بيىل ءساۋىر سالقىنداۋ بولعاندىقتان با, تايىز سۋ قويمالارىنداعى بالىقتار قىرىلىپ جاتىر. تابيعاتتىڭ تىلسىم زاۋالى 4 ساۋىردە قوستاناي اۋدانىنداعى وزەرنىي اۋىلىنىڭ شەتىندەگى كولدە, 5 ساۋىردە زارەچنىيدىڭ ماڭىنداعى سۋ قويماسىندا بايقالعان. بالىق ينسپەكتسياسىنىڭ ماماندارى دەرەۋ زارەچنىيداعى سۋدان سىناما الىپ, جارتى توننادان استام ءولى بالىق تەرىپ الدى.
اراعا جيىرما كۇن سالىپ التىنسارين اۋدانىنا قاراستى سيلانتەۆ ەلدى مەكەنىنىڭ ماڭىندا تاعى بالىق قىرىلدى. اۋىل شەتىندەگى اتاۋسىز كولگە ات باسىن تىرەگەن وبلىسارالىق بالىق شارۋاشىلىعى ينسپەكتسياسىنىڭ وكىلدەرى مەن تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ ماماندارى جاعادان 427 كيلو موڭكە بالىق تەرىپ الىپ, سانيتارلىق-ەپيدەميالىق تالاپقا سايكەس ءبىرىن قالدىرماي جويدى.
سۋدان سىناما العان ەكولوگيا دەپارتامەنتىنىڭ زەرتحانا ماماندارى تالداۋ ناتيجەلەرىن كەيىنىرەك جاريا ەتەتىنىن مالىمدەدى.
– اتالعان سۋ قويماسى جەرگىلىكتى ماڭىزى بار بالىق شارۋاشىلىعى سۋ قويمالارىنىڭ تىزىمىندە جوق. سوندىقتان ەشكىمگە بۇل كولدەن بالىق اۋلاۋعا تىيىم سالىنباعان. ال موڭكە بالىقتىڭ قىرىلۋ سەبەبى تەرەڭدىگى نەبارى 80 سم بولاتىن تايىز سۋدىڭ تابانىنا دەيىن قاتىپ قالۋىنان بولۋى مۇمكىن, – دەدى وبلىستىق ەكولوگيا دەپارتامەنتىنىڭ ءباسپاسوز حاتشىسى كارينا ايتمۇحامبەتوۆا.
قوستاناي وبلىسى