مەرزىمىنەن بۇرىن وتەتىن پرەزيدەنت سايلاۋىنىڭ تاريحي ەرەكشەلىگى كوپ. ويتكەنى, بىرىنشىدەن, قازاقستاننىڭ جاڭا تاريحىندا العاش رەت سايلاۋدىڭ وتەتىن مەرزىمى الدىن الا جاريالاندى.
قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋى وتەتىنىن مەملەكەت باسشىسى 1 قىركۇيەكتەگى جولداۋىندا مالىمدەگەن ەدى. كەشە قاسىم-جومارت توقاەۆ قازاقستان حالقىنا ۇندەۋىن جاريالادى. وندا «وسى باستاما جاريالانعاننان بەرى ءبىر ايعا جۋىق ۋاقىت ءوتتى. بۇل – بارلىق ماسەلەنى بايىپپەن تالقىلاپ, جاعدايدى باعامداۋعا جەتكىلىكتى مەرزىم.
حالىق ءبىزدىڭ ساياسي جۇيەنى وزگەرتۋ تۋرالى جوسپارىمىزدىڭ ءمان-ماڭىزىن جاقسى ءتۇسىنىپ وتىر. سوندىقتان مەن بۇگىن بۇعان دەيىن ايتىلعان سايلاۋدىڭ مەرزىمىنە جانە كونستيتۋتسيانىڭ تالاپتارىنا سايكەس كەزەكتەن تىس قازاقستان رەسپۋبليكاسى پرەزيدەنتى سايلاۋىن 2022 جىلعى 20 قاراشادا وتكىزۋ تۋرالى جارلىققا قول قويدىم.
بۇل ناۋقان ەلدىڭ بۇكىل ساياسي جۇيەسىن تۇبەگەيلى وزگەرتەتىن سايلاۋ كەزەڭىن باستاپ بەرەدى. سول ارقىلى ەكونوميكانى تۇراقتى دامىتۋدى, حالىقتىڭ ءال-اۋقاتىن ارتتىرىپ, تۇرمىس ساپاسىن جاقسارتۋدى كوزدەيتىن ۇزاقمەرزىمدى مىندەتتەردى جۇزەگە اسىرۋعا مۇمكىندىك تۋادى», دەپ مالىمدەدى.
شىنىندا دا, جالپى العاندا قوعامدىق تالقىلاۋ وتكىزۋگە جانە الدىن الا دايىندىق جاساۋعا بۇل ۋاقىت جەتكىلىكتى. ال بۇعان دەيىنگى ساياسي ءداستۇر بويىنشا كەزەكتەن تىس سايلاۋدىڭ ۋاقىتىن جاريالاۋ مەن جارلىققا قول قويۋ ءبىر كۇندە بولاتىن. سونىمەن قاتار پرەزيدەنت الداعى پارلامەنت سايلاۋىنىڭ ۋاقىتىن كەم دەگەندە التى اي بۇرىن جاريالادى. بۇل بارلىق ساياسي كۇشتىڭ الداعى پارلامەنت پەن ءماسليحات سايلاۋلارىنا دايىندالۋعا جەتكىلىكتى ۋاقىتى بار دەگەندى بىلدىرەدى.
ساياسي تۇرعىدان ساراپتاپ قاراساق, بۇل سايلاۋدىڭ بولاتىنى انىق ەدى. ءدال 20 قاراشاعا ءدوپ كەلۋى پرەزيدەنتتىك سايلاۋ زاڭدىلىقتارىنىڭ ۋاقىت شەڭبەرىنە بايلانىستى دەپ ەسەپتەيمىن. ساياسي پارتيالار, باسقا دا بەلسەندىلەر سايلاۋالدى باعدارلامالارىن پىسىقتاۋىنا, ۇمىتكەرلەردى ءوزارا ىرىكتەۋگە ءبىر اي ۋاقىت بەرىلدى دەپ تۇسىنسە بولادى. ەندى ناقتى ۇمىتكەرلەر ۇسىنىلادى. مەملەكەتىمىزدىڭ تۇراقتى, الەمدىك شيەلەنىستەرگە دايىن بولۋ ماقساتىندا وسىنداي قارقىندى جۇيە كەرەك.
قاراشاداعى سايلاۋ الەم قۇبىلىپ, گەوساياسي قاۋىپسىزدىك ماڭىزدى ماسەلەلەردىڭ بىرىنە اينالعان كەزەڭدە وتەدى. بۇل سايلاۋدىڭ تاريحي ماڭىزى – ەڭ كوپ داۋىس جيناعان ۇمىتكەر پرەزيدەنت لاۋازىمىندا ءبىر مارتە عانا وتىرا الاتىنىندا. ال جەتىجىلدىق مەرزىم تۇراقتىلىقتىڭ ارقاسىندا رەفورمانى ىسكە اسىرۋعا مۇمكىندىك بەرەدى.
ءادىل سايلاۋبەك,
قوعام قايراتكەرى