قوستانايدا بىلتىر قاراشا ايىندا اشىلعان ۇلتتىق ساداق اتۋ مەكتەبىنىڭ شاكىرتتەرى اۋەلدە «ناۋرىز» شاعىن اۋدانىنداعى تۇرعىن ۇيلەردىڭ ءبىرىنىڭ جەرتولەسىندە جاتتىعىپ جۇرگەن. بالالارعا جەبە تارتۋدىڭ ەرەجەسى مەن مەرگەندىكتىڭ قىر-سىرىن ۇيرەتىپ جۇرگەن اياۋلىم اپپازوۆا – ساداق تارتۋدان ەل چەمپيونى, تالاي حالىقارالىق جارىستارعا قاتىسىپ, جوعارى ناتيجەگە قول جەتكىزىپ جۇرگەن تاجىريبەلى سپورتشى.
وكىنىشكە قاراي, ءاۋ باستا كەلەشەگى زور كورىنگەن مەكتەپ جىل وتپەي كولدەنەڭ كەدەرگىلەرگە ۇشىراپ, قيىن جاعدايعا دۋشار بولىپ وتىر.
– وسى جىلى اقپان ايىنان باستاپ ءبىز جاتتىعىپ جۇرگەن جەرتولەنى بىرنەشە رەت سۋ باسىپ, ساداق-جەبەلەرىمىز, نىسانا ىلەتىن تاقتالارىمىز سۋ بولىپ قالدى. سودان كەيىن ول عيماراتتان كوشۋگە تۋرا كەلدى. قوستانايدا كوممەرتسيالىق عيماراتتاردى جالداۋ اقىسى وتە قىمبات. مىسالى, قالادا بوس تۇرعان قويما عيماراتتارىنىڭ ءبىر شارشى مەترىنىڭ قۇنى 2 500 تەڭگەدەن باستالادى. ساداق تارتۋ ءۇشىن اۋدانى كەم دەگەندە 200 شارشى مەتر بولاتىن عيمارات كەرەك, ياعني عيمارات جالداۋعا اي سايىن 500 مىڭ تەڭگە قاجەت. وسىلايشا, تىعىرىققا تىرەلىپ وتىرمىز, – دەيدى اياۋلىم.
سپورت ۇيىرمەسىنە قاتىسىپ جۇرگەن بالالار قىركۇيەككە دەيىن «ناۋرىز» شاعىن اۋدانىنداعى جەرتولەدە جاتتىعىپ كەلگەن. قولايسىز عيماراتتان ءبىرجولا كوشكەن سوڭ, جاتتىعۋ وتكىزەتىن ورىن تاپپاي قينالعان اياۋلىم اپپازوۆاعا قالا يمامى كومەك قولىن سوزىپ, مەشىت جانىنان سالىنىپ جاتقان قۇرىلىسى بىتپەگەن قاتىمحانا عيماراتىن ۋاقىتشا پايدالانۋعا رۇقسات ەتىپتى.
قازىر ساداق اتۋ مەكتەبىنىڭ 20 شاقتى شاكىرتى وسى جەردە جاتتىعىپ ءجۇر. جىلۋ جۇيەسى جوق عيماراتتىڭ ءىشى تاستاي سۋىق.
اقىلى مەكتەپكە بارىپ جۇرگەن بالالاردىڭ ارقايسىسى بەرتىنگە دەيىن ايىنا 10 مىڭ تەڭگە تولەپ كەلگەن. الايدا تاياۋدا ۇيىرمە اقىسى 15 مىڭ تەڭگەگە دەيىن ءوسىپتى. ويتكەنى شاكىرتتەردەن جينالعان قارجى عيمارات جالداۋ مەن قاجەت بۇيىمداردى ساتىپ الۋعا ازەر جەتەدى. مىسالى, قازىر ءبىر نىسانانىڭ ءوزى 15 مىڭ تەڭگە تۇرادى, ونىڭ ءوزى ەكى اپتادان كەيىن شۇرىق-شۇرىق تەسىلىپ, جارامسىز بولىپ قالادى ەكەن.
ساداق اتۋ مەكتەبىنە مەملەكەت نەمەسە دەمەۋشىلەر تاراپىنان ەشقانداي قولداۋ كورسەتىلمەيدى. ۇيىمداستىرۋ جۇمىستارىنىڭ ءبارىن جاتتىقتىرۋشى ءوزى شەشەدى. تاياۋدا مەكتەپ شاكىرتتەرى جىلى عيماراتقا كوشەدى ەكەن دەگەن جىلى حابار ەستىدىك.
– بيىل ءبىراز قيىندىقتى باستان كەشىردىك. دەسە دە سوعان قاراماستان كوپ ءىس تىندىردىق. وسى ۋاقىت ارالىعىندا شاكىرتتەرىم ساداق تارتۋ ونەرىنىڭ قىر-سىرىن مەڭگەرىپ, نىساناعا ءدال تيگىزۋدى ۇيرەنىپ قانا قويماي, الدىنا ناقتى ماقسات قويا بىلەتىن, وزىنە-ءوزى سەنەتىن دەربەس ادام رەتىندە قالىپتاسىپ ۇلگەردى. وسىنىڭ ءبارى بىزگە ۇلكەن كۇش بەردى. قازىرگى زاماندا الدىڭدى بولجاۋ قيىن عوي, بىراق مەن وسى مەكتەپتىڭ جابىلىپ قالماۋى جولىندا بار كۇش-جىگەرىمدى جۇمساۋعا دايىنمىن, – دەيدى جاتتىقتىرۋشى.
قوستاناي وبلىسى