شىعىستا كەڭىنەن تانىلىپ كەلە جاتقان جاس يلليۋزيونيست بار. انتون روسس ەسىمدى وسكەمەندىك سيقىرشى سوڭعى كەزدە جيىرما مەتر بيىكتىكتە ورىندالاتىن امەريكالىق گارري گۋدينيدىڭ تريۋگىن قايتالاپ ءجۇر. شىلدەنىڭ شىجعىرعان كۇنىنە قاراماستان, روسستى قولپاشتاۋشىلار, ەرەكشە سيقىرعا ەلىتكەن جاستار جاس جىگىتتىڭ ونەرىن تاماشالاۋعا كۇن ساسكەدەن اۋا جينالدى.
ا.روسس 1995 جىلى تۋعان. وسكەمەندەگى №9 ورتا مەكتەپتى تامامداعان. سيقىر ونەرىنە دەن قويىپ جۇرگەن 19 جاسار جىگىت بۇل جولى زاڭعار بيىكتە اياعىنان بايلانعان ارقاننان سالبىراعان كۇيى ۇستىندەگى جەيدەسى مەن تەمىر شىنجىرىن شەشۋگە ءتيىس بولاتىن. ارينە, جەردەن كوككە كوتەرەردە تريۋكشىنىڭ قولىن مىقتاپ تۇرىپ ايقاستىرىپ, ۇستىنەن بىتەۋ جەيدە كيگىزىپ, ونىڭ سىرتىنان تەمىر شىنجىرمەن شاندىپ بايلاپ تاستادى. بۇل وتە قاۋىپتى ءارى جاۋاپتى تريۋك بولعاندىقتان, جەڭىس داڭعىلىنىڭ بويىنداعى كورىنىسكە توتەنشە جاعدايلار دەپارتامەنتى مەن جەدەل جاردەم قىزمەتكەرلەرى دە ارنايى كەلدى.
ا.روسس بۇل ىسكە سانالى تۇردە بارىپ وتىرعاندىعىن, ەشقانداي قان قىسىمى جوقتىعىن, دەنساۋلىعىنىڭ قالىپتى ەكەنىن بايانداعان قولحات جازىپ بەردى. جەدەل جاردەم فەلدشەرى گالينا ۆەيتسەلدىڭ ايتۋىنشا, 20 مەتر بيىكتىكتەن تومەن قاراي سالبىراعان ادامنىڭ جەيدە شەشۋى تۇرماق, ارتەريالدى قان قىسىمى كوتەرىلۋى, ومىرىنە زور قاۋىپ ءتونۋى مۇمكىن. سوندىقتان, دارىگەرلەر تريۋكتى كورسەتەردەن بۇرىن تريۋكشىنىڭ قان قىسىمىن ولشەپ, تەكسەرۋدەن وتكىزدى.
– بۇل – بەس قاباتتى ءۇيدىڭ بيىكتىگىنە شامالاس. سوندىقتان, ارنايى كيگىزىلگەن كويلەكتى ءۇش-ءتورت مينۋتتىڭ ىشىندە شەشىپ, بوساپ شىقپاسام, باسىما قان قۇيىلىپ كەتۋى دە مۇمكىن, – دەدى جاس يلليۋزيونيست.
ول بۇعان دەيىن اتالعان تريۋكتى ءۇش مەتر بيىكتىكتە سىناپ كورگەن ەكەن. شارانى ۇيىمداستىرۋشىلار وعان كيگىزىلەتىن جەيدە مەن تەمىر شىنجىردى جينالعان قاۋىمعا تەكسەرتىپ تە الدى. مىنە, ىستىق كۇندە دەگبىردى العان تريۋك تە باستالدى.
الاڭعا ارنايى الدىرىلعان 25 توننا جۇكتى كوتەرۋگە قابىلەتتى كران انتوندى اياعىنان بايلانعان ارقانىمەن ءزاۋلىم بيىككە كوتەرە جونەلگەندە جيىلعان جۇرت ىشتەن تىنىپ قالعان ەدى. سوناۋ كوكتە تۇرعان تريۋكشىگە قاراۋدىڭ ءوزى ۇرەيلى. ول بولسا, از-ماز بۇلقىنعانداي قالىپ تانىتىپ, كەۋدەسىن ماتاعان شىنجىردان وڭاي قۇتىلدى. ال جەيدەنى شەشۋگە ءبىرشاما ۋاقىت كەتتى. ءبىرشاما دەيمىز. بار-جوعى بىرەر مينۋت. اسسا, ەكى مينۋت. بىراق, ءتۇۋ كوكتە اياعىنان ءىلىنىپ تۇرعان ادام ءۇشىن ءبىر سەكۋندتىڭ ءوزى ءبىر ساعات سياقتى بولاتىن شىعار. بۇل جاعدايدى, ارينە, ا.روسس جاقسى بىلەدى...
ءاپ-ساتتە جەيدە دە شەشىلىپ, تومەن قاراي اعىپ ءتۇستى. سالدەن سوڭ تريۋكشىنى كوتەرىپ تۇرعان كراننىڭ كوتەرگىشى دە تومەندەي بەردى. ونى جەردەن توتەنشە جاعداي قىزمەتكەرلەرى مەن دارىگەرلەر كۇتىپ العانىمەن, ول ءوزىنىڭ جاعدايى قالىپتى ەكەنىن ايتتى. جۇرت دۋ ەتىپ, قوشەمەت كورسەتتى.
ا.روسستىڭ ايتۋىنشا, مۇنداي ونەر وعان اتاسىنان دارىسا كەرەك. ول اتاسىنىڭ قولىن كەرى قايىرىپ, قايتا قالپىنا كەلتىرەتىن قاسيەتى بولعانىن ءوز قيمىلىمەن جەتكىزدى. بۇل تريۋككە بەس جىل بويى ازىرلەنگەن تريۋكشى ءالى دە كوپتەگەن جوسپارلارى بار ەكەنىن ايتتى. ءساتىن سالسا, جاس جىگىتتىڭ ونەرىمەن ءتانتى ەتەتىن كۇندەرى الدا.
دۋمان اناش,
«ەگەمەن قازاقستان».
وسكەمەن.
ا.روسس تريۋك جاساعان بەينەكورىنىستى
گازەتتىڭ سايتىنان كورە الاسىزدار.
http://youtu.be/R6At_s17YlI