9-14 ءساۋىر ارالىعىندا استانادا گرەك-ريم, ەركىن جانە ايەلدەر كۇرەسىنەن 36-شى ازيا چەمپيوناتى وتەدى. وعان قۇرلىقتىڭ 24 ەلىنەن 300-دەن استام بالۋان قاتىسادى, دەپ حابارلايدى Egemen.kz.
بۇل تۋرالى مادەنيەت جانە سپورت مينيسترلىگىنە قاراستى سپورت جانە دەنە شىنىقتىرۋ ىستەرى كوميتەتى توراعاسىنىڭ ورىنباسارى ايگۇل بەكتەنوۆا ءمالىم ەتتى.
«9-14 ءساۋىر ارالىعىندا استاناداعى جاقسىلىق ۇشكەمپىروۆ اتىنداعى «جەكپە-جەك» سارايىندا كۇرەس تۇرلەرىنەن وسىمەن 36-شى ازيا چەمپيوناتى وتپەك. بۇل جارىسقا ازيا قۇرلىعىنىڭ 24 مەملەكەتىنەن 300-گە جۋىق سپورتشى قاتىسادى دەپ جوسپارلانىپ وتىر. ولاردىڭ اراسىندا وليمپيادا ويىندارىنىڭ 7 جۇلدەگەرى, الەم چەميپيوناتتارىنىڭ 5 جەڭىمپازى قاتىسادى. سوندىقتان, ءدۇبىرلى دودا بولايىن دەپ تۇر. نەگىزى بۇل – ازيا چەمپيوناتى, ليتسەنزيالىق تۋرنير ەمەس. بىراق, ازيا ويىندارىنىڭ الدىنداعى, الەم چەمپيوناتىنىڭ الدىنداعى نەگىزگى جارىستاردىڭ ءبىرى بولىپ ەسەپتەلەدى», دەدى كوميتەت وكىلى بريفينگ بارىسىندا.