ەلوردادا حالىقارالىق جيتس قۇرباندارىن ەسكە الۋ كۇنىنە وراي ارنايى اپتالىق ءوتىپ جاتىر

استانا قالاسىندا ايتۆ-ينفەكتسياسىن انىقتاۋ ءۇشىن جىل سايىن 300 مىڭنان استام ادام تەكسەرىلەدى. ونىڭ كولەمى جىل سايىن ورتا ەسەپپەن 12-15%-عا ۇلعايىپ كەلەدى. ەرتە تەستىلەۋدىڭ ارقاسىندا 84 پايىزى العاشقى ساتىسىندا انىقتالادى. سوڭعى 20 جىلدان استام ۋاقىت ىشىندە ەلوردادا ايتۆ الدىن الۋدىڭ ارقاسىندا اۋرۋ جۇقتىرعان ايەلدەردەن 280 دەنى ساۋ بالا دۇنيەگە كەلدى.

«بۇكىل الەمدە ايتۆ-نىڭ تاريحىنا كوز جۇگىرتسەك, ادام شىعىنى كوپ ەكەنىن بايقايمىز. بىراق مەديتسينا زاماناۋي جەتىستىكتەرىنىڭ ارقاسىندا بۇگىندە بىزدە ونداعان مىڭ ادامنىڭ ءومىرىن ساقتاپ قالۋعا مۇمكىندىك بار. قازىرگى ۋاقىتتا انتيرەتروۆيرۋسقا قارسى ەمدەۋ مەن تۇراقتى مەديتسينالىق باقىلاۋدىڭ ارقاسىندا ايتۆ-ينفەكتسياسى جيتس ساتىسىنا اۋىسپاۋى مۇمكىن. تاجىريبە نەگىزىندە ايتۆ-ينفەكتسياسىن جۇقتىرۋ قاۋپىن تومەندەتۋ جانە دەنى ساۋ بالالاردىڭ دۇنيەگە كەلۋى ءۇشىن انتيرەتروۆيرۋستىق تەراپيانىڭ جوعارى تيىمدىلىگىن ايتقان ءجون. بۇل جەتىستىكتەر جۇرت ساناسىندا ساقتالعان ولىمگە اپاراتىن اۋرۋ تۋرالى قاتە تۇسىنىكتەردى تولىق جوققا شىعاۋعا مۇمكىندىك بەرەدى», دەيدى استانا قالاسى ايتۆ-نىڭ الدىن الۋ ورتالىعىنىڭ ءبولىم مەڭگەرۋشىسى جاننا ايتماعانبەتقىزى.

قازىر استانا قالاسىندا 2000-عا جۋىق ناۋقاس ديسپانسەرلىك ەسەپتە تۇر. انتيرەتروۆيرۋستىق تەراپيانىڭ ارقاسىندا ايتۆ-ينفەكتسياسى سوزىلمالى جۇقپالى اۋرۋلار قاتارىنا ەنىپ, ءولىم-ءجىتىم ازايدى. الەم بويىنشا سوڭعى ون جىلدا جيتس-تەن ءولىم-ءجىتىم 47 پايىزعا قىسقارعان.

جىل سايىن مامىردىڭ ءۇشىنشى جەكسەنبىسىندە الەمدە حالىقارالىق جيتس-تەن قايتىس بولعان ادامداردى ەسكە الۋ كۇنى وتكىزىلەدى. اتالمىش كۇنگە وراي اكتسيا بارىسىندا ستۋدەنتتەر مامانداردان تەگىن كەڭەس الىپ, ايتۆ-عا ناتيجەسى 15 مينۋتتا شىعاتىن جەدەل تەستىلەۋدەن وتۋگە مۇمكىندىك الدى.

سونداي-اق اپتالىقتىڭ سوڭعى كۇنى قالاداۇى «بايتەرەك», «حان شاتىر», جانە قازاقستان تەمىر جولى باس كەڭسەسىنىڭ عيماراتتارى كەشكى ۋاقىتتا ايتۆ-نىڭ سيمولى بولعان قىزىل تۇستە جاناتىن بولادى.