شىمكەنتتەگى دايىن سايلاۋ حاتتامامالارىنىڭ الەۋمەتتىك جەلىدە تارالۋى قوعامدا ساياسي ناۋقاننىڭ ادىلدىگىنە بايلانىستى ەكىۇداي پىكىر تۋعىزىپ جىبەرگەنى راس. وسىعان وراي شىمكەنت قالالىق اۋماقتىق سايلاۋ كوميسسياسىنىڭ توراعاسى قايىربەك قۇنانباەۆ بەينەجازبا ارقىلى ارنايى مالىمدەمە جاسادى, دەپ حابارلايدى Egemen.kz.
«الەۋمەتتىك جەلىلەردە تارالىپ جاتقان سايلاۋ ۋچاسكەلەرىنىڭ قورىتىندى حاتتامالارى بويىنشا ۆيدەوروليكتەردىڭ شىندىققا جاناسپايتىنىن حابارلايمىن. ۆيدەوروليكتە كورسەتىلگەن قۇجاتتار مىجىلعان جانە ولاردا ەشقانداي قولتاڭبا مەن ءمور قويىلماعان. روليكتە كورسەتىلگەن مالىمەتتەردى تازا اراڭداتۋشىلىق دەپ ەسەپتەيمىن. حاتتامالار تەك سايلاۋ قورىتىندىسىنا سايكەس تولتىرىلادى جانە ناتيجەسى جاريالانادى. وسى ءىس ءتيىستى ورگاندار تاراپىنان تەكسەرىلىپ, قۇقىقتىق باعاسى بەرىلەتىن بولادى», دەدى ول.
وسى ورايدا شىمكەنت قالالىق اۋماقتىق سايلاۋ كوميسسياسى توراعاسىنىڭ ورىنباسارى الماسبەك مامىتبەكوۆ سايلاۋ كەزىندە قانداي دا ءبىر ورەسكەل زاڭ بۇزۋشىلىقتى بايقاعان ازاماتتار پروكۋراتۋراعا, پوليتسياعا جانە سايلاۋ كوميسسياسىنا شاعىم تۇسىرۋگە قۇقىعى بار ەكەنىن جەتكىزدى.
قر پارلامەنتى ءماجىلىسى مەن ءماسليحاتتار دەپۋتاتتارىنىڭ سايلاۋىندا شىمكەنت قالاسىنان 330 سايلاۋ ۋچاسكەسى اشىلىپ, وندا 639 663 سايلاۋشى تىركەلگەن. سونىمەن بىرگە ساياسي دودانىڭ ءوتۋ بارىسىن باقىلاۋعا تمد-دان 8, ەقىۇ-دان 24 بايقاۋشى كەلدى.