۋدارۋدىڭ ماڭىزىن ايتتى.
«ال, جاڭا قوزعالىستىڭ نەگىزگى ماقساتى – ءداستۇرلى قۇندىلىقتاردى دارىپتەۋ, ەڭ الدىمەن, بۇل ادەبيەتتەگى, سونداي-اق اقپارات سالاسىنداعى ءداستۇردى ساقتاۋ. سوندىقتان, ءبىز دە الەمدە بولىپ جاتقان وسى جاڭا ۇردىسكە نازار اۋدارعانىمىز ءجون. بۇل ۇردىستەر بۇگىندە ءتۇرلى اقپاراتپەن يدەولوگيالىق تۇرعىدان ۋلانىپ جاتقان قوعامدى ساۋىقتىراتىن كۇشكە اينالۋى ابدەن مۇمكىن.
جالپى, وسىنداي ماڭىزدى ىستەرگە, سونىڭ ىشىندە كىتاپ شىعارۋ ىسىنە قازاقستان جازۋشىلار وداعى بەلسەنە اتسالىسۋى كەرەك. ءبىر اي بۇرىن ۇيىمنىڭ كەزەكتى قۇرىلتايى ءوتتى, جاڭا توراعا سايلاندى. بۇل – كورنەكتى قالامگەر مەرەكە ابدەش ۇلى قۇلكەنوۆ. جاقىندا مەن ونىمەن كەزدەستىم, قازاق ادەبيەتىنىڭ بولاشاعى, دامۋى تۋرالى اڭگىمە بولدى», دەدى قاسىم-جومارت توقاەۆ.