ءوزىمىز زەينەت جاسىندا بولساق تا, كوپ جىل ۇستازدىق ەتكەندىكتەن, ءبىر قۇلاعىمىز قاشاندا مەكتەپ جاققا ءتۇرۋلى جۇرەدى جانە ونداعى كەيبىر جاعدايلار ءبىزدى دە ايتارلىقتاي الاڭداتادى. سوڭعى ەكى جىلداعى كوروناۆيرۋستىڭ اۋرە-سارساڭى مەكتەپتەردەگى وقىتۋ ۇدەرىسىنە دە وتە-موتە كەدەرگى بولعانىن بىلەمىز. ايتسە دە ودان بۇرىنعى ءبىلىم مينيسترلەرىنىڭ ءار ءۇش جىلدا اۋىسىپ, ارقايسىسى مەكتەپ باعدارلاماسىنا ءوز «جاڭالىعىن» ەنگىزىپ, وقۋشىنىڭ ميىن اتالا ەتكەنىنەن دە حاباردارمىز.
مەكتەپ وقۋشىلارىنىڭ كەڭەستىك كەزەڭدە بىلىمگە قۇشتارلىعى وتە جوعارى ەدى. سوندىقتان دا كەڭەس عالىمدارى مەن ينجەنەرلەرى الەمدىك رەيتينگتە ەڭ الدىڭعى قاتاردان ورىن الاتىن. بالالاردىڭ وقۋ-بىلىمگە دەگەن سالعىرت كوزقاراسى ەلىمىز ەگەمەندىك العاننان كەيىنگى جىلدارى باستالدى. ءسويتىپ, جاسىراتىنى جوق, كەرجالقاۋ, جان اۋىرتپاي وڭاي اقشا تاپقىسى كەلەتىن, ۇرلىق-قارلىقتان دا جيىركەنبەيتىن بالالار كوبەيدى. ال مەكتەپتەردىڭ سەن ساباق وقىماساڭ دا, كىتاپ بەتىن اشپاساڭ دا ء«ۇش» قويىپ, سىنىپتان سىنىپقا وتكىزىپ, قولىڭا اتتەستات ۇستاتاتىنىن تاعى كوردى. مۇنداي جاعدايدا وقۋشىلاردا قانداي ءبىلىم بولسىن؟!
وقۋشى وقۋ-ءبىلىمنىڭ نەگە قاجەت ەكەنىن باستاۋىش سىنىپتان باستاپ زەردەلەۋى كەرەك. سونى الۋعا ۇمتىلۋى كەرەك. ال ءبىزدىڭ ءبىلىم بەرۋ جۇيەمىزدە سول قاجەتتىلىكتى وقۋشىعا سەزىندىرىپ, ونىڭ قىزىعۋشىلىعىن وياتاتىنداي ىنتالاندىرۋ تەتىكتەرى بار ما؟ بار دەي الماساق كەرەك. بىزدىڭشە, بۇگىنگى وقۋ پروتسەسىن ارتقا تارتىپ وتىرعان, مىنە, وسىنداي ولقىلىقتار جانە بۇعان جاۋاپتى ۆەدومستۆو تاراپىنان دا ۇلگەرىمى تومەن وقۋشىنى سول سىنىپتا قايتا قالدىرماۋ كەرەك دەگەن تالاپتىڭ قويىلۋى دەر ەدىم. ەڭ جامانى, وسىنىڭ ءبارى مۇعالىمدەر قاۋىمىن جاستارعا ۇلگى بولارلىق, ەلدىڭ, جەردىڭ قامىن ويلايتىن تۇلعالى ازاماتتان جاسقانشاق, تىم قارابايىر توبىرعا اينالدىرىپ بارا جاتىر.
وسىنداي پروبلەمالاردى جەدەلدەتە شەشپەي, ءىستىڭ توقىراپ, «باياعى جارتاس – سول جارتاس» قالپىندا قالا بەرەتىنى انىق.
بەردالى رىسبەكوۆ,
زەينەتكەر ۇستاز
تۇركىستان وبلىسى,
كەلەس اۋدانى