ەلەنا رىباكينا ءابۋ-دابي ءتۋرنيرىنىڭ شيرەك فينالىنا شىقتى

جارىستىڭ 3-راكەتكاسى بولىپ تىركەلىپ, دوداعا ەكىنشى اينالىمنان قوسىلعان قازاقستاندىق تەننيسشى كەزىندە دۇنيەجۇزىلىك رەيتينگتە كوش باستاعان, قازىرگى ۋاقىتتا 20-ورىندا تۇرعان چەحيالىق كارولينا پليشكوۆامەن شەبەرلىك بايقاستى.

وسىعان دەيىن قارسىلاستار ەكى مارتە كەزدەسىپ, ەكەۋىندە دە رىباكينا باسىم تۇسكەن ەدى.

بۇل جولى ەلەنا بىردەن برەيك جاسادى. ەسەپ – 1:0. سەت بىتكەنشە, سول قارقىنىنان ايىرىلعان جوق. ەسەپ – 6:4.

ەكىنشى پارتيادا دا قازاقستاندىق تەننيسشى برەيكپەن العا شىقتى. ەسەپ – 3:1. سوسىن ەسەپتى 5:1-گە جەتكىزدى. اقىرى ماتچتى ەيسپەن ءبىتىردى. ەسەپ – 6:2.

ەلەنا رىباكينا جارتىلاي فينالعا شىعۋ ءۇشىن الەمنىڭ 14-راكەتكاسى, برازيليالىق بەاتريس حادداد مايامەن كەزدەسەدى. بەاتريس ەكىنشى اينالىمدا تاعى ءبىر قازاقستاندىق, رەيتينگتە 45-ورىنداعى يۋليا پۋتينتسەۆانى 6:4, 6:7 (5:7), 7:6 (7:4) ەسەبىمەن ۇتىپ كەتكەن.