وسى جىلى ەلىمىزدە اۋقىمدى رەفورمالار قولعا الىنىپ, قوعامدا ساياسي ترانسفورماتسيا باستالدى. ال ماۋسىم ايىندا وتكەن كونستيتۋتسيالىق رەفورما بيلىك قۇرىلىمىن وزگەرتتى.
«كۇشتى پرەزيدەنت–ىقپالدى پارلامەنت – ەسەپ بەرەتىن ۇكىمەت» قاعيداسىن ءىس جۇزىنە اسىرۋعا كىرىسىپ كەتتىك. سايلاۋ جۇيەسى جاڭارتىلدى, ەندى بارلىق دەڭگەيدەگى دەپۋتاتتار پارتيالىق تىزىممەن دە, ءبىر مانداتتى وكرۋگتەن دە سايلانادى. كونستيتۋتسيالىق سوت قۇزىرەتى ارتتى, ول كەلەر جىلدان قىزمەت ەتە باستاماق. ەڭ باستىسى, سۋپەرپرەزيدەنتتىك باسقارۋدان پرەزيدەنتتىك فورماعا اۋىستىق. اتا زاڭنىڭ ۇشتەن ءبىرى جاڭارتىلىپ, مەملەكەت دەموكراتيالىق باعىتتا باتىل قادامدار جاساۋدا.
مەملەكەت باسشىسى جولداۋىندا بيىل پرەزيدەنتتىك سايلاۋدى وتكىزۋدىڭ ءمانى مەن ماڭىزىن ەلدىك جانە الەمدىك مىنبەردەن اشىق ايتتى. الدىمەن پرەزيدەنت سايلاۋى, كەلەر جىلدىڭ كوكتەمىندە پارلامەنت سايلاۋى وتپەك. وسىلايشا, بىزدە مەملەكەتتىك ينستيتۋتتار قايتا قۇرىلادى.
كوپشىلىك مەملەكەت باسشىسىنىڭ پرەزيدەنت سايلاۋىن كەزەكتەن تىس وتكىزۋ جونىندەگى باستاماسىن قولدادى. سونىمەن قاتار بۇل باستاما جەر-جەردە قوعام وكىلدەرىمەن تالقىلاندى.
حالىق ساياسي جۇيەنى وزگەرتۋدىڭ قاجەت ەكەنىن جاقسى ءتۇسىنىپ وتىر. كەزەكتەن تىس پرەزيدەنت سايلاۋى 20 قاراشادا وتەتىن بولدى. الدا ءبىزدى ەلدىڭ بۇكىل ساياسي جۇيەسىن تۇبەگەيلى وزگەرتەتىن سايلاۋ كۇتىپ تۇر. ەكونوميكانى وركەندەتۋ, حالىقتىڭ تۇرمىسىن جاقسارتۋ سىندى باستى مىندەتتەردىڭ ىسكە اسۋى وسى ناۋقاننىڭ ناتيجەسىنە بايلانىستى بولماق.
پرەزيدەنت قاسىم-جومارت توقاەۆ حالىققا سايلاۋالدى باعدارلاماسىن ۇسىنادى. وندا ەكونوميكالىق دامۋدى كوزدەيتىن تىڭ ءارى ەلەڭ ەتەرلىك باستامالار ايتىلادى دەپ ۇمىتتەنەمىن.
مەملەكەت باسشىسى سايلاۋدىڭ قاتاڭ تۇردە زاڭعا ساي وتەتىنىنە كەپىلدىك بەردى. ءوز باسىم ناۋقاننىڭ ءادىل جانە اشىق وتەرىنە سەنەمىن. ازاماتتار ۇلكەن جاۋاپكەرشىلىكتى سەزىنىپ, زاڭ تالاپتارىن بەرىك ۇستانۋعا ءتيىس. ەلىمىز ءوز بىرلىگى مەن جاۋاپكەرشىلىگىن تانىتاتىن كەز كەلدى.
پرەزيدەنت ايتقانداي, قازاقستاننىڭ بولاشاعى ارقايسىمىزدىڭ قولىمىزدا. ادىلەتتى قازاقستاندى بىرگە قۇرايىق, اعايىن!
گۇلميرا بايركەنوۆا,
س.امانجولوۆ اتىنداعى شقۋ پروفەسسورى,
زاڭ عىلىمدارىنىڭ كانديداتى