كۇدەباەۆقا ەلدەن قاشۋعا كومەكتەسكەن كۇدىكتىلەر ۇستالدى

الماتى وبلىسى بويىنشا ىشكى ىستەر دەپارتامەنتىنىڭ بۇرىنعى باستىعى قازاق-قىرعىز شەكاراسىن زاڭسىز كەسىپ وتكەن ەدى. راستالماعان اقپاراتقا سايكەس, باقىلاۋ-وتكىزۋ بەكەتتەرىنىڭ بىرىندە شەكارا قىزمەتىنىڭ اسكەري قىزمەتكەرى ونىڭ قىرعىزستان اۋماعىندا بولۋىن زاڭداستىرعان. «كەيىن سەرىك كۇدەباەۆ «ماناس» اۋەجايى ارقىلى تۇركياعا ۇشىپ كەتكەن. اسكەري پروكۋراتۋرا زاڭسىز كوشى-قون فاكتىسى بويىنشا قىلمىستىق ءىس قوزعادى. اتالعان ءىس بويىنشا ءتورت ادام كۇدىككە ءىلىندى. ولار بىشكەكتەگى №1 تەرگەۋ يزولياتورىنا قامالدى, ولاردىڭ ءبىرى اسكەري قىزمەتكەر بولسا, قالعاندارى – بەيبىت تۇرعىندار», دەلىنگەن 24.kg ۇسىنعان دەرەكتە. سەرىك كۇدەباەۆ وسى جىلدىڭ ءساۋىر ايىندا ۇستالىپ, قازاقستانعا جەتكىزىلدى. بۇل اقپاراتتى باس پروكۋرور بەرىك اسىلوۆ رەسمي تۇردە راستاعان ەدى.