وتكەن اپتانىڭ جۇما كۇنى «قازاقستان تەمىر جولى» ۇك» اق-تىڭ 190 قىزمەتكەرى ءۇيلى بولدى. اتاپ ايتقاندا, ۇلتتىق كومپانيا پرەزيدەنتى اسقار مامين ەلوردانىڭ VIP-قالاشىعىندا ورنالاسقان «ساراندا» تۇرعىن ءۇي كەشەنىنەن تەمىرجولشىلار وتباسىلارىنا پاتەر كىلتتەرىن تابىس ەتتى. ونداعى كەزەكتە تۇرعان ءار قىزمەتكەرگە پاتەر ارنايى قۇرىلعان كوميسسيانىڭ شەشىمىمەن بەرىلىپ وتىر.
سالتاناتتى شارا بارىسىندا جاڭا شاعىن اۋدانعا ەكسكۋرسيا جاسالدى. شاعىن اۋدان دەپ ايتۋىمىزدىڭ سەبەبى,وسىناۋ اۋدانعا سوڭعى ەكى جىلدا اتالعان ۇلتتىق كومپانيا 12 بىردەي ءزاۋلىم ءارى اسەم ءۇي تۇرعىزىپ, 1000 تەمىرجولشى قونىس تويىن تويلاپ جاتىر. شاعىن اۋداننىڭ ورنالاسقان جەرى كەز كەلگەن استانالىقتىڭ قىزىعۋشىلىعىن تۋدىرارى انىق. ول پرەزيدەنت پاركىنىڭ وڭ جاق بەتىنەن ورىن تەپكەن. تىپتەن اقوردادان تاياق تاستام جەردە دەسەك ناقتىراق بولادى. ەكسكۋرسيا دەمەكشى, تەمىرجولشىلارعا ارناپ سالىنعان ساۋلەتى ايرىقشا ءزاۋلىم ۇيلەر استانا اجارىن اشا تۇسكەنى انىق. سونداي-اق, ءار ءۇيدىڭ اۋلاسىنا قاتار ءتىزىلىپ ەگىلگەن ارشا-شىرشالار كوركەم عيماراتتارعا كورىك قوسىپ تۇر. تەپ-تەگىس الاڭقايلارعا ورناتىلعان ويىن ورىندارى مەن جابدىقتارى ادەمى ءارى قاۋىپسىز. ءبىر ساۋلەت سىزباسىمەن ساپ تۇزەگەن ۇيلەر الىستىڭ وزىنەن مەن مۇندالاپ كوز تارتادى.
بۇل تۇرعىن ۇيلەر دە «قازاقستان تەمىر جولى» ۇك» اق-تىڭ تۇرعىن ءۇي باعدارلاماسى اياسىندا بوي كوتەرگەن. پاتەر يەلەرى باستاپقى تولەم اقىسىز, الداعى 15 جىلدا قولايلى كەستە بويىنشا ەسەپتەسەدى. بارلىق پاتەرلەر دەربەس جىلىتۋ جۇيەسىمەن, گاز پليتاسى, سانتەحنيكالىق جابدىقتارمەن قامتىلعان. سالتاناتتى شارا باستالماس بۇرىن شاعىن اۋدان تۇرعىندارىنىڭ بىرنەشەۋىن سوزگە تارتتىق. ءبارىنىڭ دە قۋانىشى قويىنىنا سىيماي ءجۇر. بەيبىتشىلىك پەن تاتۋلىقتا ءومىر ءسۇرىپ جاتقان قازاقستان حالقى وسىنداي جاقسى تۇرمىسقا لايىق ەكەندىگىن اق جۇرەگىمەن اعىتىلا ايتادى. حالقىمىزدىڭ الەۋمەتتىك جاعدايىن الدىڭعى قاتارعا قويىپ, ءال-اۋقاتىن كوتەرۋ ماقساتىندا ەل ەكونوميكاسىن دامىتۋدى ءبىرىنشى ورىنعا شىعارعان ەلباسىنا ايتار العىستارى شەكسىز. ايتقانداي, بىرەر جىلعا شەگىنىس جاساساق, ءدال وسى «ساراندا» تۇرعىن ءۇي كەشەنىندەگى العاشقى پاتەرلەردىڭ كىلتىن تەمىرجولشىلارعا مەملەكەت باسشىسى نۇرسۇلتان نازارباەۆتىڭ ءوزى تاپسىرعان ەدى. تەمىرجولشىلارعا وسى ءۇيدى تاپسىرعان كەزدە ەلباسى العاشقى پاتەر يەلەرىنە كىلتتى تابىستاپ تۇرىپ, «تەمىرجولشىلار ەشقاشان بۇرىن مۇنداي ۇيدە تۇرعان ەمەس» دەگەن ەدى. بۇل شىندىق. وسىناۋ اقيقاتتاردىڭ ايناسىنا باقساق, تۇڭعىش پرەزيدەنتىمىز سوزىندە تۇرىپ ەلدىڭ ءال-اۋقاتىن جىلما-جىل جاقسارتىپ كەلەدى. ەندى, مىنە, جاڭا پاتەرلەردىڭ كىلتى جاڭا ومىرلەرگە جولداما بەرىپ جاتىر.
سونىمەن, سالتاناتتى جيىنعا قايتا ورالساق, يگى شاراعا تەمىرجولشىلار مەن ولاردىڭ ارداگەرلەرى, سونداي-اق, ەلوردالىق قاراپايىم تۇرعىندار مەن بۇقارالىق اقپارات قۇرالدارىنىڭ جۋرناليستەرى كەلىپتى. قۋانىش يەلەرىنىڭ مەرەيلى ءساتىن قىزىققا تولتىرۋدى ءجون ساناعان ۇلتتىق كومپانيا جەتەكشىلەرى ءبىر توپ ونەر جۇلدىزدارىن شاقىرىپتى. ناتيجەسىندە استانانىڭ تورىنەن ورىن تەپكەن جاڭا شاعىن اۋداندى اسەم ءان مەن ءتاتتى كۇيگە بولەپ, جينالعان قاۋىمدى سازدى اۋەندەر تەربەپ تۇردى. جۇزدەرىنەن شاتتىقتىڭ شۋاقتى نۇرى شاشىراعان بالعىن بوبەكتەر مەن بوزبالا-بويجەتكەندەر اسەرلى اندەردى بىرگە شىرقاتىپ ءجۇر.
قۋانىش يەلەرىن قۇتتىقتاعان ۇلتتىق كومپانيا پرەزيدەنتى اسقار مامين تەمىرجول مەن ونىڭ قىزمەتى تۋرالى تەرەڭنەن تولعاپ, ءسوز ايتتى. ەلدىڭ ەركىن دامۋىنا وسىنداي عالامات مۇمكىندىكتەر تۋدىرىپ وتىرعان ەلباسىنىڭ قامقورلىعىنا ريزا كوڭىلىن ءبىلدىردى.
– مەملەكەت باسشىسىنىڭ جۇرگىزىپ وتىرعان سارابدال ساياساتىنىڭ ارقاسىندا, سىزدەر بۇگىن جاڭا پاتەرلەردىڭ قۋانىشىن تويلاپ وتىرسىزدار. قازاقستاندىق ازاماتتاردىڭ ءال-اۋقاتىن جاقسارتىپ, تۇرعىن ۇيمەن قامتاماسىز ەتۋ ەلباسىنىڭ كۇن تارتىبىنەن تۇسپەيتىن باستى ماسەلەسى ەكەنىن كۇندەلىكتى ومىردەن كورىپ وتىرسىزدار. سوندىقتان مەن سىزدەردى ەلباسىنىڭ سەنىمدى بولاشاققا جاساپ وتىرعان قادامدارىن جوعارى باعالاۋعا شاقىرامىن. سونداي-اق, وزدەرىڭىزگە ءمالىم بيىل «قازاقستان تەمىر جولى» ۇلتتىق كومپانياسى – قازاق تەمىر جولىنىڭ 110 جىلدىق مەرەيتويىن اتاپ ءوتۋدى ماقسات تۇتىپ وتىر. بۇگىنگى كۇندە ۇلتتىق كومپانيا قارقىندى دامىپ, الەمدىك دەڭگەيدەگى كولىكتىك-لوگيستيكالىق كومپانياعا اينالىپ بارا جاتىر.
ءبىز ۇلتتىق كومپانيانىڭ, جالپى تەمىرجولدىڭ ءوسىپ-وركەندەۋىنە سۇبەلى ۇلەسىن قوسىپ وتىرعان ەڭبەككەرلەردى ەلەۋسىز قالدىرعان ەمەسپىز. مۇمكىندىگىنشە ولاردىڭ تۇرمىستىق جاعدايىن جاقسارتۋعا تىرىسىپ كەلەمىز. ۇلتتىق كومپانيا قابىلداعان تۇرعىن ءۇي باعدارلاماسى سونىڭ جارقىن ءبىر دالەلى. سوڭعى بەس جىلدا تەمىرجولشى قاۋىمىنا 3300 پاتەر بەرىلدى. كوپتەگەن ءۇي شاعىن ستانسالاردا سالىندى. قاراساق, جاڭا پاتەر يەلەرىنىڭ 25 پايىزىن جاستار قۇراپ وتىر.
بيىل ءبىز جەزقازعان – بەينەۋ, ارقالىق – شۇباركول تەمىرجولدارىن پايدالانۋعا تاپسىرۋدى كوزدەپ وتىرمىز. بۇلارمەن بىرگە, اقتوبەدەگى رەلس شىعاراتىن زاۋىت تا پايدالانۋعا بەرىلەتىن بولادى. بۇل يگى ىستەر ءسىز بەن ءبىزدىڭ, جالپى تەمىرجولشىلاردىڭ ىنتىماق-بىرلىگى مەن زور ەڭبەگىنىڭ جەمىسى ەكەنىنە داۋ جوق. سوندىقتان دا, ءار تەمىرجولشى جاقسى ۇيدە تۇرۋعا, جايلى ءومىر سۇرۋگە لايىقتى. ءۇيلى بولعان قۋانىشتارىڭىز ۇزاعىنان ءسۇيىندىرسىن! قونىس تويلارىڭىز قۇتتى بولسىن, بارشاڭىزعا مول باقىت, زور دەنساۋلىق, جەمىستى ەڭبەك تىلەيمىن, – دەدى ۇلتتىق كومپانيانىڭ پرەزيدەنتى اسقار ۇزاقباي ۇلى.
سالتاناتتى شاراعا قاتىسىپ, تەمىرجولشىلاردى جاڭا پاتەرگە يە بولعان قۋانىشتارىمەن قۇتتىقتاۋعا ۇلتتىق كومپانيا پرەزيدەنتىنىڭ كەڭەسشىسى, قۇرمەتتى تەمىرجولشى نىعمەتجان ەسەنعارين, قازاقتىڭ تۇڭعىش عارىشكەرى, كەڭەس وداعىنىڭ باتىرى, حالىق قاھارمانى توقتار اۋباكىروۆ تە كەلگەن-ءدى. ءوز كەزەگىندە مارتەبەلى مەيماندار دا ءسوز الىپ, جاڭا پاتەر يەلەرىنە يگىلىك تىلەدى.
ىزگى شارا بارىسىندا جاڭا ۇيلەردىڭ كىلتىن العان باقىتتى جاندارعا دا ءسوز بەرىلدى. ولاردىڭ قاتارىندا «لوكوموتيۆ» اق تەحنيكالىق دامۋ باسقارماسى تەحنيكالىق دامۋ ءبولىمىنىڭ باس مامانى امانكەلدى تۇمەنوۆ اقجارما كوڭىلمەن ءوز وتباسىنىڭ, بۇكىل اۋلەتىنىڭ قۋانىشى تۋرالى ايتىپ, مەملەكەت باسشىسىنا سىندارلى ساياساتى مەن ەل دامۋىنداعى ەرەن ەڭبەگى ءۇشىن, ال ۇلتتىق كومپانيا جەتەكشىلەرىنە ەڭبەككەرلەرگە جاساپ وتىرعان قامقورلىقتارى ءۇشىن العىسىن ءبىلدىردى.
– قۇرمەتتى اسقار ۇزاقباي ۇلى, قۇرمەتتى ارىپتەستەر! بۇگىن ءبىز ءۇشىن ۇلكەن قۋانىشتى كۇن. كوپ جىل كۇتكەن پاتەرىمىزدىڭ كىلتىن قولعا الىپ جاتىرمىز. ءوز باسىم سەگىز جىل كەزەكتە تۇردىم. ەندى, مىنە, وتباسىم جەكە ءۇيلى بولىپ جاتىر. مەنىڭ انام دا تەمىرجولعا كوپ جىل تەر توكتى. بۇگىن بىزگە بەرىلىپ جاتقان مىنا ءزاۋلىم ءۇي راسىندا قيال مەن ارماننىڭ اقيقاتقا اينالعانى دەگىم كەلەدى. ەلباسى نۇرسۇلتان نازارباەۆ ەلىمىز تاۋەلسىزدىك العالى بەرى حالقىنا بەرگەن ۋادەسىن ىسىمەن دالەلدەپ, حالىقتىڭ ءال-اۋقاتىن جىل وتكەن سايىن جاقسارتىپ كەلەدى. بۇيىرتسا, جاڭا پاتەر جاڭا ومىرگە جولداما بەرەدى. مەن قازاقستان تەمىرجولىنىڭ جاستارى اتىنان ەلباسىنا, ۇلتتىق كومپانيا باسشىلىعىنا زور العىسىمدى بىلدىرەمىن, – دەدى باس مامان.
ءسوز كەزەگى كەلگەندە «كازترانسسەرۆيس» اق ءسولتۇستىك فيليالى استانا اگەنتتىگىنىڭ جۇك قابىلداپ-تاپسىرۋشىسى دينارا مۇحامەدجانوۆا ۇلتتىق كومپانيانىڭ جەتىستىكتەرىمەن قاتار قاراپايىم جۇمىس ادامىنا دا بارىنشا جاعداي جاسالىپ جاتقانىن ايتتى.
– ءۇي بولماي كۇي بولمايدى, – دەپ باستادى ول ءسوزىن. – ەلوردانىڭ تورىنەن باسپانا الۋ – ءاربىر ادامنىڭ ۇلكەن ارمانى. بۇگىن ءبىز سول ارمانىمىزعا قول جەتكىزىپ وتىرمىز. ەلباسىنا تەمىرجول باسشىلىعىنا مول العىس. جاڭا پاتەرلەرىڭىزدە تەك قانا قۋانىش بولىپ, ءوز ۇيلەرىڭىزدە قۇت-بەرەكەگە كەنەلە بەرىڭىزدەر. ەلىمىزدىڭ تۇكپىر-تۇكپىرىندە ءۇيلى بولىپ جاتقان بارلىق ءارىپتەستەرىمدى زور قۋانىشتارىمەن قۇتتىقتايمىن, – دەدى ول.
شاتتىققا تولى شارانىڭ سوڭى ءان-كۇيگە ۇلاستى. توقسان اۋىز ءسوزدىڭ توبىقتاي تۇيىنىنە تىرەلسەك, «قازاقستان تەمىر جولى» ۇك» اق-تىڭ تۇرعىن ءۇي باعدارلاماسى 2011-2015 جىلدارعا ارنالعان. وسى باعدارلاما شەڭبەرىندە جانە ۇلتتىق كومپانيادا جاسالىپ جاتقان الەۋمەتتىك اكتسيالار ناتيجەسىندە تۇرعىن ءۇي كەزەگىندە تۇرعانداردىڭ سانى بۇگىندە ءۇش ەسەگە دەيىن ازايىپتى.
نۇرباي ەلمۇراتوۆ,
«ەگەمەن قازاقستان».