ناۋىرىزىم قورىعىندا بيىل زورمان ەرتە وياندى. يۋنەسكو قورعاۋىنداعى دالالى-ورماندى القاپقا باي تابيعي قورىقتا سارشۇناقتاردىڭ ءۇش ءتۇرى تىرشىلىك ەتەدى. زورمان سونىڭ ىشىندەگى ەڭ ءىرىسى.
التى اي قىس الاڭسىز ۇيىقتاعان ون شاقتى كەمىرگىشتىڭ 28 اقپاندا ىندەرىنەن شىعىپ بارا جاتقانىن قورىقتىڭ مەملەكەتتىك ينسپەكتورى قاناتحان كارىموۆ كورىپ قالىپتى.
ادەتتە زورماندار وزگە تۇقىمداستارىنا قاراعاندا ەرتە ويانادى. بىراق بەلسەندى تىرشىلىگى ۇزاققا بارمايدى, جىلىنا ءتورت-اق اي وياۋ جۇرەدى.
– 2022 جىلى ناۋىرىزىم زورماندارى 7 ناۋرىزدا ويانعان. بيىل اقپاننىڭ سوڭعى ون كۇنى جىلى بولدى. سودان بولار, زورمان دا ىنىنەن ەرتە شىقتى, – دەيدى قورىقتىڭ عىلىمي قىزمەتكەرى ريشات باترياكوۆ.
ماماننىڭ ايتۋىنشا, ءبىر ايدان سوڭ زورماندار كوبەيە باستايدى. جاڭا تۋعان تىشقاندارى مامىردىڭ اياعىندا وزدەرىنە جەكە ءىن قازىپ الادى. ال ۇزاق ۇيقىعا كەتەر الدىندا قىسقا قوڭ جيناپ, ابدەن سەمىرەدى. ۇيقىعا كەتەتىن مەزگىل جاقىنداعاندا ءبىر زورماننىڭ سالماعى 1,6 كيلوعا دەيىن جەتەدى. ال كۇن ىسىپ, ءشوپ قاتا باستاعاندا زورمان دا جازعى ۇيقىسىنا جاتادى. وسىلايشا, جازعى ۇيقىسىنان ويانباستان, قىسقى ۇيقىعا ءوتىپ كەتەدى.
وسىمدىك قورەكتى دالا زورماندارى كوبىنە جىرتقىش قۇستار مەن قاسقىر, تۇلكى سياقتى اڭدارعا جەمتىك بولادى.
قوستاناي وبلىسى