قوستانايدا احمەت بايتۇرسىن ۇلى اتىنداعى كوشەلەر اراسىندا وتكەن بايقاۋدىڭ جەڭىمپازدارى ماراپاتتالدى. سوڭعى وتىز جىل ىشىندە وبلىس اۋماعىندا وننان استام كوشەگە ۇلت ۇستازىنىڭ ەسىمى بەرىلىپتى. وبلىستىق مادەنيەت باسقارماسى ۇيىمداستىرعان سالتاناتتى ءىس-شاراعا وسى كوشەلەردىڭ تۇرعىندارى, ءوڭىر زيالىلارى مەن اۋىل اكىمدەرى قاتىستى.
«احمەت كوشەلەرىنىڭ كەرۋەنى» دەپ اتالاتىن وبلىستىق بايقاۋ بيىل ءساۋىر-قازان ايلارى ارالىعىندا ءوتتى. ۇيىمداستىرۋشىلار كونكۋرسقا قاتىسقان ءار كوشەنىڭ تازالىعى مەن اسەمدىگىنە, تۇرعىن ۇيلەردىڭ سىرتقى كەلبەتى مەن اۋلا كوركىنە, ۇلت ۇستازىنىڭ قايراتكەرلىك عۇمىرناماسى مەن باي مۇراسىنىڭ اۋىل تۇرعىندارى اراسىندا ناسيحاتتالۋىنا باسا ءمان بەرگەن.
بايقاۋ قورىتىندىسى بويىنشا تورعاي اۋىلىنداعى ا.بايتۇرسىن ۇلى اتىنداعى كوشە باس جۇلدەنى جەڭىپ الدى. ال «ەڭ اسەم, ەڭ تازا كوشە» اتالىمى بويىنشا اۋليەكول تۇرعىندارى جەڭىسكە جەتتى.
وبلىستىق مادەنيەت باسقارماسىنىڭ باسشىسى ەرلان قالماقوۆ بايقاۋ جەڭىمپازدارىنا ارنايى ديپلومدار مەن اقشالاي سىيلىقتار تابىس ەتتى.
– ۇلت ۇستازىنىڭ ەسىمىمەن بايلانىستى مەكتەپ, ۋنيۆەرسيتەت, مەكەمە, كوشەلەردىڭ قاي-قايسىسىنىڭ دا اتىنا زاتى ساي بولعانى ماڭىزدى. ءبىز بايقاۋدى كوپكە ۇلگى بولسىن, بيىل يۋنەسكو كولەمىندە الەمدىك دەڭگەيدە اتالىپ ءوتىپ جاتقان ۇلت ۇستازىنىڭ تويىن شالعاي اۋىلداردىڭ تۇرعىندارى دا سەزىنسىن, وي ءتۇيىپ ونەگە جۇقتىرسىن دەگەن ويمەن ۇيىمداستىردىق. جەڭىمپاز كوشەلەرگە تابىس ەتىلىپ جاتقان اقشالاي سىيلىقتار ناقتى ءبىر ادامنىڭ قالتاسىندا كەتپەيدى. بۇل قارجى بەلسەندى تۇرعىنداردىڭ قالاۋىمەن سول كوشەنىڭ كەم-كەتىگىن تۇزەتۋگە جۇمسالاتىن بولادى. مىسالى, قوستاناي قالاسىنداعى ا.بايتۇرسىن ۇلى جانە ءال-فارابي كوشەلەرىنىڭ قيىلىسىندا الاش ارىستارىنىڭ ەسىمدەرى جازىلعان بەلگى تاقتا بار. جازۋى كومەسكىلەنىپ كەتكەن. كوشەلەر بايقاۋىنىڭ ارنايى سىيلىعىنا يە بولعان ا.نيكيفوروۆ اتىنداعى دارىندى بالالارعا ارنالعان بەينەلەۋ ونەرى مەكتەبىنىڭ باسشىسى تاتيانا كۋزمەنكوۆا اقاڭ كوشەسىندەگى وسى ولقىلىقتىڭ ورنىن تولتىرامىز دەپ وتىر, – دەدى باسقارما باسشىسى.
ناۋىرزىم اۋدانىنىڭ ورتالىعى – قارامەڭدى اۋىلىنداعى اقاڭ اتىنداعى كوشە «ىنتىماعى جاراسقان كوشە» اتالىمى بويىنشا ۇزدىك شىقتى. بۇل كوشەدە ەكى مەكتەپ, مەشىت, جيىرما شاقتى تۇرعىن ءۇي ورنالاسقان.
– كوشەمىز ورتالىقتا, وتە تازا, كەڭ ءارى جارىق. وبلىستىق بايقاۋعا تۇرعىندار اسا جاۋاپكەرشىلىكپەن بەلسەنە قاتىستى. ءساۋىر ايىنان باستاپ اباتتاندىرۋ جۇمىستارىن جۇرگىزدىك. جاڭاعى ەكى مەكتەپتىڭ ۇستازدار ۇجىمى مەن وقۋشىلارى, اۋىلداعى كۇللى مەكەمەلەردىڭ قىزمەتكەرلەرى, ءوزىمىز تۇرعىندار بولىپ ەرتە كوكتەمنەن باستاپ قار تۇسكەنشە ون شاقتى رەت سەنبىلىك جاسادىق. وسى كوشەدە ورنالاسقان ەڭ ادەمى ءۇي, ەڭ تازا اۋلا بايقاۋلارىن وتكىزدىك. ەسكى قورشاۋلاردى اۋىستىرىپ, كوشە جاعالاي تال وتىرعىزىپ, گۇل ەكتىك. وسى شارالاردىڭ ءبارى 19 تامىز كۇنى قورىتىندىلانىپ, جەڭىمپازدار ماراپاتتالدى. وسىعان وراي كوشەمىزدە ۇلكەن مەرەكە ۇيىمداستىرىلىپ, ەكى كيىزۇي تىگىلدى, ساحنا بەزەندىرىلدى. وعان مەكتەپ وقۋشىلارى, اۋىلدىڭ قاراپايىم تۇرعىندارى, اۋدان اكىمشىلىگى مەن جەرگىلىكتى شارۋاشىلىقتاردىڭ باسشىلارى, ەڭبەك ارداگەرلەرى قاتىستى. احمەت كوشەسى مەرەكەسىنىڭ اياسىندا ۇلت ۇستازىنىڭ ولەڭدەرى وقىلىپ, ءان بايقاۋى, ءمۇشايرا ءوتتى. اۋداندىق كىتاپحانا ارنايى كىتاپ كورمەسىن ۇيىمداستىرىپ, جاستار «ۇلت ۇستازىنىڭ ۇلاعاتى» اتتى تانىمدىق كورىنىستى ساحنالادى. سپورتتىق ويىندار, جارمەڭكە ۇيىمداستىرىلدى. ءوزىمىزدىڭ اۋىلدان شىققان ونەرپازدار تاماشا كونتسەرت قويدى. جەرگىلىكتى شارۋا قوجالىقتارىنىڭ دەمەۋىمەن احمەت بايتۇرسىن ۇلى كوشەسىنىڭ تۇرعىندارىنا ۇلگىلى وتباسى, كوپبالالى وتباسى, بايىرعى تۇرعىن, ينتەرناتسيونال وتباسى, سول كۇنى شاڭىراق كوتەرگەن جاس وتباسى دەگەن سىيلىقتار بەرىلدى, – دەيدى قارامەڭدى اۋىلىنداعى ا.بايتۇرسىن ۇلى اتىنداعى كوشەنىڭ تۇرعىنى گۇلنار احمەتوۆا.
سالتاناتتى ءىس-شارانىڭ سوڭىندا حالىق اقىنى ءاسيا بەركەنوۆا مەن قازاقستان جازۋشىلار وداعى وبلىستىق فيليالىنىڭ باسشىسى جانۇزاق ايازبەكوۆ باستاعان ءبىر توپ قالامگەر ۇلت ۇستازى احمەت بايتۇرسىن ۇلىنىڭ 150 جىلدىعى قۇرمەتىنە شىعارىلعان ەستەلىك مەدالمەن ماراپاتتالدى.
قوستاناي وبلىسى