جالپى, جەتىسۋ ءوڭىرىنىڭ ەگىنشىلىك سالاسىندا كوشى ىلگەرى. بيىلدىڭ وزىندە 80 مىڭ گەكتارعا جۋىق القاپقا جۇگەرى ەگىلدى. سونىڭ 26 مىڭ گەكتاردان استامى سوڭعى 60 جىل اۋقىمىندا جۇگەرىنى جەتەكشى داقىل رەتىندە باپتاپ كەلگەن جاركەنت ءوڭىرى ەگىنشىلەرىنىڭ ەنشىسىندە. سوندىقتان بولار سوڭعى جىلدارى ەگىن جيناۋ ناۋقانىنىڭ الدىندا وبلىس جۇگەرىشىلەرىنىڭ باسىم بولىگى جاركەنت وڭىرىنە جينالىپ, القالى كەڭەس قۇرىپ ءجۇر.
ءداستۇرلى تۇردە وتەتىن ەگىنشىلەر جيىنى بيىل دا جالعاسىن تاپتى. بۇل جولى جەتىسۋ ايماعى عانا ەمەس, قازاقستاننىڭ بىرقاتار وبلىسىنان دا جۇگەرى وندىرىسىنە قىزىعاتىن ازاماتتار شەكارا شەبىندەگى اۋداندا باس قوستى. جاركەنت وڭىرىنە جينالعان داڭعايىر كاسىپكەرلەر «پيونەر» بۋدانىن ءوسىرۋ تەحنولوگياسى» تاقىرىبىندا ايماقتىق سەمينار-كەڭەس وتكىزدى. نەگىزىنەن جۇگەرى وندىرىسىمەن شۇعىلداناتىن پانفيلوۆ, ەڭبەكشىقازاق, ۇيعىر, ىلە جانە ەسكەلدى اۋداندارىنىڭ جۇگەرىشىلەرى مەن اۋىلشارۋاشىلىق ماماندارى, عالىمدار باس قوسقان القالى جيىن اۋدانداعى ەليتالىق جۇگەرى تۇقىمىن وسىرەتىن «ەرنار» جشق بازاسىندا ۇيىمداستىرىلدى.
سەمينارعا جينالعان قاۋىم الدىمەن Alem Agro, «دجون دير», BNK Group, Eurasia Group سىندى دۇنيە ءجۇزى مەن قازاقستاندا بەلگىلى, ەگىنشىلىككە قاجەتتى تەحنيكالاردى, تىڭايتقىشتاردى, باسقا دا حيميكاتتاردى تاراتاتىن كومپانيالاردىڭ كورمەگە قويعان ونىمدەرىن تاماشالاپ, «ەرنار» جشق جاڭا تەحنولوگيامەن ءوسىرىپ, سىناقتان وتكىزىلىپ, ەندى جاڭا تۇقىم تۇرىندە وندىرىسكە ۇسىنىلاتىن امەريكانىڭ «كورتەۆا اگريساەنس قازاقستان» كومپانياسىنىڭ «پيونەر» جۇگەرى سۇرىپتارىنىڭ القابىمەن تانىستى.
«جالپى اقش-تا «كورتەۆا» كومپانياسى 230 جىلدان بەرى باسقا داقىلدارمەن بىرگە جۇگەرى تۇقىمىن ءوندىرىپ, الەم ەلدەرىنە تاراتىپ كەلەدى. ال كومپانيا شىعارعان جۇگەرىنىڭ «پيونەر» سۇرىبىنىڭ وندىرىسكە ەنگەنىنە 95 جىل بولدى. ءبىزدىڭ ەلدە بۇل سۇرىپتىڭ بۋدان برەندى 2006 جىلدان بەرى وسىرىلەدى. وسى جولى جاركەنتكە ونىڭ ءوندىرىلىپ جۇرگەن 6 برەندى مەن 5 جاڭا بۋدان تۇقىمىن ديقاندارعا كورسەتۋگە اكەلدىك», دەدى وسى كومپانيانىڭ قازاقستانداعى اگرونوميالىق قولداۋ بويىنشا مامانى نۇرلان قۇلمۇراتوۆ.
جۇگەرىشىلەردىڭ القالى جيىنى دا القاپ باسىندا ۇيىمداستىرىلدى. سەمينار جۇمىسىن پانفيلوۆ اۋدانىنىڭ اكىمى مارات ساعىمبەك جۇگەرىنىڭ وتانى سانالاتىن پانفيلوۆ اۋدانىندا ءوندىرىستى بارىنشا وركەندەتىپ, حالىقتىڭ تۇرمىس جاعدايىن جاقسارتۋعا قولداۋ كورسەتىپ جۇرگەن, ەليتالىق تۇقىم تاراتاتىن, وزىق تەحنولوگيالار مەن تەحنيكالار, تىڭايتقىشتار, گەربيتسيدتەر ۇسىنىپ وتىرعان كاسىپورىنداردىڭ وكىلدەرىنە ريزاشىلىعىن ءبىلدىردى.
كەڭەستە اگرارلىق نەسيە سەرىكتەستىگىنىڭ جەتىسۋ وبلىستىق فيليالىنىڭ ديرەكتورى ءىزباسار جۇسىپبەكوۆ ەگىنشىلەرگە 6-7 پايىزدىق جەڭىلدىكپەن قارجىلاي قولداۋ كورسەتۋگە قاۋقارى بارىن جەتكىزدى. ال اقش-تىڭ «كورتەۆا اگريسيانس قازاقستان» كومپانياسىنىڭ قازاقستانداعى وكىلى تاتيانا كۋدرينا وسى كەڭەستە جۇگەرىشىلەرگە تانىستىرىلاتىن «پيونەر» جۇگەرى تۇقىمدارىنىڭ جەرسىنۋى مەن ونىمدىلىگى جونىندە اڭگىمەلەدى.
كەڭەستىڭ قورىتىندى ءسوزى «ەرنار» جشق جەتەكشىسى تاسقىن جاپارقۇلعا ۇسىنىلىپ, ول قوجالىقتىڭ سۇرىپتى سىناۋ تەلىمىندە سىناقتان وتكەن «جۇگەرىنىڭ» جاڭا تۇقىمدارىنا سيپاتتاما جاسادى. سونىمەن قاتار قوجالىق جەتەكشىسى جۇگەرى داقىلىن ءوسىرۋدىڭ جاڭا تەحنولوگيالارىنا دا كەڭىنەن توقتالدى.
جەتىسۋ وبلىسى