«بۇگىندە عارىش مونيتورينگى ناتيجەسىندە وبلىسىمىزدا پايدالانىلماي جاتقان 857 مىڭ گا جەر بار ەكەنى انىقتالدى, سونىڭ 42,4 مىڭ گەكتارى مەملەكەت مەنشىگىنە قايتارىلدى, 438,6 گەكتارى اۋىل شارۋاشىلىعى اينالىمىنا قوسىلدى. سول سياقتى ءوڭىردىڭ ءار قيىرىنان بەلگىلەنبەگەن جەرگە قوقىس توگىلگەن 154 ورىن انىقتالدى, سونىڭ 109-ى جويىلدى». جەتىسۋ وبلىسىنىڭ اكىمى بەيبىت يساباەۆ «قازاقستان عارىش ساپارى» ۇلتتىق كومپانياسى» اق توراعاسى, بەلگىلى ۇشقىش ايدىن ايىمبەتوۆپەن كەزدەسۋدە وسىلاي دەدى.
وبلىس اكىمى ءباسپاسوز قىزمەتىنىڭ حابارلاۋىنشا, كەزدەسۋ بارىسىندا كوسمومونيتورينگ سالاسىنداعى ىنتىماقتاستىق بايلانىستاردى كەڭەيتۋ ماسەلەسى تالقىلاندى. ءوڭىر باسشىسى جەتىسۋدا اۋىل شارۋاشىلىعىنا ەرەكشە دەن قويىلىپ وتىرعانىن جەتكىزدى. سوندىقتان عارىشتان مونيتورينگ جاساۋ ماقساتتى پايدالانىلماي جاتقان اۋىل شارۋاشىلىعى جەرلەرىن انىقتاۋعا سەپتىگىن تيگىزىپ, بۇل ۇدەرىسكە جاڭا قارقىن بەرمەك.
ا.ايىمبەتوۆ رەسپۋبليكالىق بيۋدجەتتىك باعدارلامالار اياسىندا كورسەتىلەتىن تەگىن قىزمەتتەرگە توقتالىپ, جۋىردا ىسكە قوسىلعان Kaznedra جانە JerInSpectr تسيفرلى جاڭا پلاتفورمالارى تۋرالى ايتتى.
بيزنەستى دامىتۋ جانە حالىقارالىق ىنتىماقتاستىق دەپارتامەنتى حالىقارالىق ىنتىماقتاستىق باسقارماسىنىڭ باستىعى رۋستام ابدراحمانوۆتىڭ سوزىنە سۇيەنسەك, «قازاقستان عارىش ساپارى» ۇك» اق عارىش مونيتورينگى سالاسىندا 40-تان استام باعىتتا جۇمىس ىستەيدى, سونىڭ 8-ءى القاپتاردى, ورمانداردى, سۋ نىساندارىن, جايلاۋلاردى, جەر پايدالانۋدى, توتەنشە جاعدايلاردى, قالدىقتار مەن جەر قويناۋىن پايدالانۋدى مونيتورينگىلەۋ باعىتتارىندا قىزمەت كورسەتەدى. ماسەلەن, وسىمدىكتەر كوسمومونيتورينگى كۇن سايىن وسىمدىكتىڭ جاي-كۇيىن, لاستانۋى مەن شىعىمدىلىعىن باعالاۋعا قاتىستى اقپارات جيناۋعا مۇمكىندىك بەرەدى, سونداي-اق وسىمدىكتىڭ ءتۇرىن انىقتاۋعا كومەكتەسەدى. ال سۋارمالى جەرلەردىڭ مونيتورينگى وسىمدىكتەردىڭ سۋارىلۋ كولەمىن جانە سۋدى تۇتىنۋىن قاداعالايدى. بۇل – عارىش مونيتورينگىنىڭ زور مۇمكىندىكتەرىنىڭ شاعىن ءبىر بولىگى عانا.
«ەكولوگيالىق ماسەلەلەر ءبىزدى دە الاڭداتادى. وڭىردە قاراۋسىز قالعان قالدىق قويمالارى از ەمەس, قازىر بىزگە ينۆەستورلار رەكۋلتيۆاتسيا جاساۋعا ۇسىنىس ءبىلدىرىپ جاتىر. ءبىزدى قالدىق قويمالارىنىڭ جاعدايى, جەر قويناۋىنداعى قور كولەمى سياقتى كوپتەگەن ماسەلە تولعاندىرادى. وسى باعىتتا دا سىزدەرمەن بىرىگىپ جۇمىس ىستەسەك», دەدى وبلىس اكىمى ب.يساباەۆ.
ر.ابدراحمانوۆتىڭ ايتۋىنشا, ارنايى تاپسىرىس بەرىلسە, عارىش مونيتورينگى قۇرالدارىنىڭ ناتيجەسىندە مۇنداي باعىتتا دا تولىق اقپارات جيناقتاپ بەرۋگە مۇمكىندىك بار.
ب.يساباەۆ وبلىس عارىش مونيتورينگىمەن اۋىل شارۋاشىلىعى, ستيحيالىق قوقىس ورىندارىن, زاڭسىز قۇرىلىستار مەن جەر قويناۋىن پايدالانۋدى انىقتاۋ بويىنشا ىنتىماقتاسا جۇمىس ىستەۋگە ءازىر ەكەنىن جەتكىزدى. توتەنشە جاعداي ورىن العان جاعدايدا ورمان جانە دالا ورتتەرىنىڭ تارالۋ باعىتىنا بولجام جاساۋ, سول سياقتى زاڭسىز اعاش كەسۋ وقيعالارىن انىقتاۋ ماسەلەسى دە وزەكتى. وسىعان بايلانىستى ءتيىستى وبلىستىق باسقارمالار مەن دەپارتامەنتتەردىڭ باسشىلارىنا تاپسىرمالار بەرىلدى.
«بۇل باعدارلامانى تولىق قولدايمىز. ول, راسىندا دا, پايدالى, ءبىزدى قىزىقتىراتىن نىسانداردى انىقتاۋعا كەتەتىن ۋاقىتتى بىرنەشە ەسە قىسقارتادى. ورتاق ماسەلەلەردى بىرلەسىپ تالقىلاعانىمىزعا قۋانىشتىمىن. ەندى ءار باعىت بويىنشا تىعىز بايلانىس ورناتاتىن بولامىز», دەپ ءسوزىن تۇيىندەدى وبلىس اكىمى.
«قازاقستان عارىش ساپارى» ۇك» اق توراعاسى ايدىن ايىمبەتوۆ اقپاراتتىڭ اشىقتىعى مەن قولجەتىمدىلىگىن قامتاماسىز ەتۋ, سول سياقتى بيۋروكراتيا مەن جەمقورلىق تاۋەكەلدەرىن ازايتۋعا ىقپال ەتۋ عارىش مونيتورينگىنىڭ ماڭىزدى مىندەتتەرىنىڭ ءبىرى ەكەنىن اتاپ ءوتتى.
جەتىسۋ وبلىسى