پرەمەر-مينيستر ءاليحان سمايىلوۆ پەن «اتامەكەن» ۇلتتىق كاسىپكەرلەر پالاتاسى تورالقاسىنىڭ توراعاسى رايىمبەك باتالوۆپەن كەزدەستى. جيىن بارىسىندا بيزنەسكە تۇسەتىن اكىمشىلىك جۇكتەمەنى ازايتىپ, جاڭا كوممەرتسيالىق جوبالاردى ىسكە قوسۋ مەن دامىتۋعا جاعداي جاساۋ ماسەلەلەرىن تالقىلادى, دەپ حابارلايدى Egemen.kz ۇكىمەتتىڭ رەسمي پاراقشاسىنا سىلتەمە جاساپ.
مەملەكەت ەكونوميكانىڭ ءتۇرلى سەكتورىندا بيزنەس وكىلدەرىن تولعاندىراتىن ماسەلەلەرگە ەرەكشە كوڭىل بولەدى.
«پروبلەمالاردى شەشۋدىڭ جاقسى مىسالدارى بار, بىراق مەملەكەتتىك ورگاندار تاراپىنان ازىرلەنگەن شەشىمدەردى ىسكە اسىرۋدى كەشىكتىرۋ فاكتىلەرى دە جوق ەمەس. بۇل ماسەلەلەر مەنىڭ جەكە باقىلاۋىمدا بولادى», دەدى ءاليحان سمايىلوۆ.
ۇكىمەت باسشىسى ۇلتتىق پالاتانىڭ نورماتيۆتىك قۇقىقتىق اكتىلەرگە جۇرگىزىلەتىن ساراپتامانى كۇشەيتۋ جونىندەگى ۇسىنىسىن قولدادى. اتاپ ايتقاندا, ازىرلەۋشى مەملەكەتتىك ورگاندى بيزنەس مۇددەلەرىن قوزعايتىن نقا جوباسىنىڭ سوڭعى نۇسقاسىن ۇكپ-عا قايتا جىبەرۋگە, ال كونسەنسۋس بولماعان جاعدايدا تۇجىرىمدامالىق ماسەلەلەر بويىنشا قاراۋ جانە پوزيتسيانى دايىنداۋ ءۇشىن پرەمەر-مينيستر دەڭگەيىنە شىعارىلاتىن كەلىسپەۋشىلىكتەر حاتتاماسىن جاساۋعا مىندەتتەيتىن نورمالاردى ەنگىزۋ باستاماسى كوتەرىلەدى.
سونداي-اق مەملەكەتتىك جوسپارلاۋ جۇيەسىندە قۇجاتتاردى ازىرلەۋدە ۇكپ ءرولىن كۇشەيتۋ كوزدەلگەن. سونىمەن قاتار ءاليحان سمايىلوۆ مەملەكەتتىك باعدارلامالاردى ىسكە اسىرۋدى باقىلاۋدى جاقسارتۋ تەتىگىن ازىرلەۋ جونىندەگى باستامانى قولدادى.
«وسى جۇمىس شەڭبەرىندە ۇكىمەت دەڭگەيىندە بەكىتىلەتىن ءاربىر سالا ءۇشىن ماڭىزدى نىسانالى ينديكاتورلار – KPI قالىپتاستىرىلادى. وسى كورسەتكىشتەرگە قول جەتكىزۋدى بىرگە باقىلايمىز», دەدى پرەمەر-مينيستر.
بۇدان باسقا, ءاليحان سمايىلوۆ وڭىرلەر دەڭگەيىندە حالىقتىڭ باسىم بولىگى ەڭبەك ەتەتىن شاعىن بيزنەسكە باعىتتالعان وسىنداي تاسىلدەردى ەنگىزۋدى ماقۇلدادى.
تورالقا باسشىسى رايىمبەك باتالوۆ ۇلتتىق پالاتانى ترانسفورماتسيالاۋ باستالعانى, ونىڭ بيۋدجەتتىك باعدارلامالارعا جانە وعان ءتان ەمەس فۋنكتسيالارعا تاۋەلدىلىگى قىسقارتىلىپ جاتقانىن ايتتى. سونداي-اق بيزنەس قوعامداستىقتىڭ جاڭا سالىق كودەكسىن جانە بىرقاتار ستراتەگيالىق مەملەكەتتىك باعدارلامالاردى ازىرلەۋگە قوسقان ۇلەسى مەن وڭىرلەردە شاعىن جانە ورتا بيزنەستى دامىتۋ بويىنشا جاڭا تاسىلدەرى جونىندە اقپارات بەردى.