بىشكەكتە وتكەن قوجومقۇل قاباۋ ۇلى مەن راتبەك ساناتباەۆتى ەسكە الۋعا ارنالعان رەيتينگتىك ءتۋرنيردى ەلىمىزدىڭ گرەك-ريم كۇرەسى شەبەرلەرى بەس (1 التىن+1 كۇمىس+3 قولا) جانە ايەلدەر كۇرەسىنىڭ وكىلدەرى ءۇش (2+1+0) جۇلدەمەن قورىتىندىلاعانى جايىندا بۇعان دەيىن حابارلاعانبىز.
جارىستىڭ سوڭعى كۇندەرى ەركىن كۇرەس شەبەرلەرى بوزكىلەمگە شىعىپ, ەل نامىسىن 29 سپورتشى قورعادى. سەنبىدە 97 كيلو سالماقتا كۇش سىناسقان نۇرسۇلتان ازوۆ قولا مەدالدى موينىنا ىلسە, بەكزات ۇركىمباي (97 كيلو) بەسىنشى ورىندى قاناعات تۇتتى. سەرىك باقىتحانوۆ (97 كيلو) جۇبانىش سايىسىندا سۇرىنسە, ومار ەيۋبوۆ (125 كيلو) جانە يۋسۋپ باتىرمۇرزاەۆ (125 كيلو) العاشقى اينالىمنان اسا المادى.
جەكسەنبىدە تاعى سەگىز سالماق دارەجەلەرىنىڭ جۇلدەلەرى ساراپقا سالىندى. ءبىزدىڭ جانكۇيەرلەر 74 كيلوداعى بالۋانداردىڭ باسەكەسىن تاعاتسىزدانا كۇتتى. ويتكەنى ەل نامىسىن قورعاعان بالۋانداردىڭ بارلىعىنىڭ دا اتاعى الىسقا جايىلعان ەدى. ولار – نۇرقوجا قايپانوۆ, دانيار قايسانوۆ جانە دارحان ەسەنعالي. العاشقى ەكەۋى الەم چەمپيوناتتارىندا جۇلدە الىپ, ازيانىڭ ەكى دۇركىن چەمپيونى اتانعان اپايتوستەر. دارحان بيىل استانادا شىمىلدىعى تۇرىلگەن سارى قۇرلىقتىڭ باستى دوداسىندا قارسىلاس شاق كەلتىرمەدى. بىراق قايپانوۆ پەن قايسانوۆتىڭ ءداۋىرى وتكەن سەكىلدى. كەزىندە ەكەۋى ەلىشىلىك جارىستاردا الدارىنا جان سالماي, باس جۇلدەنى ءوزارا ساراپقا سالاتىن. كەيىنگى ۋاقىتتا ولاردى جالىندى جاستار ىعىستىرا باستادى. بىشكەكتەگى باسەكەنىڭ ەكىنشى كەزەڭىندە نۇرقوجا تاجىكستاندىق ماگومەد ەۆولوۆقا ەسە جىبەرسە, دانيار موڭعوليالىق سۋميابازار زانبانبۋدقا جول بەردى. ال دارحان ازەربايجاننىڭ وكىلى حادجيمۋرات گادجيەۆتەن جەڭىلدى. ءسويتىپ, بارلىعى دا ەلگە قۇرالاقان ورالدى.
جەرلەستەرىمىزگە بۇل جارىستا بەس جۇلدە بۇيىردى. بىراق بالۋانداردىڭ ەشقايسىسى التىن تۇعىرعا كوتەرىلە المادى. ەڭ ۇزدىك كورسەتكىشكە تالعات سىرباز قول جەتكىزدى. 70 كيلو سالماقتا سىنعا تۇسكەن ول گرۋزيالىق گەورگي ەلباكيدزە مەن قىرعىزستاندىق ەرنازار اكماتاليەۆتەن ايلاسىن اسىرعانىمەن, فينالدا تاعى ءبىر جەرگىلىكتى سپورتشى وروزبەك توكتومامبەتوۆتەن ءبىر عانا ۇپاي ايىرماشىلىعىمەن جەڭىلدى. ناتيجەسىندە, تالعات كۇمىس مەدال يەلەندى.
قىرعىزستاننىڭ استاناسىندا ءبىز ازامات داۋلەتبەكوۆكە ايرىقشا سەنىم ارتتىق. 86 كيلو سالماقتا كۇرەسكەن ول ەۋروپا چەمپيوناتىنىڭ ەكى دۇركىن قولا جۇلدەگەرى پولشالىق سەباستيان ەزەجانسكي مەن الەم كۋبوگى مەن قۇرلىق بىرىنشىلىگىندە جەڭىس تۇعىرىنا كوتەرىلگەن تۇركيالىق وسمان گيوچەننەن باسىم ءتۇسىپ, جارتىلاي فينالدا الەم جانە ەۋروپا چەمپيوناتتارىنىڭ جۇلدەگەرى ازەربايجاندىق ابۋباكر اباكاروۆپەن ايانباي ايقاستى. بۇل باسەكەنىڭ تاعدىرىن ءبىر عانا ۇپاي شەشتى. ءۇشىنشى ورىن ءۇشىن وتكەن تارتىستا قانداسىمىز قىرعىزستاندىق نۇرتىلەك قارىپباەۆتى قاپى قالدىردى. داۋلەتبەكوۆپەن قاتار, مەيرامبەك قارتباي (57 كيلو) مەن جىگەر زاكىروۆ (79 كيلو) تە قولا مەدالدى مويىندارىنا ءىلدى.
جالپىكوماندالىق ەسەپتە جارىس قوجايىندارى كوش باستادى. ولار 3 التىن, 2 كۇمىس جانە 4 قولانى ولجالادى. ودان كەيىنگى ساتىلارعا گرۋزيا (3+1+1), باحرەين (2+1+0), ازەربايجان (1+2+1), موڭعوليا (1+1+0), قازاقستان مەن قىتاي (0+1+4), وزبەكستان (0+1+2) جانە تۇركيا مەن تاجىكستان (0+0+2) قۇرامالارى جايعاستى. كۇرەستىڭ ءۇش ءتۇرىن قوسقاندا جەرلەستەرىمىز اتالعان رەيتينگتىك جارىستا 13 (3+3+7) جۇلدەگە يەلىك ەتتى.