كەز كەلگەن مەملەكەتتىڭ ءوسىپ-وركەندەۋىنە ونىڭ الەۋمەتتىك-ەكونوميكالىق دامۋى جانە ساياسي تۇراقتىلىعى وڭ اسەرىن تيگىزەتىنى تۇسىنىكتى. وسى ورايدا حالىقتىڭ دەنساۋلىعى دا وتە ماڭىزدى ءرول وينايدى. ويتكەنى مەملەكەتتىڭ العا قويعان ماقسات-مۇددەسىن, ستراتەگيالىق جوسپارلارىن ىسكە اسىراتىن سول ەلدىڭ ازاماتتارى. دەمەك ول مىندەتتى ورىنداۋ ءۇشىن ءبىرىنشى كەزەكتە ۇلتتىڭ ساۋلىعى قاجەت. ال بۇل ماقساتتى جۇزەگە اسىرۋ ءۇشىن ەڭ الدىمەن بۇقارالىق سپورت پەن سپورتتىق ينفراقۇرىلىمدى دامىتۋ كەرەك. بۇل جونىندە پرەزيدەنت قاسىم-جومارت توقاەۆ ءوزىنىڭ جولداۋلارىندا تالاي مارتە ايتىپ, وسى بويىنشا ۇكىمەتكە ءتيىستى تاپسىرمالار بەرگەن-ءدى.
«ۇلت دەنساۋلىعىن بەكەمدەۋ ماسەلەسى دە وتە وزەكتى. بارلىق جاس ساناتتارى اراسىندا بۇقارالىق سپورت تۇرلەرىن ناسيحاتتاي بەرۋ كەرەك. بالالار ءۇشىن سپورتتىق ينفراقۇرىلىمنىڭ بارىنشا قولجەتىمدى بولۋىن قامتاماسىز ەتۋ كەرەك. بۇقارالىق سپورتتى دامىتۋ – پيراميداعا اينالۋعا ءتيىس. ونىڭ باسىنا چەمپيوندار شىقسا, ونىڭ نەگىزىندە ءبىز ساۋ ءارى سانالى ۇرپاقتى, مىقتى ۇلتتى قالىپتاستىرامىز. بۇل باعىتتى زاڭنامالىق تۇرعىدا جالعاستىرىپ, بۇقارالىق سپورتتى دامىتۋدا كەشەندى باعدارلاما قابىلداۋ كەرەك», دەگەن بولاتىن مەملەكەت باسشىسى «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» اتتى قازاقستان حالقىنا ارناعان جولداۋىندا.
پرەزيدەنتتىڭ بۇقارالىق سپورتقا قاتىستى تاپسىرماسىن ورىنداۋ ماقساتىندا شىمكەنت قالاسىندا جاستار ليگاسى جوباسى قولعا الىنعان. اتالعان يگى ءىس-شارانىڭ كوزدەگەن نەگىزگى ماقساتى وسكەلەڭ ۇرپاقتى سپورتقا باۋلۋ, سول ارقىلى جاستار اراسىندا سالاماتتى ءومىر سالتىن ناسيحاتتاپ, جامان ادەتتەردەن ساقتاۋ. ويتكەنى بۇگىنگى جاھاندانۋ داۋىرىندە ينتەرنەت, الەۋمەتتىك جەلىلەردەن كەلەتىن قاۋىپ كۇشەيىپ تۇرعان شاقتا ءوسىپ كەلە جاتقان ۇرپاقتى جاماندىقتاردان ساقتاۋدىڭ بىردەن-ءبىر جولى سپورت بولىپ وتىر. ادامدى ازدىراتىن بوس ۋاقىت دەمەكشى, سپورتپەن شۇعىلدانعان جاستا وقۋ مەن دەنە شىنىقتىرۋدان باسقا ءىس-ارەكەتكە ۋاقىتى دا قالمايتىنى, زاۋقى دا سوقپايتىنى بەلگىلى. سوندىقتان رەسپۋبليكانىڭ ءۇشىنشى مەگاپوليسىندە قولعا الىنعان تىڭ باستاما ۇرپاق تاربيەسىندە, ۇلتتىڭ ساۋلىعىن كۇشەيتۋدە ءوزىنىڭ جەمىسىن بەرەتىنى ءشۇباسىز.
وسى ورايدا جۋىردا قالالىق اكىمدىكتىڭ باستاماسىمەن, سونىڭ ىشىندە ىشكى ساياسات جانە جاستار ىستەرى باسقارماسىنا قاراستى «جاستار رەسۋرستىق ورتالىعى» كمم-ءنىڭ ۇيىمداستىرۋىمەن «شىمكەنت جاستار ليگاسى» جوباسىنىڭ ءۇشىنشى كەزەڭىنىڭ تۇساۋى كەسىلدى. اتالعان سپورتتىق جارىستىڭ اشىلۋ سالتاناتىنا شىمكەنت قالاسى اكىمىنىڭ ءبىرىنشى ورىنباسارى شىڭعىس مۇقان, قالالىق ءماسليحاتتىڭ حاتشىسى باحادىر نارىمبەتوۆ باستاعان ءبىر توپ دەپۋتاتتار, سپورتتىق باسەكەگە دەمەۋشى بولعان «3-ەنەرگوورتالىق» اق بيزنەس-سەرىكتەسى ش.نۇرتاەۆا مەن كورپوراتسيا مەنەدجەرى ش.نىسامبەكوۆا جانە اۋدان اكىمدەرى مەن ۇستازدار قاۋىمى قاتىستى.
مىنبەردەن ءسوز العان جارىس ۇيىمداستىرۋشىلارى جوبانىڭ ماقساتى – مەكتەپ وقۋشىلارىنىڭ ساباقتان تىس ۋاقىتىن ءتيىمدى پايدالانۋ, سپورتپەن شۇعىلدانۋعا جول اشۋ, ولاردىڭ ەرىك-جىگەرى مەن تاباندىلىعىن قالىپتاستىرىپ, قازاقستان رەسپۋبليكاسىنىڭ چەمپيوناتتارىنا كوماندا جاساقتاۋ دەدى.
ءوز كەزەگىندە سپورتتىق باسەكەنىڭ اشىلۋ سالتاناتىندا ءسوز سويلەگەن شىڭعىس جۇمابەك ۇلى جارىس جولىنا شىققان جاس سپورتشىلارعا ساتتىلىك تىلەدى.
– قالامىزدىڭ جالىندى جاستارى «شىمكەنت جاستار ليگاسىن» جەتىستىك پەن سالاماتتى ومىرگە باستايتىن جاڭا جول دەپ بىلگەيسىزدەر. وسى باستاما ارقىلى شاھارىمىزدىڭ جاستارىندا سپورتقا دەگەن قىزىعۋشىلىق ويانىپ, تاباندى كۇرەس پەن تىنىمسىز ەڭبەكتىڭ ناتيجەسىندە كەلەشەكتە ليگا ويىندارىنان الەمدىك دودالاردى باعىندىراتىن جىگەرلى دە قايراتتى سپورتشىلاردىڭ شىعاتىنىنا سەنەمىز! تاعى ءبىر ايتا كەتەتىن جايت, شىمكەنت جاستار ليگاسى – رەسپۋبليكا بويىنشا ۇزدىك جوبا اتانىپ, ۇلكەن قولداۋعا يە بولدى. بۇل جوبا جاستاردى پاتريوت, وتانسۇيگىش, ەلجاندى بولىپ وسۋىنە سەپتىگىن تيگىزەدى دەگەن ويدامىز. سپورت دەنساۋلىقتىڭ عانا كەپىلى ەمەس, سونىمەن قاتار ول ادامدى تاباندىلىق پەن كۇرەسكەرلىككە ۇيرەتىپ, ەرىك-جىگەرىن شىڭداي تۇسەدى. بۇگىندە مەملەكەت سىزدەردىڭ ساپالى ءبىلىم, سانالى تاربيە الۋلارىڭىزعا ءارى باسەكەگە قابىلەتتى ازامات بولىپ وسۋلەرىڭىزگە قولايلى جاعداي جاساپ وتىر.
تەك سپورتتا عانا ەمەس, عىلىمدا دا, ونەردە دە جانە وزگە سالالاردا جۇزدەن جۇيرىك اتانىپ, ەلىمىزدىڭ ابىرويىن اسقاقتاتا بەرۋلەرىڭىزگە تىلەكتەسپىن! ەل سىزدەردەن, جاستاردان زور ءۇمىت كۇتەدى. ەندەشە جەڭىستى كۇندەرىمىز كوپ بولعاي! – دەگەن قالا اكىمىنىڭ ءبىرىنشى ورىنباسارى ش.مۇقان جاستاردى ءبىلىم الۋمەن قاتار سالاماتتى ءومىر سالتىن ۇستانۋعا شاقىردى.
وسى تۇستا ايتا كەتۋ كەرەك, اۋقىمدى جوباعا 2021-2022 وقۋ جىلى ارالىعىندا 151 مەكتەپتەن فۋتبول, ۆولەيبول, باسكەتبول, شاحمات ويىندارىنان, ياعني سپورتتىڭ ءتورت ءتۇرى بويىنشا 514 كوماندا, جالپى سانى التى مىڭعا جۋىق مەكتەپ وقۋشىلارى قاتىسقان بولاتىن. ال ءۇشىنشى رەت ۇيىمداستىرىلىپ وتىرعان «شىمكەنت جاستار ليگاسى» 2022-2023 وقۋ جىلى اياسىندا سول بۇرىنعى تالاپقا سايكەس قالاداعى جالپى ورتا ءبىلىم بەرەتىن مەكتەپ وقۋشىلارى اراسىندا وتەتىن بولادى. سايىسقا فۋتبول, باسكەتبول, ۆولەيبول, شاحماتتان 138 مەكتەپتەن قۇرالعان 514 كوماندا, ياكي 5926 وقۋشى قاتىسادى. ليگاداعى كوماندالاردى قولداپ, دەمەيتىن جارىسقا قاتىسۋشى ءاربىر مەكتەپتەن ارنايى فانكلۋبتار جاساقتالدى.
ءوز كەزەگىندە العاشقى جارىس سپورتتىڭ ۆولەيبول تۇرىنەن باستالىپ, ەكى كوماندانىڭ ويىنى دا وتە تارتىستى ءوتتى. مۇندا احمەت بايتۇرسىن ۇلى اتىنداعى №50 مەكتەپ-گيمنازياسى مەن جۇسىپبەك ايماۋىتوۆ اتىنداعى №64 مەكتەپ-گيمنازياسىنىڭ كوماندالارى ءوزارا سايىسقا ءتۇستى. جارىس ناتيجەسىندە №50 مەكتەپ-گيمنازياسى ءوز قارسىلاسىن ۇتىپ, 2:0 ەسەبىمەن جەڭىسكە جەتتى.
تاربيەلى, ءبىلىمدى, العىر ءارى دەنى ساۋ ۇرپاق – ەلىمىزدىڭ ەڭ قىمبات بايلىعى. جاستاردىڭ وقۋمەن قاتار, سپورتپەن اينالىسۋىنا قولايلى جاعداي جاساۋ – مەملەكەتتىڭ باستى مىندەتى. جالپى بۇقارالىق سپورتتى دامىتۋ ماسەلەسىنە ءوزىنىڭ جولداۋىندا ايتقان پرەزيدەنت تاپسىرماسىنا سايكەس قازىر ۇكىمەت تە, جەرگىلىكتى اكىمدىك تە ەرەكشە نازار اۋدارىپ جاتىر. وسى جاعى ءبىزدى ەرەكشە قۋانتادى, دەدى حالىق قالاۋلىلارى.
«شىمكەنت جاستار ليگاسى» ءىىى ماۋسىمىنىڭ اشىلۋ سالتاناتى بارىسىندا الدىڭعى ءىى ماۋسىمنىڭ جۇلدەگەرى اتانعان ۇزدىك مەكتەپتەردى دە ماراپاتتاۋ ءراسىمى ءوتتى. وندا جەڭىمپاز 4 كومانداعا سۋ جاڭا اۆتوكولىك كىلتتەرى تاپسىرىلدى.
تارقاتىپ ايتساق, بىلتىرعى دودادا شاحماتتان 4 اۋداننان 130 كوماندا, 520 وقۋشى قاتىسىپ, ومىربەك جولداسبەكوۆ اتىنداعى №9 IT مەكتەپ-ليتسەيى جۇلدەلى ورىننان كورىندى. سول سەكىلدى 1464 وقۋشىدان قۇرالعان 122 كوماندا اراسىندا باسكەتبولدان سىنعا تۇسكەندەر ىشىندە م.ح.دۋلاتي اتىنداعى №8 مەكتەپ-گيمنازياسى باس جۇلدەنى جەڭىپ الدى. ال ۆولەيبولدان باسەكەگە تۇسكەن 129 كوماندا اراسىندا ءال-فارابي اتىنداعى №113 جالپى ورتا مەكتەپتىڭ اسىعى الشىسىنان ءتۇستى. سونىمەن قاتار فۋتبولدان 133 قۇراما كوماندادان العا سۋىرىلىپ شىققان ى.التىنسارين اتىنداعى №65 مەكتەپ-گيمنازياسى جۇلدەلى ءى ورىندى يەلەندى.
«شىمكەنت جاستار ليگاسىنىڭ» ءىى ماۋسىمىن قورىتىندىلاعان ءىس-شارادا قالا اكىمى مۇرات ايتەنوۆ جارىستىڭ ماڭىزدىلىعى, قوعامعا بەرەر پايداسى تۋرالى ءسوز قوزعاعان ەدى.
«مەملەكەت باسشىسىنىڭ تاپسىرماسىنا وراي بۇقارالىق سپورتتى دامىتۋ ماقساتىندا كەشەندى باعدارلاما ازىرلەندى. سول باعدارلامانى جۇزەگە اسىرۋ اياسىندا قالامىزدا جاستار اراسىندا اۋقىمدى سپورتتىق باسەكە قولعا الىندى. دەنى ساۋ جاس – ەلدىڭ كەلەشەگى. سوندىقتان وسكەلەڭ ۇرپاقتىڭ ءوز وتانىن سۇيەتىن, جەرىن جاۋدان قورعاي بىلەتىن جىگەرلى دە باتىل بولىپ ءوسۋى مەملەكەت ءۇشىن وتە ماڭىزدى. سپورت ارقىلى ءبىرىنشى كەزەكتە ادامنىڭ دەنساۋلىعى كۇشتى بولادى, ەكىنشىدەن, دەنەنى شىنىقتىرا وتىرىپ جاستار ەڭبەكقور, ءوز ماقساتىنا قالايدا جەتۋگە تىرىساتىن تاباندى, ەرىك-جىگەرى مىقتى ازامات بولىپ ءوسىپ شىعادى. مويىنداۋ كەرەك, جارىستا جەڭىسكە جەتكەن وقۋشىلار تەك سپورتتا عانا ەمەس, وزدەرىنىڭ دە مەكتەپتەرىنىڭ ابىرويى مەن بەدەلى ءۇشىن كۇرەستى. بۇگىن ءوزى ءبىلىم الاتىن التىن ۇيا مەكتەبىنىڭ نامىسىن قورعاعان جاس جەتكىنشەك ەرتەڭ ەر جەتكەندە ەلىنىڭ دە نامىسىن قورعايتىن, وتانىنا ادال قىزمەت ەتەتىن ازامات بولىپ قالىپتاساتىنىنا سەنىم مول. سوندىقتان بۇل جارىستار مەن جەڭىستەر جاستاردىڭ كۇرەسكە تولى ءومىر جولىنداعى العاشقى قادامى بولماق», دەگەن ەدى شاھار باسشىسى م.ايتەنوۆ.
سالاماتتى ءومىر سالتىن قالىپتاستىرۋ, بۇقارالىق سپورتتى دامىتۋ اياسىندا مەگاپوليستە ىسكە اسىرىلىپ جاتقان بۇدان باسقا دا اۋقىمدى ءىس-شارالاردى اتاپ وتۋگە بولادى.
سونىڭ ءبىرى – شىمكەنت مارافونى. ايتا كەتۋ كەرەك, بيىل 5-ءشى رەت وتكەن وسى جۇگىرۋ مارافونىنا 5 مىڭعا جۋىق ازامات قاتىسىپ, وزىندىك ءبىر رەكورد ورناتىلدى. جۇگىرۋ سايىسىندا جاس مولشەرىنە شەكتەۋ قويىلماعاندىقتان 6 جاسار بالادان, سەكسەن جاستى القىمداعان قارياعا دەيىن جارىس جولىندا باق سىناستى. ءوز كەزەگىندە سالاماتتى ءومىر سالتىن ناسيحاتتاۋ ماقساتىندا قولعا الىنعان بۇقارالىق جارىستىڭ جۇلدە قورى 11 ملن تەڭگەنى قۇرادى.
مارافونعا ءار وبلىس, قالادان, ءتىپتى رەسەي, وزبەكستان, تاجىكستان سەكىلدى الىس-جاقىن شەتەلدەردەن دە كەلىپ قاتىسقان سپورتشىلار بولدى. جۇگىرۋدە اۋەسقوي سپورتشىلار بىرنەشە قاشىقتىق بويىنشا جۇلدەگە تالاستى. ەڭ ۇزاق قاشىقتىق 42 شاقىرىمدى شوحرۋح داۆلاتوۆ ەسىمدى ازامات ءبىرىنشى بولىپ باعىندىردى. كورشى ەل وزبەكستان رەسپۋبليكاسىنان كەلگەن مارافونشى اتالعان ارالىقتى 2 ساعات 25 مينۋتتا جۇگىرىپ ءوتتى.
سونىمەن بىرگە بيىلعى مارافون باعدارلاماسىنا سكانديناۆيالىق ءجۇرىس پەن ەكيدەن سىندى باعىتتار دا قوسىلدى.
شىمكەنت