ارقالىق قالاسىندا بەس قاباتتى تۇرعىن ءۇيدىڭ ەڭ جوعارى قاباتىنان قۇلاپ كەتكەن قىزدى پاترۋلدىك پوليتسيا قىزمەتكەرى قۇتقارىپ قالدى. بەسىنشى قاباتتان قۇلاپ كەلە جاتقان قىزدى قاعىپ الماق بولىپ, قۇشاق جايىپ, كەۋدەسىن توسەگەن پوليتسەي اياعى زاقىمدانىپ, بىرنەشە جەرىنەن جاراقات العان. ال بيىكتەن قۇلديلاعان قالپى ءتارتىپ ساقشىسىنىڭ ۇستىنە قۇلاعان قىز امان-ەسەن.
سۋىت حابار قالالىق پوليتسيا باسقارماسىنىڭ جەدەل باسقارۋ ورتالىعىنا جەتىنشى قاڭتار كۇنى تاڭعى ساعات 05:30-دا كەلىپ تۇسكەن. وقيعا بولعان ءۇيدىڭ تۇسىنان ءوتىپ بارا جاتقان تۇرعىنداردىڭ ءبىرى بەيتانىس قىزدىڭ بەسىنشى قاباتتان قۇلاپ بارا جاتىپ, بالكوننىڭ تەمىر قورشاۋىنان ۇستاپ ۇلگەرگەنىن حابارلايدى.
وسىلايشا, وقيعا ورنىنا پاترۋلدىك پوليتسيا قىزمەتكەرلەرى المات ءامىرحان مەن رۋسلان قاپساماتوۆ شۇعىل جەتەدى. المات ءامىرحان سىرتتا قالىپ, ارىپتەسى دەرەۋ بەسىنشى قاباتقا قاراي جۇگىرە جونەلەدى. بار ويى – جەدەل قيمىلداپ بالكونعا ءىلىنىپ تۇرعان قىزدى قۇتقارىپ قالۋ.
الايدا قارى تالىپ, نازىك ساۋساقتارى جازىلا بەرگەن قىز ءدال وسى ساتتە جەرگە قاراي قۇلديلاي جونەلگەن. تومەننەن كوز جازباي قاراپ تۇرعان المات ءامىرحان قۇلاپ كەلە جاتقان قىزدى قاپسىرا قۇشاقتاپ, ۇستاپ قالماققا ۇمتىلادى. الايدا 10-11 مەترلىك بيىكتەن قۇلاعان ادامدى قاعىپ الۋ وڭاي ما, اجالعا قارسى ءتوسىن توسەگەن پوليتسەي قىزدى قۇشاقتاي جەرگە قۇلايدى. رۋسلان 29 جاستاعى قالا تۇرعىنىن اجالدان وسىلاي اراشالاپ قالدى.
جوعارى قاباتتان قۇلاعان قىزدىڭ ون ەكى مۇشەسى ساۋ, ەش جەرى زاقىمدانباعان. ال بىرنەشە جەردەن جاراقات العان پاترۋلدىك پوليتسيا قىزمەتكەرى المات امىرحانعا دارىگەرلەر كومەك كورسەتتى.
قوستاناي وبلىسى