مەملەكەت باسشىسى ماڭعىستاۋ وبلىسىنىڭ جۇرتشىلىعىمەن كەزدەسۋدە جەم-ءشوپ باعاسىن ارزانداتۋ ماسەلەسىنە نازار اۋدارۋدى ۇسىندى, دەپ حابارلايدى Egemen.kz اقوردانىڭ رەسمي پاراقشاسىنا سىلتەمە جاساپ.
«وبلىس حالقى قيىندىققا تاپ بولعاندا جۇرتىمىز بۇكىل ەل بولىپ كومەك قولىن سوزدى, بەرەكەلى بىرلىگىن كورسەتتى. ماڭعىستاۋ وبلىسى جىل سايىن مال ازىعىنىڭ 75 پايىزىن باسقا وبلىستاردان الادى. سوندىقتان جەم-ءشوپتىڭ باعاسىن ارزانداتۋ ماسەلەسى وتە وزەكتى», دەدى مەملەكەت باسشىسى.
ونىڭ ايتۋىنشا, وزگە وڭىرلەردەن مال ازىعىن تاسىمالداۋ ءۇشىن جەڭىلدەتىلگەن تاريفتەر ەنگىزۋ جولىن قاراستىرۋ كەرەك.
«اگروونەركاسىپ كەشەنىنىڭ ونىمدىلىگىن ارتتىرۋ ءۇشىن عىلىمي مەكەمەلەرمەن تىعىز ىنتىماقتاستىق ورناتۋ ماڭىزدى. سونداي-اق قولدا بار مۇمكىندىكتى جانە ءوڭىردىڭ ەرەكشەلىكتەرىن ءتيىمدى پايدالانعان ءجون», دەدى قاسىم-جومارت توقاەۆ.
پرەزيدەنت ءوڭىردىڭ كليماتتىق جاعىنان قولايلىعىن ايتا كەلە مۇندا جىلىجاي سالۋ ارزان بولاتىنىن ءسوز ەتتى.
«ونىڭ جىلۋى مەن جارىعىنا ەلەكتر قۋاتى از جۇمسالادى. سۋى از, توپىراعى قۇنارسىز جەردە اۋىل شارۋاشىلىعىن دامىتۋدىڭ بىردەن-ءبىر جولى – جاڭا تەحنولوگيالاردى ەنگىزۋ. اۋا رايى وسى ايماققا ۇقسايتىن يزرايل سياقتى ەلدەردىڭ وزىق تاجىريبەسىن مۇقيات زەرتتەۋ قاجەت», دەپ تۇيىندەدى ق. توقاەۆ