ادامزات بالاسىنىڭ جاندۇنيەسىن رۋحتاندىرىپ, كۇللى حالىقتىڭ تۇسىنەتىن تىلىنە اينالعان قۇدىرەتتى ونەردى دانا حالقىمىز ەجەلدەن-اق ايرىقشا باعالاعان. سول ارقىلى حالقىمىز رۋحى مىقتى, مادەنيەتى جوعارى, ءومىر فيلوسوفياسى تەرەڭ ەلدەردىڭ بىرىنە اينالدى. كونە مۇرالارىمىزدى كۇنى بۇگىنگە دەيىن ەل يگىلىگىنە جاراتىپ, بايتاق دالامىزدى انىمەن تەربەگەن نەبىر تۋما تالانتتار بولعان. ءبىز قازىر دە مادەنيەت سالاسى ماماندارىنىڭ ونەرلەرىنە باس ءيىپ, تاعزىم ەتەمىز.
«روزا باعلانوۆا اتىنداعى «قازاقكونتسەرت» مەملەكەتتىك كونتسەرتتىك ۇيىمى وتاندىق ونەر تۋىندىلارىن كەڭىنەن ناسيحاتتاۋ ماقساتىندا قۇرىلعان مەملەكەتىمىزدىڭ ەڭ ءىرى مۋزىكالىق مەكەمەسى. الپىس جىلدان استام تاريحى بار كيەلى شاڭىراقتا الەم ونەرى مەن مادەنيەتىن تەرەڭ مەڭگەرگەن دارىندى ونەرپازدار ەڭبەك ەتەدى. بۇل ۇيىمنىڭ قۇرىلۋى ەلىمىزدىڭ شەجىرەسىنە ەسىمدەرى التىن ارىپتەرمەن جازىلعان ۇلى ونەر قايراتكەرلەرىمەن تىعىز بايلانىستى.
شارا جيەنقۇلوۆا, جامال وماروۆا, جۇسىپبەك ەلەبەكوۆ, ماناربەك ەرجانوۆ, ماعاۋيا حامزين, گۇلجيحان عاليەۆا سەكىلدى قازاقستاننىڭ حالىق ارتىستەرىنىڭ ءىزىن جالعاستىرۋشىلار روزا باعلانوۆا, روزا رىمباەۆا, ماقپال ءجۇنىسوۆا, التىنبەك قورازباەۆ, ايجان نۇرماعامبەتوۆا سياقتى تانىمال انشىلەردەن كەيىن بۇگىندەرى ازامات جىلتىركوزوۆ, مەدەت شوتاباەۆ, ديماش قۇدايبەرگەنوۆ, رۋحيا بايدۇكەنوۆا, ءالىم بەيسەمباەۆ, Amre سىندى تالانتتى جاستار ساحنا تورىندە ءجۇر. شىعارماشىلىق ۇجىم بيىل جاڭادان قۇرالعان «گۇلدەر» انسامبلىمەن جانە «حالىق قازىناسى» ۇلتتىق ونەر ورتالىعىمەن تولىقتى. ءتول ءداستۇردى تەرەڭ مەڭگەرگەن «اSTANA SAZY» جانە «TURAN» انسامبلدەرى, قازاق مەملەكەتتىك سيمفونيالىق وركەسترى, «FORTE TRIO» مەملەكەتتىك تريوسى, «SAZ&SOUL» ۆوكالدى-ينسترۋمەنتالدى ءانسامبلى, كلاسسيكالىق جانە ەسترادا انشىلەرى مەن تانىمال توپتار دا بار.
مەكەمە ارتىستەرى رەسپۋبليكا كولەمىندە عانا ەمەس, شەت ەلدەردە دە ءوز ونەرلەرىن پاش ەتۋدە. اتاپ ايتاتىن بولساق, تۇركيا, يتاليا, فرانتسيا, گەرمانيا, برازيليا, وڭتۇستىك كورەيا, بەلارۋس, ۆەنگريا, تاجىكستان ەلدەرىنىڭ ساحنا تورىنە شىعىپ, الەم حالقىن اندەرىمەن تەربەدى. بۇدان بولەك, اقش, يتاليا, يسپانيا, فرانتسيا, پورتۋگاليا, نيدەرلاندى, اۋستريا, شۆەيتساريا, يرلانديا, ۋكراينا, سلوۆەنيا, مالتا, رەسەي, وزبەكستان ەلدەرىنىڭ ارتىستەرىمەن بىرگە «Qazaqstan» ورتالىق كونتسەرت زالىنىڭ كورەرمەندەرى ءۇشىن ارنايى كونتسەرتتىك باعدارلامالارىن ۇيىمداستىردى.
مەملەكەت باسشىسى ق.توقاەۆتىڭ مونوقالالاردى دامىتۋ تاپسىرماسىنا سايكەس, ءوڭىر تۇرعىندارىنا ارنايى كونتسەرتتەر بەرۋ جوسپارعا ءىلىندى. قر مادەنيەت جانە سپورت مينيسترلىگىنىڭ قولداۋىمەن گاسترولدىك ءىسساپارلار 3 تاقىرىپتىق باعىتتا ىسكە اسىرىلدى: روزا باعلانوۆانىڭ 100 جىلدىعى, «ەل بىرلىگى – جاڭا قازاقستان» جانە «الماتىداعى التىن كۇز «قازاقكونتسەرتپەن» بىرگە» جوبالارى.
قازاق ءان الەمىنىڭ پاديشاسى, حالقىمىزدىڭ سۇيىكتى قىزدارىنىڭ ءبىرى, قايتالانباس عاجاپ داۋىس يەسى, جەزتاڭداي ءانشى, كسرو مەن قازاقستاننىڭ حالىق ءارتىسى, حالىق قاھارمانى روزا باعلانوۆانىڭ تۋعانىنا 100 جىل تولۋىنا وراي مەرەكەلىك ءىس-شارالار جىل بويى جالعاسىن تاپتى. «قازاق دەگەن حالىقتىڭ ەركەسىمىن. تاعدىرىما, ەلىمە ريزامىن» – دەپ ءوزى ايتقانداي, ءانشىنىڭ مەرەيتويىن بۇكىل جۇرت بولىپ, ەل بولىپ لايىقتى وتكىزۋ باستى مىندەتكە اينالدى. بيىلعى جىلدىڭ 62 ماۋسىمىن «ەل بىرلىگى – جاڭا قازاقستان» جوباسىمەن باستاعان «روزا باعلانوۆا اتىنداعى «قازاقكونتسەرت» مەملەكەتتىك كونتسەرتتىك ۇيىمى گاسترولدىك ساپارلارىن جاڭادان اشىلعان وبلىستارعا ارنادى, سونداي-اق, ءانشىنىڭ ۇزاق ۋاقىت بويى ەڭبەك ەتىپ, ءومىر سۇرگەن الماتى قالاسىندا «الماتىداعى التىن كۇز «قازاقكونتسەرتپەن» بىرگە» اتتى ونەر فەستيۆالىن ۇيىمداستىرىپ, تۋعان جەرىندە ارنايى كونتسەرت بەرىلدى. بۇل شارالاردى قولعا الۋداعى ماقساتىمىز – ءبىر جاعىنان ۇلتتىڭ ءۇنى باعلانوۆاداي ۇلى انشىگە قۇرمەت ءارى تاعزىم ەتۋ بولسا, ەكىنشىدەن, كەيىنگى ۇرپاققا وي سالۋ مىندەتى تۇردى.
اقمولا, سولتۇستىك قازاقستان, قاراعاندى, قىزىلوردا جانە پاۆلودار وبلىستارىندا دا ءانشىنىڭ مەرەيتويىنا ارنالعان اۋقىمدى ءىس-شارالار وتكىزىلدى. مەرەيلى مەرەكە بارىسىندا ەلىمىزگە بەلگىلى ءمۇسىنشى-گيپپەراليست ايدوس ەسماعامبەتوۆ ءانشى اپامىزدىڭ ەكسكليۋزيۆتى ءمۇسىنىن جاسادى. سونداي-اق, «Astana Musical» مەملەكەتتىك تەاترى اتى اڭىزعا اينالعان ءانشىنىڭ بالالىق جانە جاستىق شاعى, سونداي-اق, سوعىس جىلدارىنداعى قيىن تاعدىرى مەن ومىرىندەگى وسىناۋ شەشۋشى كەزەڭدەرى شىعارماشىلىق جولىنىڭ قالىپتاسۋىنا نەگىز بولعان «روزا باعلانوۆا» اتتى ميۋزيكالىق قويىلىمدى ساحناعا شىعاردى.
«ەل بىرلىگى – جاڭا قازاقستان» جوباسى اياسىندا اباي, شىعىس قازاقستان, ۇلىتاۋ, جەتىسۋ, تۇركىستان, جامبىل وبلىستارىنىڭ تۇرعىندارى شىعارماشىلىق ۇجىمنىڭ ونەرلەرىن تاماشالادى. اتالمىش جوبانىڭ ماقساتى – ءوڭىر تۇرعىندارى ءۇشىن مادەني قۇندىلىقتاردىڭ قولجەتىمدىلىگىن قامتاماسىز ەتۋ مەن ونەر قايراتكەرلەرىنە قولداۋ كورسەتۋ جانە ۇلتتىق ونەردى نىعايتۋ بولدى.
«الماتىم جۇرەگىمدە» اتتى گالا-كونتسەرتتە «قازاقكونتسەرتتىڭ» سوليستەرى قازاقستاننىڭ ەڭبەك ەرى ر.رىمباەۆا, قازاقستاننىڭ حالىق ارتىستەرى ا.قورازباەۆ, م.ءجۇنىسوۆا, قازاقستاننىڭ ەڭبەك سىڭىرگەن ارتىستەرى ب.سامەدينوۆا, ا.نۇرماعابەتوۆا, قازاقستاننىڭ ەڭبەك سىڭىرگەن قايراتكەرلەرى ج.ورىنباساروۆا, ق.ماحان, حالىقارالىق جانە رەسپۋبليكالىق بايقاۋلاردىڭ لاۋرەاتتارى ر.ۋايىس, ءا.الماديەۆ, س.مەڭدىعاليەۆا, د.ابدۋحالىق, گ.مىرزابەكوۆا, ە.ناريمان ۇلى, «ازيا» جانە «مەلومەن» توپتارى ونەر كورسەتتى. سونداي-اق, قازاقستانداعى جانە ورتالىق ازياداعى تۇڭعىش «ASTANA MUSICAL» مەملەكەتتىك تەاترى شاھار جۇرتشىلىعىنا «سيقىرلى سازدى حور كونتسەرت» تەاترلاندىرىلعان كونتسەرتتىك باعدارلاماسىن, «№13» كومەدياسىن, «ەنت تاپسىرمايمىن» دراماسىن, «دوستار سەرتى» جانە «روزا باعلانوۆا» ميۋزيكلدەرىن ۇسىندى. اتالمىش تەاتر جاقىندا جاڭا «الدار كوسە» قويىلىمىن ساحنالادى, وعان 10 000-نان اسا كورەرمەن قاتىستى.
بيىل تۇڭعىش رەت ەرەكشە قاجەتتىلىكتەرى بار دارىندى بالالارعا ارنالعان «ارمان اسۋلارى» جانە حالىقارالىق «ALEM SAZ» ونەر فەستيۆالدەرى دە ءوتتى. «ALEM SAZ» جوباسى قازاقستان مەن الەمنىڭ 76 ەلى اراسىنداعى ديپلوماتيالىق قارىم-قاتىناستارعا جانە اوسشك (ازياداعى ءوزارا ءىس-قيمىل جانە سەنىم شارالارى جونىندەگى كەڭەس) قۇرىلعانىنا 30 جىلدىعىن مەرەكەلەۋ اياسىندا ۇيىمداستىرىلدى. ءىس-شاراعا يتاليا, گەرمانيا, ءۇندىستان, رەسەي, يسپانيا, بەلارۋس جانە تۇركيا ەلىنىڭ مۋزىكانتتارى قاتىسىپ, 13 مىڭنان اسا كورەرمەن تاماشالادى. «ALEM SAZ» فەستيۆالىنىڭ جابىلۋىندا «اSTANA SAZY» قازاق مەملەكەتتىك فولكلورلىق ءانسامبلىنىڭ «ZAMAN» اتتى جاڭا كۇيتاباعىنىڭ تۇساۋكەسەرى دە ءوتتى. ال بالالار جىلىنا وراي وتىكىزىلگەن «ارمان اسۋلارى» فەستيۆالىنىڭ گالا-كونتسەرتىندە جوباعا قاتىسۋشى ونەرپازداردىڭ «بي ونەرى», «ۆوكالدىق ونەر», «اسپاپتا ورىنداۋ», ء«اندى ىم-يشارامەن ورىنداۋ» جانە «ۇلتتىق كيىم ديزاينى» جانرلارى بويىنشا كورسەتكەن ونەرلەرىنە ءتانتى بولدىق. وسى ءىس-شارانى وتكىزگەننەن كەيىن دە كوپتەگەن بالالار مەن اتا-انالاردان جانە ۇستازداردان جاقسى پىكىرلەر الدىق. ءار جىل سايىن وتكىزىپ تۇرۋ وتىنىشتەرىن دە ايتتى. ءىس-شاراعا «قازاقكونتسەرتتىڭ» سوليستەرى, تانىمال ونەر جۇلدىزدارى مەن شىعارماشىلىق توپتارمەن بىرگە ورتا ازياداعى ەڭ العاشقى «قاناتتىلار» ينكليۋزيۆتى تەاترىنىڭ ارتىستەرى دە ءوز ونەرلەرىن ورتاعا سالدى. سونداي-اق, وسى بالالار جىلىنا وراي «بالالار فيلارمونياسى» اتتى جاڭا جوبا قولعا الىنىپ, 2022 جىلدىڭ ءار سەنبى كۇنى «قازاقكونتسەرتتىڭ» ايتۋلى ونەر ۇجىمدارى مەن تانىمال ارتىستەرى ءدارىس-كونتسەرتتەر, شەبەرلىك ساباقتار, ەكسكۋرسيالار وتكىزىپ, كاسىبي شەبەرلىكتەرىنىڭ سىرىمەن ءبولىستى. ال «جازعى كينو» جوباسى «جاس كينومان» رەتىندە جالعاسىن تاۋىپ, كوپ بالالى, الەۋمەتتىك تۇرعىدان از قامتىلعان وتباسىلاردان شىققان, ەرەكشە كومەككە مۇقتاج بالالار مەن جاسوسپىرىمدەرگە, بالالار ۇيىندەگى تاربيەلەنۋشىلەر شاقىرىلىپ, وتاندىق كينوتۋىندىلار مەن قازاقشا مۋلتفيلمدەر 25 مىڭنان استام بالاعا تەگىن كورسەتىلدى.
ودان بولەك «قازاقكونتسەرت» ۇجىمى « ۇلىلارعا تاعزىم» اتتى جاڭا جوبا باستادى. اتالمىش جوبا كورنەكتى جازۋشىلار مۇحتار اۋەزوۆتىڭ 125, عابيت مۇسىرەپوۆتىڭ 120, قارىمدى قالامگەر اقسەلەۋ سەيدىمبەكتىڭ 80, تالانتتى كومپوزيتورلار عازيزا جۇبانوۆانىڭ 95, ەركەعالي راحماديەۆتىڭ 90, قازاق وپەرا ونەرىنىڭ نەگىزىن سالۋشىلاردىڭ ءبىرى كۇلاش بايسەيىتوۆانىڭ 110, جەزتاڭداي ءانشى روزا باعلانوۆانىڭ 100 جىلدىق مەرەكەلەرىنە وراي ۇيىمداستىرىلىپ, داۋلەسكەر كۇيشى, كومپوزيتور, ديريجەر, حالىق قاھارمانى نۇرعيسا تىلەنديەۆتىڭ شىعارماشىلىعىنا ارنالدى.
رۋحى مىقتى, مادەنيەتى جوعارى جانە ونەر فيلوسوفياسى تەرەڭ حالقىمىزدىڭ ونەر شەجىرەسى قورقىت بابا, ءال-فارابي, كەتبۇعا, اسان قايعى, قازتۋعان بابالارىمىزدان باستاۋ الدى. حالىق ونەرى مەن مادەنيەتىن بارىنشا ناسيحاتتاپ, ولاردىڭ ەڭسەسىن كوتەرەتىن شىعارمالاردى جاڭاشا ساحنالاۋدىڭ جولىندا ايانباي ەڭبەك ەتۋ «روزا باعلانوۆا اتىنداعى «قازاقكونتسەرت» مەملەكەتتىك كونتسەرتتىك ۇيىمىنىڭ باستى مىندەتتەرىنىڭ ءبىرى بولىپ قالا بەرمەك.
اقتوتى رايىمقۇلوۆا,
كومپوزيتور, قازاقستاننىڭ ەڭبەك سىڭىرگەن قايراتكەرى,
«روزا باعلانوۆا اتىنداعى «قازاقكونتسەرت» مەملەكەتتىك كونتسەرتتىك ۇيىمىنىڭ ديرەكتورى