جاڭا وقۋ جىلىندا قازاقستان مەكتەپتەرىندە ەرەكشە ءبىلىم بەرۋ قاجەتتىلىكتەرى بار وقۋشىلاردىڭ سانى ەداۋىر ارتتى, دەپ حابارلايدى Egemen.kz وقۋ-اعارتۋ مينيسترلىگىنە سىلتەمە جاساپ.
ماسەلەن, 2021-2022 وقۋ جىلىندا ينكليۋزيۆتى سىنىپتاردا 49 مىڭنان استام ەرەكشە بالا وقىسا, بيىلدىڭ وزىندە ولاردىڭ سانى 55 مىڭعا جۋىقتادى. بۇل مەكتەپتەردە ەرەكشە جاعداي جاساۋ جانە جاڭا نورماتيۆتىك قۇقىقتىق اكتىلەردى ازىرلەۋ مەن قابىلداۋدىڭ ارقاسىندا مۇمكىن بولىپ وتىر.
«مەملەكەت باسشىسى ءوز جولداۋىندا ءبىلىمنىڭ قولجەتىمدى جانە ينكليۋزيۆتى بولۋى كەرەگىن اتاپ ءوتتى. جالپى ءبىلىم بەرەتىن مەكتەپتەردە ەرەكشە بالالاردى وقىتۋعا جاعداي جاسالىپ جاتىر. ەرەكشە بالالاردىڭ ءبىلىم بەرۋ مەكەمەسىنە كەدەرگىسىز كىرۋى ءۇشىن پاندۋستار, تاكتيلدى جولدار, ارنايى تۇتقالار جانە باسقا دا قۇرىلعىلار ورناتىلدى. مەكتەپتەردە پەداگوگ-اسسيستەنت لاۋازىمى ەنگىزىلگەن, ولار ەرەكشە بالالاردىڭ ءبىلىم بەرۋ ۇيىمدارىنا بەيىمدەلۋىنە كومەكتەسەدى. سونىمەن قاتار مەملەكەتتىك ستاندارتتا وقۋ جوسپارلارى مەن باعدارلامالارىنىڭ ۆارياتيۆتىلىگى مەن يكەمدىلىگى قامتاماسىز ەتىلگەن. ولار ەرەكشە ءبىلىم بەرۋدى قاجەت ەتەتىن بالانىڭ جەكە ەرەكشەلىكتەرىن ەسكەرە وتىرىپ بەيىمدەلگەن», دەدى ارنايى جانە ينكليۋزيۆتى ءبىلىم بەرۋدى دامىتۋدىڭ ۇلتتىق عىلىمي-پراكتيكالىق ورتالىعىنىڭ ديرەكتورى ايگەرىم كۋدەرينوۆا.
ايتا كەتسەك, ء«بىلىم تۋرالى» زاڭعا وزگەرىستەر مەن تولىقتىرۋلار ەنگىزىلىپ, ەرەكشە ءبىلىم الۋدى قاجەت ەتەتىن بالالاردىڭ ساناتى كەڭەيتىلدى. بۇل ساناتقا ءارتۇرلى ەكونوميكالىق, الەۋمەتتىك سەبەپتەرمەن, سونىڭ ىشىندە دەنساۋلىعىنا بايلانىستى وقۋدا قيىندىقتارعا تاپ بولعان بالالار جاتادى.
ودان بولەك, جەرگىلىكتى اتقارۋشى ورگانداردىڭ قۇزىرەتىنە ەبق بار بالالاردى وقىتۋ ءۇشىن ارنايى جاعدايلاردى قامتاماسىز ەتۋ كىرەدى. ۆەدومستۆو وكىلدەرى قابىلداۋ ەرەجەلەرىن بۇزعانى جانە ەرەكشە ءبىلىم بەرۋ قاجەتتىلىكتەرى بار بالالاردى تاربيەلەۋ مەن وقىتۋدا ارنايى جاعداي جاساماعانى ءۇشىن ءبىلىم بەرۋ ۇيىمى باسشىسىنىڭ جاۋاپكەرشىلىگى كۇشەيتىلەتىنىن قوسا حابارلادى.