ەلىمىزدە «جۇرەك جىلۋى» قايىرىمدىلىق اكتسياسى جان-جاقتى جالعاسىپ جاتىر. ءىس-شارانى مەملەكەت باسشىسى قاسىم-جومارت توقاەۆ قولداعانى بەلگىلى. بۇگىندە اكتسياعا قازاقستاننىڭ تۇكپىر-تۇكپىرىنەن جۇرەگى مەيىرىمگە تولى جاندار ءۇن قوسىپ جاتىر.
ناۋرىز مەرەكەسى قارساڭىندا پرەزيدەنت «جۇرەك جىلۋى» قايىرىمدىلىق اكتسياسىنا قاتىستى. اكتسيانىڭ ءمانى – ناۋرىز ايى بويىنا حالىقتىڭ الەۋمەتتىك وسال توپتارىنا قامقورلىق كورسەتىپ, كوپبالالى وتباسىلاردان, مۇمكىندىگى شەكتەۋلى جانداردان, زەينەتكەرلەردەن كەلىپ تۇسكەن حاتتاردا جازىلعان ءوتىنىش-تىلەكتەردى ورىنداۋ.
قايىرىمدى ىسكە استانا قالاسى اكىمدىگىنىڭ «استانا جاستارى» جاستار رەسۋرستىق ورتالىعىنىڭ ەرىكتىلەرى ۇيىتقى بولعان. ولار 21-23 ناۋرىز ارالىعىندا ەكسپو اۋماعىنداعى كيىز ۇيلەردىڭ بىرىندە اكتسيانى كەڭىنەن ناسيحاتتادى. وسى ورايدا ۆولونتەرلەر مەملەكەت باسشىسىنان ساندىقتان العاشقى حاتتى الىپ وقۋدى سۇرادى. قاسىم-جومارت توقاەۆ حات يەسىنىڭ تىلەگى ورىندالاتىنىن جەتكىزىپ, وسىناۋ يگى ءىستى باستاعان جاستارعا ريزاشىلىعىن ءبىلدىردى. وتىنىشتە استانا تۇرعىنى تونومەتر سۇراعان ەدى.
سوعان سايكەس, استانا اكىمى جەڭىس قاسىمبەك گۇلجاحان سىدىقوۆامەن كەزدەسىپ, مەملەكەت باسشىسىنىڭ اتىنان تونومەتردى تابىستادى. سونداي-اق وعان ماتەريالدىق كومەك كورسەتىلىپ, ساناتوريگە جولداما بەرىلەدى. گۇلجاحان سىدىقوۆا پرەزيدەنت پەن «جۇرەك جىلۋى» قايىرىمدىلىق اكتسياسىنا قاتىسۋشىلارعا العىسىن ءبىلدىردى. بۇدان بولەك اقپارات جانە قوعامدىق دامۋ ءمينيسترى دارحان قىدىرالى سەگىز جاسار ەرالىنىڭ ۇيىنە بارىپ, ءوزى حاتتا سۇراعان سىيلىقتاردى تابىس ەتتى.
يگى ءىستىڭ ءىزىن «Jibek Joly» تەلەارناسى, «Magnum» سۋپەرماركەتتەر جەلىسى, «قازاقستان تەمىر جولى» ۇلتتىق كومپانياسى جانە ەلىمىزدەگى جوعارى وقۋ ورىندارى دا جالعاستىرۋدا. استاناداعى م.س. نارىكباەۆ اتىنداعى كازگيۋ ۋنيۆەرسيتەتى جاقسىلىق ساندىعىنان ءبىر حاتتى الدى. وندا تىلەك جولداۋشى الفيا جۇگىرۋگە ارنالعان سپورتتىق اياق كيىم العىسى كەلگەنىن جازعان. ۋنيۆەرسيتەت ۇجىمى تەك سپورتتىق اياق كيىم عانا ەمەس, جۇگىرۋگە قاجەتتى بارلىق سپورتتىق كيىممەن جابدىقتايتىنىن جەتكىزدى. كەيىن «جۇرەك جىلۋى» چەللەندجىن اتىراۋداعى سافي وتەباەۆ ۋنيۆەرسيتەتى قابىلداپ, ەرىكتىلەر توبىنا ارنايى حابارلاستى. ولارعا تىلەك ساندىعىنان نازەركە ەسىمدى مەكتەپ وقۋشىسىنىڭ حاتى ءتۇستى. استانا قالاسىنىڭ تۇرعىنى قارشادايىنان قولمەن تىگىنشىلىك ونەرىن ۇيرەنىپ جۇرگەنىن, ەندىگى ارمانى تىگىن ماشيناسىن الۋ ەكەنىن ايتقان. وعان جاۋاپتىلار مۇنايلى استانادان سالەم جولداپ, تىلەگىن ورىندايتىنىن Facebook پاراقشالارىندا جازىپ قالدىردى.
قايىرىمدىلىقتى جانىنا جالاۋ ەتكەن جانداردىڭ قاتارىندا ەڭ ۇزدىك فۋتبولشى سامات سماقوۆ تا بار. ول ءنومىرى 277-حاتتى الىپ, ايبوپە سانجارقىزىنىڭ ارمانىن ورىندادى. ءوتىنىش ءبىلدىرۋشى كۋرسقا قاتىسۋ ءۇشىن ارنايى تىگىن ماشيناسىن سۇراعان.
– جاسىم ون التىدا. ناۋرىز ايىنىڭ باسىندا دوستارىمنان «جۇرەك جىلۋى» اكتسياسى تۋرالى ەستىدىم. ءوزىم كوپبالالى وتباسىنان بولعاندىقتان, حات جازۋعا شەشىم قابىلدادىم. كيىم تىككەندى جاقسى كورەمىن, سوندىقتان سىيلىق رەتىندە تىگىن ماشيناسىن سۇرادىم. ارمانىم سونشالىقتى تەز ورىندالادى دەپ ويلامادىم. ماعان دەمەۋشى حابارلاسقاندا قاتتى قۋاندىم. ءتىپتى سول كۇنى اكەلىپ بەردى. ارماندار ورىندالادى, تەك سەنۋ كەرەك. العىسىم شەكسىز, – دەدى ا.سانجارقىزى.
قازاقتىڭ ءداستۇرلى ادەپ جۇيەسىندە مەيىرىمدىلىك جۇرتشىلىق اراسىنداعى ادامگەرشىلىك, ىزگىلىك پەن ىزەتتىلىك, يماندىلىق پەن يناباتتىلىق سەكىلدى اسىل قاسيەتتەرمەن ۇندەستىك تاپقان. وسى ورايدا ءجۇسىپ بالاساعۇننىڭ «كىر تيگىزبەي ۇستا ويىڭنىڭ ورەسىن, مەيىرىم ەتسەڭ – مەيىرىمدىلىك كورەسىڭ» دەگەنى اكتسيانىڭ نەگىزىن اشا تۇسكەندەي. سوندىقتان جاۋاپتىلار بۇل قايىرىمدىلىق تىزبەگىن جىل بويى جالعاستىرماقشى. ەندى ءوتىنىش-تىلەكتەردى قابىلداۋدىڭ ەكىنشى كەزەڭى مامىر ايىندا باستالادى دەپ جوسپارلانعان.
جالپى, اكتسيا بارىسىندا ۆولونتەرلەر ازاماتتاردان 300-گە جۋىق حات قابىلداعان. ۇيىمداستىرۋشىلاردىڭ ايتۋىنشا, قورجىننان كەز كەلگەن ادام حات الىپ, جەرلەستەرىنىڭ ارمان-تىلەگىن ورىنداي الادى.