مۇعالىمدەر قۇقىقتارى بۇزىلعان جاعدايدا وقۋ-اعارتۋ مينيسترلىگىنىڭ Telegram-چاتىنا جازا الادى, دەپ حابارلايدى Egemen.kz مينيسترلىكتىڭ ءباسپاسوز قىزمەتىنە سىلتەمە جاساپ.
ول ءۇشىن ارنايى چات ىسكە قوسىلدى. قازىردىڭ وزىندە چاتقا 2 مىڭنان استام ادام تىركەلگەن.
بۇل چاتتا مۇعالىمدەر ءوز قۇقىقتارىنىڭ بۇزىلعانى تۋرالى حابارلاي الادى. مىسالى, مىندەتتەن تىس فۋنكتسيالارعا تارتۋ, شامادان تىس ەسەپ بەرۋ جانە ت.ب. تەلەگرامداعى چاتقا كەلگەن بارلىق اقپارات تەكسەرىلىپ, دەپارتامەنت ماماندارى جاۋاپ بەرەتىن بولادى.
«مۇعالىمدەر شامادان تىس ەسەپ بەرۋدەن بوساتىلدى. قازىرگى كۇنى پەداگوگتەر كۇنىنە تەك ەكى قۇجاتتى, ياعني سىنىپ جۋرنالىن مەن قىسقا مەرزىمدى (ساباق) جوسپارىن تولتىرۋى كەرەك. قۇجاتتاردىڭ ناقتى ءتىزىمى بار جانە ونى بارلىعى ساقتاۋى قاجەت. مەكتەپ اكىمشىلىگى مۇعالىمدەردەن باسقا قۇجاتتاردى تولتىرۋدى تالاپ ەتۋگە قۇقىعى جوق. ەگەر مۇعالىمدەردىڭ قۇقىقتارىن بۇزۋ فاكتىلەرى انىقتالسا, وندا كوميتەت ءتيىستى شارالاردى قابىلدايدى. سونىمەن قاتار وڭىرلەردە اۋماقتىق دەپارتامەنتتەر جانىنان پەداگوگيكالىق ادەپ جانە مۇعالىمدەردىڭ قۇقىقتارىن قورعاۋ جونىندەگى كەڭەستەر جۇمىس ىستەيتىنىن ەسكە سالامىز», دەدى وقۋ-اعارتۋ مينيسترلىگى ءبىلىم سالاسىندا ساپانى قامتاماسىز ەتۋ كوميتەتىنىڭ توراعاسى ەرنۇر داۋەنوۆ.