قوستانايدا «اباي وقۋلارى» بايقاۋىنىڭ وبلىستىق كەزەڭى قورىتىندىلاندى. التى اتالىم بويىنشا وتكەن ءبىلىم جارىسىنا بايگەنىڭ اۋداندىق جانە قالالىق كەزەڭدەرىنەن ىرىكتەلىپ شىققان 88 وقۋشى قاتىستى.
ءداستۇرلى ءبىلىم جارىسىنىڭ وبلىس ورتالىعىنداعى اباي مەكتەبىندە ءوتۋى دە رامىزدىك مانگە يە. بىلتىر وڭىردە ءتورت بىردەي مەكتەپ قازاقتىڭ باس اقىنى اباي قۇنانباي ۇلىنىڭ ەسىمىن يەمدەنگەن. ەندى «اباي وقۋلارىنىڭ» وبلىستىق كەزەڭى جىل سايىن وسى مەكتەپتەردىڭ بىرىندە ۇيىمداستىرىلادى.
بايقاۋعا قاتىسقان وقۋشىلار ابايدىڭ «قاراسوزدەرى» مەن ولەڭدەرىن جاتقا, ال اقىن شاكىرتتەرىنىڭ شىعارمالارىن مانەرلەپ وقۋدان جارىسقا ءتۇستى. مەكتەپ ءماجىلىسحاناسىندا وتكەن اباي اندەرىنىڭ سايىسىن بولەك ءبىر مەرەكە دەرسىز. ءبىلىم جارىسىنا جاس اقىندار دا قاتىسىپ, ۇلى اقىنعا ارناعان ولەڭدەرىن وقىدى.
بايقاۋ قورىتىندىسىنا كەلسەك, «جۇيرىكتەن جۇيرىك وزار جارىسقاندا» اتتى اقىندار سايىسىندا «تورلاسا وي-سانامدى تۇمانداي كۇن, ابايدىڭ الەمىنەن سىر اڭدايمىن» دەپ تولعاعان, ى.التىنسارين اتىنداعى دارىندى بالالارعا ارنالعان مەكتەپ-گيمنازيانىڭ وقۋشىسى ارمان ءامىروۆ وزىپ شىقتى. ال «ابايدىڭ قاراسوزدەرى» اتالىمى بويىنشا ارقالىقتاعى بەيىمبەت مايلين اتىنداعى مەكتەپتىڭ 8-سىنىپ وقۋشىسى نۇرايىم نۇربەكقىزى جەڭىمپاز اتاندى. ابايدىڭ اقىن شاكىرتتەرىنىڭ شىعارمالارىن ناقىشىنا كەلتىرىپ مانەرلەپ وقۋدان دا ارقالىق قالاسىنىڭ وقۋشىلارى وزىق شىقتى. بۇل اتالىمدى ارقالىقتاعى شوقان ءۋاليحانوۆ اتىنداعى مەكتەپتىڭ 8-سىنىپ وقۋشىسى اقسەزىم سپانوۆا جەڭىپ الدى. اباي اندەرى بويىنشا وتكەن سايىستا قوستانايداعى №15 مەكتەپتىڭ 9-سىنىپ وقۋشىسى ارنۇر قۋاندىق الدىنا جان سالمادى.
ءبىلىم باسقارماسىنا قاراستى «قوستاناي دارىنى» وڭىرلىك وقۋ-ادىستەمەلىك ورتالىعىنىڭ مامانى گۇلنار ەرعاليەۆانىڭ ايتۋىنشا, وبلىستىق بايقاۋدىڭ جەڭىمپازدارى الداعى ۋاقىتتا رەسپۋبليكالىق اباي وقۋلارىنا قاتىسادى.
قوستاناي وبلىسى