اقش-تىڭ اركانزاس شتاتىنىڭ ورتالىعى – ليتل-روك قالاسىندا تەننيستەن «چەللەندجەر» ساناتىنداعى تۋرنير اياقتالدى.
جۇلدە قورى 75 مىڭ دوللاردى قۇراعان جارىستا بەيبىت جۇقاەۆ تابىستى ونەر كورسەتتى. اتر رەيتينگىندە 325-ورىندا تۇرعان بەيبىت ىرىكتەۋ سىنىنان ىركىلمەي نەگىزگى تۋرنيردەگى تۇساۋكەسەر كەزدەسۋىن گەرمانيالىق پەتەر گوەۆچيكپەن (333) وتكىزدى. بۇل تارتىس 6:2, 6:2 ەسەبىمەن قانداسىمىزدىڭ پايداسىنا شەشىلدى. ەكىنشى كەزەڭدە ول وسى دودانىڭ باستى فاۆوريتتەرىنىڭ ءبىرى امەريكالىق نيكولاس مورەنو البوراننان (№182) باسىم ءتۇستى – 6:2, 6:7, 7:6. ودان كەيىن ءوزىنىڭ كوماندالىق ارىپتەسى ميحايل كۋكۋشكينمەن (№286) كۇش سىناستى. اسا شيەلەنىستى وتكەن سايىستا جاس دارىن 35 جاستاعى ساقا سپورتشىنى سان سوقتىرىپ كەتتى – 6:7, 6:4, 7:5. جارتىلاي فينالدا جۇقاەۆ اۋستراليالىق ادام ۋولتتى جولىنان ىعىستىردى – 6:7, 6:4, 7:6. بىراق فينالدا مارك لايالۋعا (311) ءالى جەتپەدى. بۇل تارتىس 4:6, 5:7 ەسەبىمەن ەستونيا تەننيسشىسىنىڭ پايداسىنا شەشىلدى.
22 جاستاعى اقتاۋ قالاسىنىڭ تۋماسى قازىرگى كەزدە ءوزىن جاقسى قىرىنان كورسەتىپ ءجۇر. ونىڭ ليتل-روكتاعى جارىستا فينالعا دەيىن جەتۋى – سپورتتىق مانسابىنداعى ازىرگە ەڭ ءىرى تابىس. وسى جەتىستىگىنىڭ ارقاسىندا بەيبىت جۇقاەۆ الەمدىك رەيتينگتە 254-ورىنعا كوتەرىلدى.