ءىىم ۇيىمداسقان قىلمىسقا قارسى كۇرەس دەپارتامەنتىنىڭ قىزمەتكەرلەرى جامبىل وبلىسى پد جەدەل قىزمەتكەرلەرىمەن بىرلەسىپ, تاراز قالاسىندا قىلمىستىق توپتىڭ ارەكەتىن توقتاتۋعا باعىتتالعان ارنايى وپەراتسيا جۇرگىزدى. بۇل وپەراتسياعا بۇركىت ارنايى ماقساتتاعى بولىمشەسىنىڭ ساربازدارى دا تارتىلدى, دەپ حابارلايدى Egemen.kz Polisia.kz سايتىنا سىلتەمە جاساپ.
قالانىڭ بارلارىندا, كافەلەرىندە جانە تۇنگى كلۋبتارىندا بۇزاقىلىق ارەكەتتەر جاساپ, بىرنەشە رەت توبەلەس, جانجال شىعارعان توپ ۆەدومستۆونىڭ جەدەل قىزمەتكەرلەرىنىڭ نازارىنا كوپتەن ىلىككەن بولاتىن.
جەدەل تەكسەرۋ بارىسىندا قالا مەن وبلىس اۋداندارىنىڭ سپورتشىلارى مەن بۇزاقى جاستارى قاتارىنان وسى توپقا قاتىسۋشىلار انىقتالدى.
ولار بىرقاتار ويىن-ساۋىق مەكەمەلەرىنە كۇزەت قىزمەتى تۇرىندە قىلمىستىق قورعاۋشىلىق ۇيىمداستىرعان.
بۇل توپتىڭ ىشىندە بۇرىن بۇزاقىلىق جانە بوپسالاۋ جاساعانى ءۇشىن سوتتالعاندار دا بولدى. سونىمەن قاتار بۇل توپتىڭ اتىس قارۋى قولدانىلعان قىلمىستىق قاقتىعىستارعا قاتىسقانى دا انىقتالدى.
ويىن-ساۋىق ورتالىقتارىنىڭ باسشىلارى قىلمىستىق توپتىڭ «كۇزەت قىزمەتىن» پايدالانۋعا ءماجبۇر بولۋى ءۇشىن ولار كلۋبتار مەن كافەلەردىڭ كليەنتتەرى مەن قىزمەتكەرلەرىنە ءتيىسىپ, قاقتىعىستار, توبەلەستەر جانە جانجالدار ۇيىمداستىردى. پوليتسياعا قىلمىستىق توپتىڭ 11 قاتىسۋشىسى جەتكىزىلدى.
ولاردىڭ تۇرعىلىقتى جەرى بويىنشا جۇرگىزىلگەن ءتىنتۋ ءىس-شارالارى بارىسىندا اتىس, تراۆماتيكالىق قارۋلار, سۋىق قارۋ مەن باسقا دا زاتتاي دالەلدەمەلەر تاركىلەندى. باستى كۇدىكتىلەر, اتاپ ايتقاندا, قىلمىستىق توپتىڭ ۇيىمداستىرۋشىلارى مەن جەتەكشىلەرى ۋاقىتشا ۇستاۋ يزولياتورىنا قامالدى. تەرگەۋ جالعاسىپ جاتىر.